Read Yupik Luke 11 Bible Online

Luke 11 - Yupik bible

Luke 11

¹Tua-i-llu cat iliitni piicallerminek taqngan, elitnaurain iliita qanrutaa, “Ataneq, piicagyaramek elicungcarkut, John-aam elitnauraminek elicungcarillruciatun.”

²Tua-i qanrutai, “Piicakuvci waten qanqici: ‘Atavut, qilagmetellria, atren kenciknarili, angayuqauviin tekilli, pisqucin nunam qaingani piuli qilagmitun,

³neqkamten̄ek unuaquaqan cikirkut,

⁴assiilngumten̄ek-llu au͡g'ariskut, wangkuta-llu wangkutnun assiilngilriit au͡g'aritelaucimcetun, picetaarutmun-llu pivkaqsaunata assiilngurmek-llu aviuskut.’”

⁵Qanrutai-llu, “Ilasi yugnikek'ngangqerquni, unuum-llu qukallrani ullagluku qanruskuniu, ‘Yugnikekmaa, kelipanek pingayunek cimirarkamnek pinga,

⁶tua-i yugnikekemnek allanicanga allanitkaunii-llu elliinun.’

⁷Qamaken-llu kiuciqlia waten, ‘Qessaniurcetenrilnga, ak'a amik kelucaumauq, irniama-llu qavallguciatnga, makcesciigatua cikirnaluten.’

⁸Qanrutamci, makcunrilnger'mi yugnikucia pitekluku, tau͡gaam taqsuariucia pitekluku makciiquq, cikirluku-llu piyugtaciatun.

⁹Tuaten cali qanrutamci: Kaigaci, tua-i cikiumaciquci, yuarci, nataqutnaurtuci, tukriaqici, tua-i ikirucimaciquci.

¹⁰Wani-wa kina imna kaigalria cikiumalartuq, kina-llu imna yualria nataqut'lartuq, kina-llu tukrialria ikirusngaluni.

¹¹Nalirpeci ataulriim qetunrani keliparyukan, teggalqumek cikirciqau, wall'u neqyukan, ciissirpagmek cikirluku?

¹²Wall'u peksuryukan, puukatulimek ciissimek cikirciqlia?

¹³Atam, elpeci elluatuunrilngerpeci, irniaci assilrianek cikiryuumilaraci, qaillun-mi amllenrulriamek atavci qilagmelnguum cikirciqaki kaigavikesten̄i Anernermek Tanqilriamek.”

¹⁴Anernerrluk-llu qanyuilnguq anevkaraa, anernerrluk-llu anumarian, qanyuilnguq qallacaurtuq; yugugaat-llu irriut.

¹⁵Tau͡gaam ilait qanertut, “Anernerrluut atanratgun anernerrluut anevkalarai.”

¹⁶Allat cali, naspaagaat nallunailkutmek qilagmek tangerrsugluteng.

¹⁷Umyugait nallunrilamiki, qanrutai, “Angayuqauviim yui ellmeggnun inglukuskuneng angayuqauvik piunrirarkauguq, enelgutkelriit-llu inglukuskuneng uitangaitut.

¹⁸Tua-i-llu tuunrangayak ellminek inglukekuni, qaillun-mi angayuqauvingqerciqa? Tua-i qanravci anernerrluut atanratgun anernerrlugnek anevkarinilua.

¹⁹Tua-i-llu wiinga anernerrluut atanratgun anernerrlugnek anevkarikuma, nau͡gg'un qetunrarpeci anevkalartatki? Taumek ellait cuqcistekciqaci.

²⁰Tau͡gaam wiinga Agayutem piniakun anernerrlugnek anevkarikuma, Agayutem angayuqauvian malkaniumaaci.

²¹Tau͡gaam yuum pinilriim caskungqerrluni eneni tarikekuniu aklui uitaarkaugut cavkenateng;

²²cali tau͡gken elliini pininrulria tekiskan cirlakluku-llu, saskuinek teguiciqaa cacetuqutekellrinek akluinek-llu uayarluku.

²³Kina imna ilikenrilkeka, taum inglukaanga, kina-llu imna quyurcillgutkenrilkeka sekavcilartuq.

²⁴“Anerneq caarrluulria yugmek an'aqami, kinernerkun ayalartuq uitanqegcillerkarcurluni, nataqutenrilami-llu qanerciquq, ‘Uterrlii enemnun anllemnun.’

²⁵Tekiskuniu-llu tangerciqaa elluarluni carrinqeggluni.

²⁶Nutaan ayagciquq ilakarcurluni anernerrlugnek malrunlegnek ellmini arcaqanrulrianek, iterluteng-llu uitavikluku. Tua-i-llu taum yuum ayuqucia kinguqliq arcaqanruarkauguq ciuqlirmi.”

²⁷Makunek-llu qallasnginanrani, yugugaat iliit arnaq qayagpagtuq qanrulluku, “Atawauvaa tauna elpenek qingalleq, elpenek-llu aamarcilleq!”

²⁸Tua-i-llu qanertuq, “Atam waten tau͡gaam, atawaugut imkut Agayutem qaneryaraanek niitellriit aturluki-llu!”

²⁹Yugugaat quyurrvikngatni qalarutai, “Ukut yuullgutkelriit caarrlugmi yuullgutkut. Nallunailkutamek yuartut, tau͡gaam nallunailkutamek pimangaitut, Jonah-m prophet-aam pianek tau͡gaam.

³⁰Jonah nallunailkutaullertun Nineveh-rmiunun, tuaten-llu Yuum Qetunraa nallunailkutaugarkauguq ukunun yuullgutkelrianun.

³¹Sheba-m atanran arnam ukut yuullgutkelriit qanercetaarvigmi nangengqallgutekciqai assiilkelluki-llu, tua-i ellii nunam iquanek taillruami Solomon-aam umyuartutacia niitnaluku, tangerrluku-llu Solomon-aam angenra maantuq.

³²Nineveh-rmiut-llu ukut yuullgutkelriit qanercetaarvigmi nangengqallgutekciqait assiilkelluki-llu, tua-i umyuarnayagucillruameng Jonah-m qalarucateng, tangerrluku-llu Jonah-m angenra maantuq.

³³“Yuum-wa kenurraq kumareskuniu enem atlianun ellingaitaa, wall'u yaassiigem acianun, tau͡gaam kenurrarvigmun elliciqaa itellrianun tanqia tangrresqelluku.

³⁴Iin temvet kenurraqaa, takvikuni iin temen-llu tanqigmeciiquq, tau͡gaam takvialkuni temen-llu tan'germeciiquq.

³⁵Taumek tanqik elpenelnguq murilkiu tan'geruyuartuq.

³⁶Taumek temen tamalkuan tanqigimakuni tan'gertaunani-llu ilii, tua-i tamarmi tanqigmeciiquq imutun kenurratun tanqigcen̄ani kumalriatun tanqigingaluten.”

³⁷Qallasnginanrani Pharisee-aam neryartuusqaa; elliin-llu maligtaa aqumluni-llu stulumi.

³⁸Erurraanrilucia Pharisee-aam elpekngamiu alangaartuq.

³⁹Atanrem-llu qanrutaa, “Elpeci Pharisee-aani saskat qantat-llu elatait nallaitgun erularaci, tau͡gaam elpeci umyuarpeciuggun tegleganeq caarrliqutmek-llu imalguuci.

⁴⁰Elpeci usviilngurni! Elatiin-qaa piurcestiin ilua cali piurtellrunritaa?

⁴¹Tau͡gaam ilua carrirraarciu, nutaan, cat tamarmeng carriumaciqut elpecen̄un.”

⁴²“Tau͡gaam, nakleng elpeci Pharisee-aani! Naucetaat qulngurutiit elliitekautek'laavciu, piciuneq-llu Agayutmek-llu kenkiyaraq tuacesqinarluku. Tamana aturarkauyaaqerci, ukut-llu tuacesqinarpek'naki.

⁴³Nakleng elpecen̄i Pharisee-aani! Agayuvigmi aqumlleret kiaqliit aqumviksulaavciki, tuneniarvigni-llu pivakesqumalaavci.

⁴⁴Nakleng elpeci! Qungutun alaitenrilngurtun ayuqngavci, tamakut yuut tutmalarait nalluluki.”

⁴⁵Alerquutnek elisngalriit iliita kiugaa, “Elitnauristaa, makunek qallalluten wangkuta-llu cali assiilkem̄iarpekut.”

⁴⁶Qanertuq-llu: “Nakleng elpeci-llu! Yuut qugcet'laavciki quukatayunailngurnek, elpeci tau͡gken unatevcen̄ek yaggviksugpek'naki.

⁴⁷Nakleng elpeci! Prophet-aat qunguit piliaqelaavciki ciuliarpeci tuqutellrit.

⁴⁸Tamaaggun nallunailartuci ciuliarpeci caliarit canrilkelluki, tua-i ellaita tuqutellruitki, elpeci-llu qunguit piliaqluki.

⁴⁹Taumek Agayutem Umyuartutacia waten piuq, ‘Ellaitnun prophet-aanek apostle-aanek-llu ayagceciciqua, tua-i-llu tamakut ilait inglukluki tuquciiqait.’

⁵⁰Tua-i prophet-aat tamarmeng augat, nunam piurtellran kinguakun kuvumalria ukunun yuullgutkelrianun tut'esqelluku.

⁵¹Wani-wa Abel-aam auga ayagniutekluku Zacharias-aam auga engelkarrluku, tauna piunrilleq ekuaviim agayuviim-llu akunliigni. Ilumun, qanrutamci, ukunun yuullgutkelrianun tamana tusngaarkauguq.

⁵²Nakleng elpeci alerquutnek elisngalriani! Ayuqucingnam kelucaa iiravciu. Elpeci itenrituci, iteryuumilriit-llu itercetenritaci.”

⁵³Tuaken-llu anngan igatulit Pharisee-aat-llu apqauraat ilungluteng tamanek, qanercetaangnaqluku,

⁵⁴kellutqapiggluku qancurlallerkaanek.