Read Yupik Luke 12 Bible Online

Luke 12 - Yupik bible

Luke 12

¹Tua-i-llu yugugaat amlleret quyurtengata ilateng tuaten tutmarluki, elitnaurani ciumek qanrutai, “Mulngakici Pharisee-aat quulciiraatnek, wani-wa malrugnek umyuangqerruciatnek.

²Wani-wa patumalriartaituq patuirumangailngurmek, iirumalriartaunani-llu elpekumangailngurmek.

³Taumek tan'germi qanllerci tanqigmi niicimaarkauguq, agyumcilci-llu enecuarmi, enet qaingatni qayagaurutnguciqut.

⁴“Qanrutamci-llu, yugnikekmaa, yuum temiinek tuqucilria alikenriciu, allamek pinqiggviilan.

⁵Tau͡gaam apertuutnaamci alikarkarpecen̄ek, alikiciu, tauna tuqucirraarluni egciyugngalria kenermun nipsuilngurmun. Ataam qanrutamci, alikiciu tamana!

⁶Yaquliyagaat-qaa talliman tunumaksaitelartut akicuaraagnun? Atauciunger'mi-llu nalluyagucimangaituq Agayutmi.

⁷Tuaten-llu qamiquvcen̄i nuyat naaqumaut. Alingenrici, qununarqenruqapigtuci yaquliyagarugarni.

⁸“Qanrutamci-llu, kina imna wangnek qanrutkilria yuut ciuqerratni, tauna Yuum Qetunraan cali qanrutekciqaa Agayutem an'gilain ciuqerratni.

⁹Tau͡gaam aassaqutekesteka yuut ciuqerratni tauna cali aassaqutekumaarkauguq Agayutem an'gilain ciuqerratni.

¹⁰Kia-llu imum Yuum Qetunraa piciliutekekuniu, tauna au͡g'aricimaarkauyaaquq, tau͡gaam Anernerem Tanqilriim piciliutekestii au͡g'aricimangaituq.

¹¹Tua-i-llu ayauskaceci qaillukuarvignun, atanrulriit piuranrit-llu ciuqerratnun, umyuarrlugcaryaqunaci qaillun kiugarkaucirpecen̄ek, wall'u qallatarkaucirpecen̄ek.

¹²Tua-i tuani Anernerem Tanqilriim ayuqucirturciqngaci qaneryararkarpecen̄ek.”

¹³Yugugaat-llu iliita qanrutaa, “Elitnauristaa, amaqliqa qanrusgu paitarkanek avgucesqellua.”

¹⁴Tau͡gaam qanrutaa, “Usuuq, kia picirkirtanga cuqcisten͞gusqellua wall'u avgisten͞gusqellua elpecen̄i?”

¹⁵Qanrutai-llu, “Murilkici, ciknayaramek, tua-i yuum akluni amllengraata unguvatekngailaki.”

¹⁶Cuqyutmek-llu qalarutai, “Tukuulriim naucetaarvia naugillruuq amllernek.

¹⁷Ellminek-llu qaillukuartuq qanerluni, ‘Qaillun piciqsia, naucetaanka qemaggviilata?’

¹⁸Qanerluni-llu, ‘Waten pikilii. Qemaggviinka itumlluki angenritnek pililii. Nutaan qemaggvingqerciqua mukaarkamnun aklumnun-llu.

¹⁹Nutaan tarnemnun qanerciqua, Tarnemaa, aklungqerrarkauguten ak'anun, cakviurpek'nak nerlaqina mer'aqluten-llu, angnirrlainarluten-llu.’

²⁰Tau͡gaam Agayutem qanrutaa, ‘Usviilnguuq! Mat'umi unugmi anernerpenek teguimaarkauguten, aninqelten-llu kia pikciqaki?’

²¹Waten ayuqelartuq tukuutminek aninqilria, Agayutmi tau͡gken caunani.”

²²Elitnauraminun-llu qanertuq, “Umyuarrlugcaryaqunaci yuullerkarpecen̄ek, nerrlerkarpecen̄ek, qaivcen̄un-llu aturarkarpecen̄ek.

²³Tua-i unguva qununarqenruuq neqkani, tema-llu aturarkani.

²⁴Atam, tulukaruut umyuaqiciki, nauceciiyuitut, quyurciiyuunateng-llu, qemaggviinateng elliviinateng-llu, tau͡gaam Agayutem nerevkalarai. Tualli-wa elpeci qununarqenrulriaci yaqulegni!

²⁵Kia nalirpeci umyuarrlugcarallermikun angtacini usguciqau?

²⁶Tua-i-llu arcaqanrilnguut caperqekuvciki, ciin umyuarrlugcarpakalarceci allanek?

²⁷Umyuaqiciki naunraat tangerrsunarqelriit, qaillun naulauciat cakviuyuunateng, tupiyuunateng-llu, tau͡gaam qanrutamci, Solomon-aam ucurnarqucirtuumarmi ayuqenritai tamakut.

²⁸Tua-i-llu Agayutem naunrat marametellriit, ernerpak naulriit, unuaquan-llu muriusngaarkauluteng, aturangqercecamiki, nutaan nallunaunani aturangqerceciiqaaci elpeci ukverkilngurni!

²⁹Cumigutkenriciu-llu nerrlerkarci mell'erkarci-llu, umyuarrlugcarpek'naci-llu.

³⁰Tamakut ukvenrilnguut cumrutek'larait, tau͡gaam atavci nallunrit'larai tamakut aturarkaci.

³¹Tau͡gaam, cumiguciu elliin angayuqauvia, tamakunek-llu piilngaituci.

³²Alingenrici, quyungqakuinralriani, Atavci cikiryuumiraaci angayuqauviminek.

³³Tuniciki caci tamalkuita cikiutekluki, akiviutangqerrnaurtuci ak'allaurcuilngurnek, tukuutekamek-llu qilagmelngurmek nangyuilngurmek, teglengalriim tekicunailkiini parum-llu piunrirngailkiini.

³⁴Tukuuceci nanelkan, ircaqurci-llu tuanciiquq.

³⁵“Naquggluci upingaci, kenurraci-llu kumavkarluki.

³⁶Elpeci ayuqnaurtuci angucetun atanermeggnek kassuucaram nerevkaritiinek uterteqatalriamek utaqalgilriatun, tua-i tekilluni tukriaqan egmian ikirucuumaluku.

³⁷Atawaqertut taukut pistet Atanrem tekiskateng murilkelriit; ilumun, qanrutamci, ellminek naquggluni nerevkarciqai tungaunani neqliurluki.

³⁸Pegg'aryaram aipaani, wall'u pingayuatni tuaten tekiskaki, atawaqertut taukut!

³⁹Tau͡gaam man'a nallunriciu, teglengalriim sass'ami taumi teglegyartullerkaa, enem yuan nallunrilkuniu murilkessartuq eneminek ikircivkarpek'naku.

⁴⁰Elpeci-llu upingaci, Yuum Qetunraa tekitarkaungan sass'ami umyuaqenrilkevcen̄i.”

⁴¹Peter-llu qanertuq, “Ataneq, wangkutnun-qaa tau͡gaam cuqyun man'a qanrutkan, wall'u tamalkuitnun?”

⁴²Ataneq-llu qanertuq, “Kina-mi tauna piciuluni ellatuluni-llu pisten͞gua, atanrem pistem̄inun qaunqesten͞gurtarkaa, pikaitnek cikilararkauluki nerrlerkaat pinariaqan?

⁴³Atawaqertuq pista tauna tuaten pikuni atanemi tekiskani.

⁴⁴Ilumun, qanrutamci, piminun tamalkuitnun qaunqesten͞gurciiqaa.

⁴⁵Tau͡gaam pista tauna umyuamikun qanqan, ‘Ataneqa muluuq,’ pisten͞gullgutni-llu kaugtuangluki, ner'aqluni, mer'aqluni, taangiqluni-llu.

⁴⁶Tua-i pistem taum atanra tekiciiquq ernermi umyuaqenrilkiini sass'ami-llu taum nallukiini. Piqerturciqaa-llu, piciunrilngurnun-llu ilakevkarluku.

⁴⁷Pista-llu tauna atanermi pisqutii nallunrilngermiu, upcimavkenani pisqutii-llu aturpek'naku, piqertuarumaarkauguq cakneq.

⁴⁸Tau͡gaam nalluyurcilria, pinarqelrianek atunge'rmi, cakneq piqertuarumangaituq. Amllermek cikiumalria pisqumanruarkauguq, cali-llu aulukinruvkaumalleq pisqumanruarkauluni.

⁴⁹“Tekitua keneq nunamun tuc'etnaluku, qaillun-llu piciqsia ak'a kumangumarikan?

⁵⁰Angllurvigkangqertua angllurarkaulua. Uivagcilaryaaqua qaqitellerkaanek.

⁵¹Umyuartequci-qaa nepaitmek tekiucuklua nunamun? Qang'a, tuaten pinritua, tau͡gaam inglukucaramek.

⁵²Wak'nirnek enemelnguut tallimaukuneng, pingayun malruk inglukciqagket, malruk-llu taukunun ingluliullutek.

⁵³Ayuqenriqerciiqut-llu inglukulluteng, atiin qetunrani qetunraan-llu aatani, aaniin-llu panini panian-llu aanani, cakian-llu ukurrani ukurriin-llu cakini.”

⁵⁴Yugugaat-llu qanrusmii, “Kanaknerem tungii amirlutangaqan, tangrrucirpeciuggun qanlartuci ellallungqatarniluku. Tuaten-llu pilartuq.

⁵⁵Ungalamek-llu anuqlirqan qanlartuci kiircetqapigciiqniluku. Tuaten-llu pilartuq.

⁵⁶Elpeci malrugnek umyualegni! Nunam qiliim-llu ayuqucia nallunritarci, tau͡gaam qaillun piluci kangingenriceciu mat'um nallii?

⁵⁷Ciin-llu elpecen̄ek cuqteksaiceciu elluaq piarkarci?

⁵⁸Tua-i inglun kenegyagutengnaqiu cuqcistem̄un ullautellerpetegni, cuqcistem̄un tunyuaraaten, cuqcistem-llu anguyagtem̄un, anguyagtem-llu itercivigmun itertelluten.

⁵⁹Qanrutamken, tuaken anngaituten anucimirqecetaarutem akilitlerkaan engeliinun.”