Read Yupik Luke 14 Bible Online

Luke 14 - Yupik bible

Luke 14

¹Cat iliitni Sabbath-aami Pharisee-aat iliita atanrulriim eniinun itellrani neryarturluni, tarikaat.

²Tangerrluku-llu, tuantuq yuk puvmek naulluutelek.

³Jesus-aam-llu alerquutet elisngastait, Pharisee-aat-llu aptai, “Atam, Sabbath-aami-qaa yungcariyunaituq?”

⁴Tau͡gaam taukut kiuyunritaat. Tua-i teguluku canrircetaa ayagtelluku-llu.

⁵Taukut-llu qanrutai, “Ilavci-qaa, ciulvani wall'u kuluvani elakamun igeskan, egmian nugcarturngaitaa agayunrungraan?”

⁶Kiutekaitut cali mat'umun.

⁷Tua-i-llu neryartuusqumalriit elpekngamiki kiaqsissaalriit, cuqyutmek qalarutai,

⁸“Kassuucaram nerevkaritiinun neryartuusqumakuvet, kiaqsissaagpek'nak aqumekina, tua-i elpeni takarnanrulria kelgumayuartuq,

⁹kelegtevvet-llu ullagluten piyuaraaten, ‘Avisgu una,’ tua-i elpet kiaresngianak uaqlirnun nugtarciiquten.

¹⁰Tau͡gaam neryartuusqumakuvet, uaqlirnun aqumekina, kelegtevvet-llu ullagluten qanrucuaraaten, ‘Yugnikekmaa, kiavarluten,’ nutaan nerellgutevni pikegtakumaciquten.

¹¹Tua-i kina imna ellminek pivakellria caunrilkumaarkauguq, nutem-llu ellmikutuulria pivakumaarkauluni.”

¹²Kelegten̄i-llu qanrutaa, “Nerevkarikuvet apiatami, wall'u atakumi, yugnikekten wall'u ilaten, wall'u tungelquten, wall'u nunalguteten tukuulriit, nallaitgun kelenrilngerpeki, tua-i ellaita cali kelegyuaraatgen akinaurluten.

¹³Tau͡gaam elpet nerevkarikuvet, caitulriit, mangamculriit, tussitellriit, cikmiumalriit-llu kelegki.

¹⁴Nutaan atawaqercecimaciquten, tua-i taukut akinaurngailatgen. Elpet-llu nunuliumaciquten ellualriit makyutiitni.”

¹⁵Tamana nerellgutain iliita niicamiu qanrutaa, “Atawaqertuq kina imna ner'arkaq Agayutem angayuqauviani!”

¹⁶Tau͡gaam qanrutaa, “Yuk angelriamek nerevkarillruuq, amllernek-llu kelgiluni.

¹⁷Tua-i-llu pinarian pisten̄i ayagcetai neryartuusqumalriit qanrucesqelluki, ‘Taici, cat tamarmeng upingariata.’

¹⁸Tau͡gaam tamarmeng ayuqluteng avalissa'artut. Ciuqliim qanrutaa, ‘Naucetaarvigmek kipucama, tangerrsartuqatarqa, kaigavikamken, qanerniaruskia.’

¹⁹Allam-llu qanrutaa, ‘Kuluviit akiqliqarkat tallimainguluki kipucamki, naspaaqataranka, kitaki, qanerniaruskia.’

²⁰Allam-llu qanrutaa, ‘Nulirtuama, taisciigatua.’

²¹Pista-llu tekituq makunek apervikualuku ataneni. Tua-i-llu enem atanra cangayuami pisten̄i qanrutai, ‘Patagmek ayagci tumyaranun pekcaranun-llu, taivkarluki caitulriit, mangamcuulriit-llu, cikmiumalriit-llu tussitellriit-llu.’

²²Pista-llu qanertuq, ‘Pisqucin pimauq, tau͡gaam cali pivingqertuq.’

²³Tua-i-llu atanrem pista qanrutaa, ‘Ayii pekcaranun yaaqvalircaranun, kilganun-llu, yuut eguaqurluki, eneka yugyaasqumiimku.’

²⁴Tua-i qanrutamci, kelgumalriit imkut nerevkariteka uigngaitaat.”

²⁵Yugugaat yugyakapiggluteng maligtaat, elliin-llu tuiggvikluki qanrutai,

²⁶“Yuum ullakunia tau͡gaam atani aanani-llu, nuliani-llu irniani-llu, anelgutni-llu arcaqakekuniki, unguvani-llu cali tuaten, tauna wiinga elitnauraqngaitaqa.

²⁷Kia-llu kelistani qugluku maligtenrilkunia, elitnauraqngaitaqa.

²⁸Tua-i ilasi, eneliyukuni qertulriamek, ciumek-qaa akingqerrarkaucia cuqteksaitelaraa, akikairutnayukluni taqvailgan?

²⁹Tua-i inguqirirraarluni, tau͡gaam taqesciiganaku, tangvagtain temciarautekciqaat,

³⁰qanraqluteng, ‘Una yuk eneliyaaquq, tau͡gaam taqesciigataa.’

³¹Angayuqaq-llu anguyagterluni tiissitsaanek qulnek, ayakuni angayuqaullgutni anguyautnaluku, tau͡gken tauna anguyagterluni tiissitsaanek yuinarnek, qaillukuarngaituq-qaa cirliqenritlerkaminek?

³²Caperqekuniu-llu, mallgupailgan ullagceciiqaa kaigavikluku nepaitellerkaminek.

³³Taumek, kia imum nalirpeci pini tamalkuita pegcuumiilkaki elitnauraqesciigataqa.

³⁴“Taryuq assirtuq, tau͡gaam taryurninairuskan, naken taryurninariciqa?

³⁵Atuqaunrituq nunamun-llu nauturnircautnguvkenani, ciqicimaarkauguq tau͡gaam. Kina imna niitetuli, niilli!”