Read Yupik Luke 2 Bible Online

Luke 2 - Yupik bible

Luke 2

¹Tamatum nalliini pillruuq Caesar-aam Augustus-aam picirkiullrukai tamiini nunalget naaqumasqelluki.

²Man'a naaqumallrat ciuqliq pillruuq Cyrenius-aaq atanrullrani Syria-mi.

³Tamarmeng-llu naaqevkaryarturtut, kina imna tuani ciuliamikun nunangqellria.

⁴Tua-i Joseph-aaq-llu mayurtuq Galilee-amek nunaminek Nazareth-aamek, Judea-mun David-aam nunallranun Bethlehem-aamek at'legmun,

⁵naaqutngunaluni, Mary-llu nulirkautni, malikluku. Tauna-llu qingarluni.

⁶Tua-i-llu tuantellermegni, irnillerkaa pinariuq.

⁷Wani-wa irniqarraartuq qetunrangluni, imgulluku-llu essaumalriamun 'lumarrarmun, ungungssit-llu nerviatnun elliluku, allanivigmi enailamek.

⁸Tamatum-llu avatiini qusngiliurtet uitaut maramelluteng, pegg'arluteng katngauteteng tarikluki unugmi.

⁹Tua-i-llu Atanrem an'gilaan tekitai, Atanrem-llu ucurnarqucian tanqigtai, ellait-llu alingallagtut.

¹⁰An'gilam-llu qanrutai, “Alingevkenaci, atam, angnirnarqelriamek niicetqataramci angniqapigutekarpecen̄ek, yuut tamarmeng pikaatnek.

¹¹Elpecen̄un David-aam nunallrani ernerpak Anirturilria yuurcan, tauna Christ-auguq Ataneq.

¹²Man'a-llu nallunailkutkarkaugarci: mikelnguq nataqeciqerci 'lumarrarmun essaumalriamun imgusngaluni ungungssit-llu nerviatnun ellimaluni.”

¹³Alqunaq-llu an'gilaq tauna ilanguq qilagmiurugarnek; taukut Agayun nanraraat qanerluteng,

¹⁴“Ucurnarili Agayun quyinermi uitalria, nunam-llu qaingani uitanqegcicetangqerrli yug'ni nakmikek'ngaini!”

¹⁵Taukut-llu an'gilat qilagmun ayiita, qusngiliurtet qanruyutut, “Ataki Bethlehem-aamun ayiilta, tamana Atanrem wangkutnun nallunrircetellra paqluku.”

¹⁶Tua-i patagmek ayagtut, tamalkuita-llu nataqait, Mary, Joseph-aaq-llu, mikelnguyagaq-llu ungungssit nerviatni ellimaluni.

¹⁷Tangrramegteggu-llu ellmeggnun qanrutkumalleq tauna mikelnguq pitekluku, qanrutkaat.

¹⁸Niitellriit-llu tamarmeng qusngiliurtet qanellrat irr'ikaat.

¹⁹Tau͡gaam Mary-m tamakut qaneryarat tamalkuita qemagtai, umyuaqurluki-llu ircaqumikun.

²⁰Taukut-llu qusngiliurtet utertut, Agayun ucuqluku nanrarluku-llu, niitelteng tangelteng-llu tamalkuita pitekluki, qanrucimacimegcetun.

²¹Erenret-llu pingayunelgurcata nuugirnarian aciraat Jesus-aamek, an'gilam acillruciatun aaniinun qingaurpailgan.

²²Menuircaryaram erenri nang'ata Moses-aam picirkiutai maliggluki, Jerusalem-aamun taitaat Atanermun tunenaluku.

²³Atanrem alerquutaini igaumaciicetun: “Mikelnguut tamalkuita tan'gaurluut aanameggnek anqerraalriit Atanermun qigcikumaarkaugut,”

²⁴elliiteknaluku Atanrem alerquutaini pisqumalria aturluku, wani-wa kanguruarngalnguugnek malrugnek.

²⁵Jerusalem-aami angucetangqellruuq, Simeon-aamek, tauna ellualriaruluni qigcigyulriaruluni-llu; Israel-aat-llu qaruyutkaat utaqaa, Anernerem-llu Tanqilriim tusvikumaa.

²⁶Anernerem-llu elpengevkallrua Atanrem Christ-aara tangerpailegmiu tuquarkaunrilucianek.

²⁷Ellii-llu Anernerem pisquciatun agayuvigpagmun itertuq; taukuk-llu angayuqaagken mikelnguq taican'gu piciryaraicetun pinaluku,

²⁸tuani taum tegua Agayun-llu nanrarluku qanertuq,

²⁹“Nutaan, Ataneq, pisten ayagceskiu uitanqegcimaluku, qanrucirpetun.

³⁰Tua-i iigma anirturiten tangellruak,

³¹uptellren yuut tamarmeng takuatni.

³²Wani-wa Jews-aarunrilnguut tanqiutekaat, yugpet-llu Israel-aat nanrautekaat.”

³³Atiin aaniin-llu, ellii pitekluku qanrutkumalriit irr'ikakek.

³⁴Simeon-aam-llu atawaqaasqak, aanii-llu Mary qanrulluku, “Tangerrluku, una mikelnguq ellimauq Israel-aat amlleret paallautekaatnek, amlleret-llu cali makyutkaatnek, qanemyuugautekciqaat-llu nallunailkutauluku.

³⁵Ilumun-llu panam tarnen kapciqaa, amlleret ircaqruita umyugait nallunairluki.”

³⁶Tuantuq-llu prophet-aaq arnaq, Anna, Phanuel-aam pania, Aser-aam kinguvra. Tauna arnaurtuq, neviarcaullermi kinguani uingqellruuq allrakuni malrunlegni,

³⁷aipainruluni-llu allrakuni yuinarni cetamani cetamanek cali cipluki. Taum agayuvik uniteksaitelaraa, piicagqami-llu nereksaunani kaigluni unugni ernerni-llu pinaurtuq.

³⁸Nall'arrluki taiguq, Agayun-llu quyavikluku, Jerusalem-aam-llu anirtuutekaanek utaqalgilriit elliinek qalarutai.

³⁹Tua-i-llu Atanrem picirkiutai atuumariamegneki Galilee-amun nunameggnun Nazareth-aamun utertut.

⁴⁰Mikelnguq-llu angliuq, piniriluni-llu, usvituriluni-llu, Agayutem-llu naklekutiin nayuraa.

⁴¹Angayuqaak-llu Jerusalem-aamun allrakuaqan ayalartuk Agayunerpaliyarlutek.

⁴²Ellii-llu qulen malrugnek cipluku allrakungan, malikluku ayagtuk Jerusalem-aamun, Agayunerpaliyalriit pilauciicetun.

⁴³Agayunerpak-llu pelluumarian, utercagnek-llu, Jesus-aaq tan'gaurluq unegtuq Jerusalem-aamun, tau͡gaam angayuqaagken nalluluku.

⁴⁴Tua-i yuut akunliitnecukluku tungelqumegni ilamegni-llu yuaryaaqaak ernerpak,

⁴⁵nataqenrilamegnegu Jerusalem-aamun utertuk yuarluku.

⁴⁶Tua-i-llu erenret pingayun kinguatni nataqaak Agayuvigpagmi, elisngalriit akuliitni aqumgaluni taukut niicugluki, aptaqluki-llu apyutnek.

⁴⁷Tamarmeng-llu niitestain irr'ikaat umyuartucianek kiulallrinek-llu.

⁴⁸Tangrramegnegu irriuk; aaniin-llu qanrutaa, “Qetunraaq, ciin waten pisikuk? Tangerrluku, atavet wiinga-llu yuaramegten peng'garrluten.”

⁴⁹Elliin-llu qanrutak, “Ciin yuarcetegnga? Nalluutek-qaa Atama eniini uitaarkaucimnek?”

⁵⁰Ellmegnun-llu qanellra ayuqucingenritaak.

⁵¹Tua-i maligglukek Nazareth-aamun atrartuq, niisngalukek maligtaqulukek-llu. Aaniin tau͡gaam makut qanellri ircaquminun qemagtai.

⁵²Jesus-aaq-llu elisngiinartuq, angliriinarluni-llu, Agayutem yuut-llu nakmikngiinarluku.