Read Yupik Luke 20 Bible Online

Luke 20 - Yupik bible

Luke 20

¹Erenret-llu iliitni, agayuvigpagmi qaneryaraqegtaarmek elicungcarillrani, agayulirten͞gunret igatulit-llu yuut-llu ciulirnerita ullagaat,

²apluku-llu, “Qanruskut qaillun ayuqelriamek piyunarqucingqerrluten waten pilarcit, kia-llu piyunarqucingqerceskiiten waten pilarcit?”

³Jesus-aam kiugai, “Wiinga-llu apciiqamci ataucimek, kiucia.

⁴John-aam angllurceciyaraa naken piurtellrua, qilagmek-qaa wall'u yugnek?”

⁵Tua-i qaillukuartut qanruyulluteng, “Qilagmek pillrunikumteggu, tua-i qanerciquq, ciin-mi ukveqenriceciu?

⁶Tau͡gaam yugnek pillrunikumteggu, yuut tamarmeng teggalqunek miluquciqaitkut, tamarmeng John-aaq ilumun prophet-aaruyukngatgu.”

⁷Kiugaat-llu, “Naken piciitarput.”

⁸Jesus-aam-llu qanrutai, “Wiinga-llu qanrusngaitamci qaillun ayuqelriamek piyunarqucingqerrlua waten pilaucimnek.”

⁹Yuut-llu cuqyutmek mat'umek qalarutai, “Yuk naucetaarvilillruuq nauceciiyurten̄un-llu navriutekluku, ellii-llu nunamun allamun ayagluni tuani uitamanaluni.

¹⁰Tua-i-llu atsangyaraan nalliini, ayagceciuq pistem̄ek nauceciiyurten̄un, wine-at atsaita ilaitnek cikiisqelluku; tau͡gaam nauceciiyurtet piqertuaraat camek-llu unangevkarpek'naku.

¹¹Cali pista alla ayagcetaa, tauna-llu piqertuaraat kasngunarqelriamek-llu piluku, unangevkarpek'naku.

¹²Pingayuat-llu cali ayagcetaa, tauna-llu kilirturaat cingqaquluku-llu anevkaraat.

¹³Tua-i-llu naucetaarviim yua qanertuq, ‘Qaillun piciqsia? Qetunraqa kenkek'ngaqa ayagceciiqaqa, tauna takaqciqliat.’

¹⁴Tau͡gaam nauceciiyurtet tangrramegteggu qaillukuartut, qanruyulluteng, ‘Wani-wa paitangqerrarkaq, kitaki tuqullaut, paitarkaa-llu wangkuta pikniarput.’

¹⁵Naucetaarvigmek-llu cingqaquat tuqulluku-llu. Tua-i-llu naucetaarviim yuan qaillun piciqaki taukut?

¹⁶Tekiciiquq nauceciiyurtet-llu taukut piunrirciqai, naucetaarvik-llu allanun tunluku.” Man'a niicamegteggu qanertut, “Agayutem pivkanrilliki tuaten!”

¹⁷Tau͡gaam elliin tangvagluki qanrutai, “Cauga-mi imna igaumalria waten, ‘Teggalquq enelilriit qessakellrat kangiritkaurtellruuq?’

¹⁸Kina imna teggalqumun taumun ayaluqertellria navgurciquq, tau͡gaam iggvikekni ciqumteqapigciiqaa, urr'atun-llu skavvluku.”

¹⁹Sass'am-llu taum nalliini, igatulit agayulirten͞gunret-llu elpengameng cuqyutkun mat'ukun elliinun qanrutkucirteng, tegungnaqsaaqaat, tau͡gaam yuut alikait.

²⁰Kellutekaat-llu, ayagcelluki-llu kelguurtekat, taukut elluaruangnaqluteng qanellrikun napcetengnaqesqelluku, nutaan-llu nunam atanran pinianun piyunarqucianun-llu tunenaluku.

²¹Tamakut-llu aptaat, “Elitnauristaa, wangkuta nallunritarput elluarrluten qallatelaucin elicungcarilaucin-llu, yuum-llu taungucianek catkinrilucin, tau͡gaam ilumuuluten Agayutem tumyaraqesqellra apertularan.

²²Caesar-aaq-qaa akiliqurautnek cikirluku elluartuq? Wall'u-qaa elluanrituq wangkutni?”

²³Tau͡gaam Jesus-aam usvitungnaquciat elpekngamiu, qanrutai,

²⁴“Akimek akiliqurautngutulimek nasvicia, kia una ayuqau, kia-llu igautellri ukut?” Kiugaat, “Caesar-aam-wa.”

²⁵Nutaan qanrutai, “Caesar-aam pia Caesar-aamun tunlarciu, Agayutem-llu pia Agayutmun tunluku.”

²⁶Tua-i qanellrakun yuut takuatni napcesciigataat, kiutiinek-llu irriameng nepaitut.

²⁷Tua-i-llu Sadducee-aat, imkut maktellerkartailucianek qanlalriit ullagaat,

²⁸apluku-llu, “Elitnauristaa, Moses-aam picirkiraakut waten; angutem anngaa tuqukan nuliani-llu irniarunaku uniskaku, tua-i kinguqlian tauna kingunra teguarkauluku anelgutni kinguverkiurnaluku.

²⁹Cat iliitni malrunlegnek amaqliqelriartangqellruuq; ciuqliat nulirturtuq, tuquluni-llu kinguverkaunani.

³⁰Tunglian-llu tuaten pia.

³¹Pingayuata-llu tegua, tuaten-llu taukut malrunlegen piut, kinguverkaunateng ayuqluteng tuqullruut.

³²Kinguatgun-llu arnaq cali tuqullruuq.

³³Tua-i-llu makcarami, kia taukut naliata nulirqeciqau? Wani-wa taukut malrunelgen nulirqellrukiit tamarmeng.”

³⁴Jesus-aam qanrutai, “Nunam mat'um yui kassuutelartut, kassuuciaqluteng-llu,

³⁵tau͡gaam imkut nunakamun taumun piyunarqelriit tuqumek-llu maktarkaulriit kassuusngaitut, kassuucingaunateng-llu.

³⁶Tuqunqiggngaitut, an'gilacetun ayuqciqut, Agayutem-llu irniaqai makcaram irniaqngaki.

³⁷Tua-i tuqumalriit maktarkauciat Moses-aam qanrutkellrua tuani culu'ugtarmek napayaarmek, qanrutkaa Ataneq waten qanerluni, ‘Abraham-aam Agayutii, Isaac-aam-llu Agayutii, Jacob-aam-llu Agayutii.’

³⁸Wani-wa tuqumalriit Agayutkenritaat, tau͡gaam unguvalriit Agayutkaat, tamarmeng elliinun unguviita.”

³⁹Tua-i-llu igatulit ilait qanertut, “Elitnauristaa, nutaan qanluaqertuten.”

⁴⁰Aptenqigtellerkaanek-llu caperrsaguciut.

⁴¹Elliin-llu qanrutai, “Qaillun yuut qanlartat Christ-aq David-aamun qetunraqniluku?

⁴²Tua-i David-aaq tungaunani qanran kalikani piicautellegni, ‘Ataneq Atanemnun qanertuq: Tallirpima tungiinun aqumi,

⁴³inglukesteten it'gavnun tutmararkaurcetlerkamnun.’

⁴⁴Wani-wa David-aam Atanerminek tuqluraa; qaillun-mi qetunraqau?”

⁴⁵Yuut-llu tamalkuita niitelluki elitnaurani qanrutai,

⁴⁶“Mulngakici igatulinek, tamakut tarriculartut akurtulrianek aturangqerrluteng, tuneniarvigni-llu nayangarvikesqumalartut, agayuvigni-llu aqumlleret kiaqliit aqumviksularait, nerevkarimi-llu kiaqliuyugaqluteng.

⁴⁷Tau͡gken arnat aipainret enaitnek uayaariaqluteng, piicaumanguaraqluteng-llu. Taukut anucimirqecetaarutmek angenrulriamek pimaarkaugut.”