Read Yupik Luke 21 Bible Online

Luke 21 - Yupik bible

Luke 21

¹Kiartellermini-llu tukuulriit murilkai amllermek elliiluteng tuavet elliivignun.

²Arnaq-llu aipaineq arrsaulria tangrraa akicuaraagnek tuavet elliiluni.

³Qanertuq-llu, “Ilumun, qanrutamci una arnaq aipaineq arrsaulria elliilriani tamalkuitni elliinruuq.

⁴Taukut tamarmeng cipnermeng ilaitnek elliingata cikiutnun, tau͡gaam uum nurutellriaruluni yuutekaqsallni tamalkuan elliitekaa.”

⁵Ilaita-llu agayuvigpak qanrutekngatgu, taqenqegcaumacianek, teggalqunek-llu tangnirqelrianek, elliitekumalrianek-llu tangnircautnek, qanertuq,

⁶“Tua-i tamakut tangvak'ngaci, erenret tekiciiqut, teggalqunek qalliqelriartairuciiquq, itumcimangailngurnek egcimaluteng-llu.”

⁷Tua-i-llu aptaat, “Elitnauristaa, qaku tamakut tuaten piarkaugat? Cali-llu ca nallunailkutnguarkauga tuaten piqataqata?”

⁸Qanertuq-llu, “Murilkici kitumun alarcecimanritnaurtuci, amllellriit tekitarkaungata atqa aturluku, qanerluteng, ‘Wiinga Christ-augua!’ cali-llu, ‘Pillerkaq ukaqsigiuq!’ Maligtenrilkiciki taukut.

⁹Niiskuvci-llu anguyautellrianek ayuqenriqertellrianek-llu, alingallanrilkici, tamakut ciumek tuaten piarkaungata, tau͡gaam iquklitlerkaq egmian pingaituq.”

¹⁰Qanrutai cali, “Nunam ataucim yui inglukiciqut nunam allam yuinun, atanruvik-llu atanruvillgutminun.

¹¹Nuna-llu cakneq pektelarciquq, nunat-llu ilaitnun piitnaq, cangerlagpiit-llu tekiciiqut. Qilagmek-llu irranarqelriarpiit nallunailkutet-llu piarkaugut.

¹²Tamakut tamalkuita ciungatgun teguciqaiceci ilalkelluci-llu, tunluci-llu qaillukuarvignun, itercivignun-llu, tua-i atanernun atanerruanun-llu ullauciiqaiceci atqa ayagneqluku.

¹³Tuani nallunairiniartuci.

¹⁴Taumek nallunrilkiciu ciungakun, umyuarrlugcarauteksunailucia kiullerkarpeci.

¹⁵Wiinga cikirciqngamci qanrarkarpecen̄ek, elisngamek-llu nakukestevci tamarmeng asgurakesciigalkiitnek narurcesciigalkiitnek-llu.

¹⁶Elpeci-llu angayuqavci anelgutevci-llu, tungelqurpeci-llu, yugnikekevci-llu tuaten tunciqaiceci; ilaci-llu tuquciiqait.

¹⁷Uumikumaarkauguci-llu yugnek tamaitnek atqa pitekluku.

¹⁸Tau͡gaam nuyavci iliit atauciunger'mi cagmarngaituq.

¹⁹Asvailucirpeciuggun tarneci pikumaarkaugaci.

²⁰“Tau͡gaam Jerusalem-aaq tangerquvciu inglukesterugaat kassugusngaluku, tua-i nallunritarkaugarci piunrillerkaan ukaqsigicia.

²¹Tuani Judea-melnguut ingrinun qimakilit, Jerusalem-aamelnguut-llu ankilit, avatiitnelnguut-llu itenrilkilit.

²²Waniwaungata erenret akinaurviit, igausngalriit tamarmeng piciurtellerkaat.

²³Nakleng qingalriit aamarcilriit-llu ernerni taukuni! Nanikuanarqelriartangqerciqngan angelriamek nunam qaingani, yugnun-llu ukunun eq'ukun piciqngan.

²⁴Nuussirpagkun picurlaumaarkaugut, ayaucimaarkauluteng-llu qaneryarallgutkenrilngurnun, Jerusalem-aaq-llu Jews-aarunrilnguut tutmararkaugaat, Jews-aarunrilnguut ernerkaita qaqitellerkaata engeliinun.

²⁵“Nallunailkutangqerciquq-llu akertem̄i iralumi-llu agyani-llu. Nunam-llu qainganelnguut nanikuaciqut uivagcirluteng-llu imarpik qairet-llu ellerrarterpakata.

²⁶Yuut tuqucuarciqut alingem ugaani nunam-llu qainganun tekitarkat aaqluki, tua-i qiliim pinii arulaarkaungata.

²⁷Nutaan-llu Yuum Qetunraa tangerciqaat amirlukun agiirrluni piningqerrluni ucurnarquterluni-llu.

²⁸Tau͡gaam tamakut ayagniqata, ciugci, tua-i anirtullerkarci ukaqsigian.”

²⁹Cuqyutmek-llu qanrutai, “Tangerciu napa atsangqetuli, napat-llu tamalkuita,

³⁰cuyangaararqata tua-i tanglararci elpecen̄ek-llu nalluvkenaku kiagem ukaqsigicia.

³¹Tuaten cali, elpeci tamakut tamarmeng ayagniuciat tangerquvciu, tua-i nallunrilkici Agayutem angayuqauvian ukaqsigicianek.

³²Ilumun, qanrutamci, ukut yuullgutkelriit nangengaitut tamakut tamalkuita qaqimavkenaki.

³³Qilak nuna-llu pellugciquk, tau͡gaam qaneryaranka pellugngaitut.

³⁴“Tau͡gaam elpecen̄ek murilkici, ircaquci piviirucecuaraci neryunqeggnermek taangaryugmek-llu, unguvam-llu mat'um piinek umyuarrlugcaranermek, taum erenrem tekiararucuaraaci negatun.

³⁵Waten tekitarkaungan tamalkuitnun nunam qainganelngurnun.

³⁶Taumek kesianek tarikici, piicagglainarluci-llu, tamakut tamalkuita piarkat avicunaqnauraci, Yuum-llu Qetunraan ciuqerranun nangengqayunaqnaurtuci.”

³⁷Unuaquaqan-llu agayuvigpagmi elicungcarilallruuq, atakuaqan-llu anlallruuq Olive-aam ingrianun.

³⁸Yuut-llu tamarmeng unuayaarmi Agayuvigpagmun ullalaraat niitnaluku.