Read Yupik Luke 23 Bible Online

Luke 23 - Yupik bible

Luke 23

¹Tamarmeng-llu nangertut Pilate-aamun-llu ayaulluku.

²Ellaita-llu picetaarutaat qanerluteng, “Una yuk elpekarput angayuqauvimta yui iqlutmurulluki, Caesar-aamun-llu akiliqurautnek elliillerkaq inerquulluku, qanerluni-llu cali Christ-auniluni angayuqruluni.”

³Pilate-aam-llu aptaa, “Elpet-qaa taunguuten Jews-aat Angayuqrat?” Kiugaa-llu, “Apyucirpetun taunguunga.”

⁴Pilate-aam-llu agayulirten͞gunret yugugaat-llu qanrutai, “Wiinga picurlagmek nataqvikenritaqa una yuk.”

⁵Tau͡gaam ellait aguagtut qanerluteng, “Yuut pek'ngarcetai, elicungcariami Judea-mi tamiini, Galilee-amek ayagnirluni maavet-llu tuaten.”

⁶Pilate-aam-llu man'a niicamiu, apyutkaa Galilee-armiungucianek.

⁷Tua-i-llu Herod-aam atanirtuq'ngainun ilakucia niicamiu, Herod-aamun ayaucetaa, tuani Jerusalem-aametlinian.

⁸Tua-i-llu Herod-aam Jesus-aaq tangrramiu, quyaqapigtuq, qangvarpak tangerrsullruamiu, elliinek niitellruami, neryuniurluni-llu irr'inarqelrialiarinek tangerrnayukluni.

⁹Tamanek-llu apqauraa, tau͡gaam elliin cakuinraungraan kiunritaa.

¹⁰Agayulirten͞gunret-llu yuut-llu atanrit tuanlluteng, picetaarutqapigtaat.

¹¹Herod-aam anguyagten̄i-llu caunrilkaat temciarautekluku-llu, aturaqegtaarmek-llu at'elluku Pilate-aamun ut'rucetaa.

¹²Ernermi taumi Pilate-aaq Herod-aaq-llu yugniksagutuk, civuani atunem nakukutellruamek.

¹³Pilate-aam-llu agayulirten͞gunret yuut-llu atanrit quyurcetai,

¹⁴qanrulluki-llu, “Yuk una wangnun taitarci yuut iqlutmurcetniluki, tangerrluku-llu, wiinga takurpecen̄i apqauryaaqaqa, tau͡gken picetaarutlerpecen̄ek nataqvikenritaqa.

¹⁵Herod-aam-llu cali tuaten, waniwa ut'rucetellrukii wangkutnun, tangerrluku, camek tuqucesqutkamek pillrunrituq.

¹⁶Taumek anucimirqecetaarraarluku pegciiqaqa.”

¹⁷[Ataucimek pegciarkaullruami agayunerpiita nalliini.]

¹⁸Tau͡gaam tamarmeng ataucikun qayagpagtut, “Una au͡g'arru, Barabbas-aaq-llu wangkutnun pegesgu.”

¹⁹Tauna itengqauq ilautellruami picirkiutnek inglukilrianun, tuqucilriaruami-llu.

²⁰Pilate-aam-llu qalarutenqigtai, Jesus-aaq pegcugyaaqngamiu.

²¹Tau͡gaam ellait qayagpagtut, “Ussukcausgu!”

²²Pilate-aam pingayiriluni qanrutai, “Ciin-wa, ca assiilnguq aturtau? Wiinga tuqucesqutkamek nataqvikenritaqa, taumek piqertuarcetraarluku pegciiqaqa.”

²³Tau͡gaam aguagteqapigtut, qayagaluteng ussukcaucesqelluku. Ellaita-llu aguagutlerteng unakaat.

²⁴Pilate-aaq-llu alerquriuq pisqumallrat pisqelluku.

²⁵Barabbas-aaq-llu itengqanrircetaa, imna picirkiutnek inglukilria, tuqucilleq-llu kaigatkellrat, tau͡gaam Jesus-aaq tunaa piyugtaciicetun pisqelluku.

²⁶Ayausnginanratni-llu, Simon-aaq Cyrene-armiu, nunarpiim avatiinek tailria, teguat; kelistaq-llu elliinun qugcetaat, Jesus-aam kingunrakun maligucesqelluku.

²⁷Yugugaat-llu maligtaat, arnarugaat-llu; taukut nepliutekaat qiatekluku-llu.

²⁸Tau͡gaam Jesus-aam tuiggvikluki qanrutai, “Jerusalem panii ukuut, qiavkenaci wii piteklua, tau͡gaam elpeci pitekluci irniaci-llu pitekluki qiaci.

²⁹Tangerrluku, erenret tekiciiqngata, tuani qanerciqut, ‘Atawaqertut irniyuilnguut qingayuilnguut-llu, aamarciyuilnguut-llu!’

³⁰Tuani ingrinun qanerciqut, ‘Iggvikicikut’, qeminun-llu, ‘Patucikut’.

³¹Napa unguvalria waten piatgu, qaillun-mi tayima qakimalria pimaarkauga?”

³²Allak-llu malruk picurlallrek, cali ayautagket elliinun ilautellukek tuqucimaarkak.

³³Ullallerteng tekicamegteggu, Golgotha-mek aterpagcimalria, yugcetun-llu wani-wa “Ilquignertalek,” tuani kelistamun ussukcautaat, picurlallrek-llu ilaklukek, aipaa tallirpilirneranun, aipaa-llu iqsulirneranun.

³⁴Jesus-aaq-llu qanertuq, “Aata, au͡g'ariski, caliarteng nalluatgu.” Aturai-llu avenqegtait ellmeggnun, nall'arcetaarutekluki-llu.

³⁵Yuut-llu nangengqaut tangvagluteng; atanret-llu temciarautekaat qanerluteng, “Allat anirtulallrui, ellminek anirturli, Christ-aukuni, Agayutem Nakmikek'ngaa.”

³⁶Anguyagtet-llu temciarautekaat, ullagluku-llu quunarqelriamek cikingnaqaat,

³⁷qanerluteng, “Jews-aat Angayuqaqkatgen, elpenek anirtua!”

³⁸Quliikun-llu igartangqertuq waten: “UNA JEWS-AAT ANGAYUQAQAAT” [igausngaluteng Greek-aat, Latin-aat-llu Hebrews-aat-llu qaneryaraitgun.]

³⁹Picurlallrek-llu taukuk ussukcaucimalriik aipaan temciarautekaa, qanerluni, “Christ-auyaaquten-qaa? Elpenek wangkuk-llu anirturkuk!”

⁴⁰Tau͡gaam aipaan inerquraa, qanerluni, “Elpet-qaa Agayun tuaten alikenritan, ayuqiinek picirkiumaluten?

⁴¹Wangkuk-llu nall'arrluku aturarpuk, pillmegnuk nalliinek pimiimegnuk, tau͡gaam una camek pillrunrituq.”

⁴²Qanertuq cali, “Jesus-aaq, angayuqauvigpenun tekiskuvet umyuaqekia.”

⁴³Qanrutaa-llu, “Ilumun, qanrutamken, unuamek Paradise-amtellgutekciqerpenga.”

⁴⁴Maa-i-llu erneq qukartuq, nuna-llu tan'geriuq sass'at pingayuat engelkarrluku.

⁴⁵Akerta-llu tanqiarulluni, agayuvigpiim-llu capii allegtuq qukamikun.

⁴⁶Tua-i-llu Jesus-aaq qayagpagluni, qanertuq, “Aata, anerneqa unatevnun tun'aqa!” Waten-llu qanrraarluni, anernerirtuq.

⁴⁷Anguyagtet-llu atanrata man'a pilleq tangrramiu, Agayun nanraraa, qanerluni, “Ilumun una yuk ellualriarullrulliniuq!”

⁴⁸Yugugaat-llu tangvagnaluteng tuavet quyungqalriit, tamakut tuaten pillret tangrramegteki, qat'gateng patguurluki utertut kingunermeggnun.

⁴⁹Yugnikekai-llu tamarmeng, arnat-llu Galilee-amek malikellri, yaaqvani nangengqaut tamakut-llu tangerrluki.

⁵⁰Tangerrluku-llu yuk Joseph-aamek at'lek, Arimathea-mek, Jews-aat nunarpiita iliitnek kingunirluni, qaillukuartet iliit, yuk assilria elluatuuluni-llu,

⁵¹ellii maligarutellrunrilnguq qaillukuarutiitnun atullratnun-llu, Agayutem-llu angayuqauvianek utaqalgirluni;

⁵²taum Pilate-aaq ullagaa Jesus-aam temiinek kaigavikluku.

⁵³Atrartaa-llu 'lumarrarmun-llu imgulluku qungumun elliluku, qiurmi nayuumalriamun ellivikumaksailngurmun.

⁵⁴Maa-i-llu erneq Upiqayarauluni, Sabbath-aaq-llu ayagniqatarluni.

⁵⁵Arnat-llu Galilee-amek maliin maligtaat, qunguq-llu tangerrluku, qaillun-llu temiin ellicia.

⁵⁶Kingunermeggnun-llu utertut aruyailkutnek mingugmek-llu tepkegcilriamek upcinaluteng. Ernermi-llu Sabbath-aami uitaut alerquutet maliggluki.