Read Yupik Luke 24 Bible Online

Luke 24 - Yupik bible

Luke 24

¹Nitilim erenrin ciuqliatni, erqaarallrani, qungumun tekitut tepkegcilriit upingalteng tekiulluki.

²Teggalquq-llu tangrraat qungumek akagcimaluni.

³Itrameng-llu Atanrem Jesus-aam temii nataqenritaat.

⁴Tua-i-llu taumek alangaarinanratni, tangerrluku, angutek malruk qitngirnarqelrianek aturalgek nangengqauk caniatni.

⁵Tatamngata-llu nunamun-llu puc'ata taukuk qanrutakek, “Ciin unguvalria yuarceciu tuqumalriit nuniitni?

⁶Maantenrituq, maktellruuq. Neq'akiciu qaillun elpecen̄un qanellra cali Galilee-ametnermini,

⁷qanerluni, ‘Yuum Qetunraa assiilngiumalriit unataitnun tunumaarkauguq ussukcaucimaarkauluni-llu, erenret-llu pingayuatni maktarkauluni.’”

⁸Tua-i qaneryarat neq'akait.

⁹Qunguq-llu unilluku elitnaurat qulen ataucimek cipnelget allat-llu qanrucarturait.

¹⁰Elitnauranun-llu qaneryartulriit waniwaugut Mary Magdalene, Joanna-llu, Mary-llu James-aam aanii, allanek cali ilangqerrluteng.

¹¹Qanellrit-llu qanengssaguaruyukait ukveqevkenaki-llu.

¹²Peter tau͡gaam nangertuq, qungumun-llu aqvaqurluni, pull'uni uyangtaa, tangerrluki-llu 'lumarrat allakaumaluteng, eneminun-llu utertuq, pillrit tamakut alangaarutekluki.

¹³Tangerrluku-llu ernermi taumi ilagket Emmaus-amun ayagtuk, tamana mile-anek malrunlegnek yaaqsigtauq Jerusalem-aamek.

¹⁴Qalarutkakek-llu tamakut pillret tamalkuita.

¹⁵Qalarusnginanragni apqaurullutek-llu, Jesus-aaq mallgutuq, ilaulluni-llu maligtak.

¹⁶Tau͡gaam iikek tangerciigatevkaumauk elitaqesciigatevkarluku.

¹⁷Qanrutak-llu, “Camek qaneryarangqerpakarcetek piyuallerpetegni?” Arulairtuk-llu angniinatek.

¹⁸Aipaan-llu Cleopas-aamek atelgem kiugaa, “Elpet-qaa kiivet, Jerusalem-aami allanrulriani makuni ernerni, tuani pillrit nalluaten?”

¹⁹Aptak-llu, “Canek?” Qanrutaak-llu, “Jesus-aaq Nazareth-aarmiu pitekluku pillrit, tauna prophet-aaruluni caliamikun, qaneryaramikun-llu pinilriaruluni, Agayutem yuut-llu takuatni.

²⁰Qaillun-llu agayulirten͞gunret atanirturtemta-llu tunellrukiit, tuqucesqumaluku, kelistamun-llu ussukcautelluku.

²¹Tau͡gaam wangkuta neryuniullruyaaqukut taunguyukluku Israel-aat anirturtekaat. Wani-wa-llu ernerpak erenret pingayuurtut tamakut kinguatni.

²²Tuamta-llu cali, arnartamta ilaita alangaarcetaitkut unuayaarmi qungumun ayallruluteng,

²³temii-llu nataqevkenaku, tailuteng-llu qanertut an'gilagnek tangerrniluteng, unguvacianek qanelriignek.

²⁴Ilamta-llu ilaita qunguq paqtaat, tangerrluku-llu arnat qanellruciicetun. Ellii tau͡gaam tangenrritaat.”

²⁵Tua-i qanertuq elkegnun, “Ukugni ayuquciilnguugni, ukverciiganatek-llu prophet-aat qanellritnek!

²⁶Christ-aq-qaa picirkiumallrunrituq nangteqlermikun ucurnarillerkaminun tekitarkauluni?”

²⁷Moses-aam-llu prophet-aat-llu kalikait ayagniutekluki, ellii pitekluni igausngalriit tamalkuita elkegnun taikanirai.

²⁸Ciunerteng-llu nuna mallgiamegteggu kituryuguartuq.

²⁹Taukuk cumigglutek unayaqaak qanerlutek, “Nayurkuk, unukataan erenrirluni-llu,” tua-i-llu itertuq uitallguteknalukek.

³⁰Nervigmi-llu aqumgallgutekngamikek, kelipaq tegua atawaqaasqelluku-llu, itumterraarluku-llu elkegnun tunaa.

³¹Nutaan iikek uitut, elitaqluku-llu; catairrluni-llu.

³²Qanruyutuk-llu, “Anirtima ircaqupuk nutngarpakartuk piyuallemegni qallaucakuk, qaneryarat-llu wangkugnun taikanillrani.”

³³Sass'ami-llu taumi nangertuk, Jerusalem-aamun-llu utertuk, taukut-llu qulen ataucimek cipnelget ilait-llu quyungqaluki tekitakek.

³⁴Taukut-llu qanertut, “Ataneq ilumun maktellruuq, Simon-aamun-llu tangercetuq!”

³⁵Elkek-llu qanemciuk piyuallermeggni pillermeggnek, qaillun-llu elitaqucimegnek kelipamek itumcillrani.

³⁶Tuaten-llu qallasnginanragni, Jesus-aaq tungaunani tangercetuq akunliitni nangengqaluni, qanrulluki-llu, “Uitanqegcici.”

³⁷Tau͡gaam ellait alangaartut alingeqapiggluteng, alangrumek tangerrsukluteng.

³⁸Qanrutai-llu, “Ciin tatamececi, umyuarpeciuggun-llu nalirruggluci?

³⁹Tangerciki unatenka it'ganka-llu. Wanguunga tungaunii, cavcia yuvrirlua-llu, alangru kemengqenrilan enrunani-llu wangtun.”

⁴⁰Waten-llu qanrraarluni unatni it'gani-llu ellaitnun nasvagai.

⁴¹Cali nalirrugpakaata angnim ugaani, paqnayugluteng-llu, qanrutai, “Neqkautengqertuci-qaa maani?”

⁴²Neqmek-llu keniumalriamek cikiraat.

⁴³Elliin-llu neraa takuatni.

⁴⁴Qanrutai-llu, “Nauwa, elpecen̄etlemni qanrut'lallruamci, Moses-aam alerquutaini prophet-aat-llu igaitni piicautelegni-llu, wii piteklua igausngalriit piciurtarkauniluki.”

⁴⁵Nutaan taringellerkaitnun qaneryarat ellaitnun taikanirai.

⁴⁶Qanrutai-llu, “Waten igausngauq, Christ-aq nangteqerkauguq, erenret-llu pingayuatni maktarkauluni.

⁴⁷Elliin-llu atrakun umyualinqigcaraq assiilnguiryaraq-llu qalarutkumaarkauguq yugni tamaitni, Jerusalem-aamek ayagnirluni.

⁴⁸Elpeci-llu makunek nallunrilnguuguci.

⁴⁹Tangerrluku-llu, wiinga Atama akqutkellra elpecen̄un ayagceciiqaqa; tau͡gaam elpeci nunarpagni uitaurqici pinimek quyinermek pingllerkarpeci engeliinun.”

⁵⁰Ayautai-llu Bethany-mun, unatni-llu yaggluki atawaqaasqai.

⁵¹Atawaqaasqen͞ginanermini-llu avtai qilatmurucimaluni.

⁵²Ellaita-llu ciktaarvikaat, Jerusalem-aamun-llu utertut angniqapiggluteng.

⁵³Agayuvigpagmeterrlainartut-llu Agayun nanrarluku.