Read Yupik Luke 4 Bible Online

Luke 4 - Yupik bible

Luke 4

¹Jesus-aaq-llu, muirumiimi Anernermek Tanqilriamek, Jordan-aamek utertuq, Anernerem-llu yuilqumun ayagcetaa.

²Ernerni-llu yuinaagni malrugni tuunrangayagmun naspaamaluni. Nereksaunani-llu taukuni ernerni, naamariata-llu kaigem tutaa.

³Tuunrangayiim-llu qanrutaa, “Agayutem Qetunraqkaten una teggalquq kelipaurtessgu.”

⁴Jesus-aam-llu kiugaa, “Igausngauq, ‘Keliparrlainaq yuum yuutekenritaa, tau͡gaam Agayutem qaneryaraa tamalkuan.’”

⁵Tua-i-llu tuunrangayiim ingrimun mayuutaa, egmianun-llu nunam qainganelngurnek angayuqauvignek nasvitaa,

⁶qanrutaa-llu, “Elpenun tunciqaqa piyunarquciq tamalkuan kenegnartuumaan, wangnun kitumun-llu tunyukumki cikiutekarkauganka.

⁷Ciktaarvikekuvnga, tamalkuan pikciqan.”

⁸Jesus-aam kiugaa, “Igausngauq, ‘Ataneq Agayuten tau͡gaam ciktaarvikarkaugan kevgiurluku-llu kiingan.’”

⁹Jerusalem-aamun-llu ayautaa, agayuvigpiim-llu kangranun nangengqavkarluku, qanrulluku-llu, “Agayutem Qetunraqkaten, unavet elpenek igten,

¹⁰igausngiin, ‘An'gilani ellimerciqai pitekluten murilkevkarluten,

¹¹tegumiaqeciqaatgen it'gaten teggalqunun kalgucetevkenaki.’”

¹²Jesus-aam kiugaa, “Qanrumauq, ‘Ataneq Agayuten naspaayunaitan.’”

¹³Tuunrangayiim naspaatet qaqicamiki unisnguaqeraa.

¹⁴Jesus-aaq-llu Anernermek pinirivkaumaluni Galilee-amun utertuq, niitnauluni-llu tamiini nunani.

¹⁵Elitnaurilallruuq-llu elitnaurviitni, tamaitnek-llu nanraumaluni.

¹⁶Nazareth-aamun-llu angliviminun tekituq, pilaucimitun-llu Sabbath-aami agayuvigmun itellruuq, nangerrluni-llu naaqinaluni.

¹⁷Isaiah-m kalikai elliinun tunait; elliin-llu nengtaa kalikaq imegyaraq, nataqluku naaqerkani, waten igausngaluni,

¹⁸“Atanrem Anerneran tusvikaanga, tua-i qalaruciarkaurcetellruanga assilriamek naklegnarqelrianun. Teguanun-llu angicimallerkaatnek; cikmiumalrianun-llu tangerrsaurcecimallerkaatnek; nangcimalrianun-llu nangcimanrillerkaatnek.

¹⁹Wani-wa qanrutkisqellua Atanrem naklekician tus'ucianek.”

²⁰Kalikaq-llu imegyaraq imgaa, kevgiurtem̄un-llu tunluku, aqumluni-llu. Tua-i-llu agayuvigmelnguut tamarmeng tangvagaat uluqsaunaku.

²¹Nutaan-llu qanrutai, “Man'a qaneryaraq niitellerci maa-i piciurtuq.”

²²Tamarmeng-llu atawakaat, qaneryaraqegtaarai-llu irr'ikluki, qanraqluteng-llu, “Joseph-aam-qaa una qetunraqsaa-qaa?”

²³Elliin-llu qanrutai, “Qanruciiqliarpecia qaneryarauciatun, ‘Yungcaristaa, elpenek anirtua,’ niitellemten̄ek-llu pillerpenek Capernaum-aami, maani-llu tuaten nunavni pikina.”

²⁴Qanerluni-llu cali, “Ilumun, qanrutamci, prophet-aaq ciuniurumaksaitelartuq nakmiin nunamini.

²⁵Wani-wa piciulriamek qanrutamci, nauwa Elijah-m nalliini aipainret amllellruut Israel-aami, qilak umgumallruuq ellallirciiganani allrakuni pingayuni iraluni-llu arvinlegni, kiituani kaigyaraq tut'ellruuq.

²⁶Tuaten-llu Israel-aani aipainret amllellrungraata, tamakut iliitnun Elijah ayagcecimallrunrituq, tau͡gaam nunamun allamelngurmun, Zarephath-aamun, Sidon-am nunain iliitnun, tuavet arnamun aipainermun.

²⁷Cali-llu Elisha-m nalliini mamyuilngurmek apqucilget amllellruyaaqut Israel-aani, tau͡gaam atauciungraan canrircecimallrunritut, imna tau͡gaam Naaman, Syrian-aarmiu.”

²⁸Agayuvigmelnguut-llu mat'umek niicameng eq'uqertut.

²⁹Nangerrluteng-llu anutaat, ayaulluku-llu nunam taum qertulriim iquanun, pen̄akun tuaggun igcetnaluku ciukian.

³⁰Tau͡gaam ellii akuliitgun egmian ayagtuq.

³¹Tua-i-llu Capernaum-aamun, Galilee-am nunain iliitnun, tekituq. Elicungcarai-llu Sabbath-aami.

³²Elicungcautai-llu irr'ikait, qaneryarai tukniata.

³³Tuani-llu agayuvigmi yugtangqellruuq anernerrlulegmek. Tauna qayagpagtuq cakneq,

³⁴“Aa-wa! Caciqsikut, Jesus-aaq Nazareth-aarmiu? Tekituten-qaa piunrirnaluta? Nallunritaqa taungucin Agayutem Tanqilriartaa.”

³⁵Jesus-aam-llu inerquraa waten, “Nepaunak, uumek ani!” Anernerrluum-llu egterraarluku akunliitnun, an'uq aknirtevkenaku-llu.

³⁶Tamarmeng-llu irriut qanruyulluteng-llu, “Cauga man'a qaneryaraq? Tua-i tuknilriakun piningqerrluni anernerrluut ellimerturaqateng anenaurtut.”

³⁷Elliin-llu tuaten picia niitnauguq tamiini tamatum avatiini.

³⁸Ellii-llu agayuvigmek nangerrluni an'uq, Simon-aam-llu eniinun iterluni. Simon-aam cakia naulluuguq puqervagyaramek. Kaigavikaat-llu pitekluku tauna.

³⁹Elliin-llu malkaniraa apquciq-llu tamana inerqurluku; apqucim-llu unitaa, egmian-llu makluni kevgiurai.

⁴⁰Akerta teviinanrani apqucilegnek ayuqenrilngurnek ilangqellriit taukut elliinun ullautait. Elliin-llu tamalkuita unatminek pategvikai canrirtelluki-llu.

⁴¹Anernerrluut-llu amllernek an'ut, qayagpagaqluteng-llu waten, “Elpet Agayutem Qetunraqaaten!” Inerqurluki-llu qallatesqenritai, Christ-aucini nallunritliniatgu.

⁴²Ercan-llu an'uq yuilqumun-llu ayagluni; tua-i-llu yugugaat yuaraat, ullagluku-llu unayaqaat unitesqumavkenateng.

⁴³Tau͡gaam elliin qanrutai, “Agayutem angayuqauvian qaneryaraqegtaarai nunanun allanun cali qalarutkarkauganka, man'a pitekluku ayagcecimiima.”

⁴⁴Galilee-am-llu agayuviini qalaruciuq.