Read Yupik Luke 5 Bible Online

Luke 5 - Yupik bible

Luke 5

¹Tua-i-llu cat iliitni nanvam Gennesaret-am cen̄iini nangerngallrani yugugaat quyurrvikngatni cumigtem pitaciatun, Agayutem qaneryaraa niitnaluku.

²Ellii angyagnek tangertuq nanvam cen̄iini, tau͡gaam neqsurtet yuumaluteng kuvyateng eruryarturluki.

³Ellii-llu tamakuk aipaagnun ek'uq, wani-wa Simon-aam pianun, taumun-llu ketvaqaniisqaa. Aqumluni-llu yugugaat elicungcarai tuaken angyamek.

⁴Qallatellerminek taqngami, Simon-aaq qanrutaa, “Et'ulriamun ayagluten kuvyan civesgu.”

⁵Simon-aam-llu kiugaa, “Ataneq, unugpak errvianun cakviullruyaaqukut catevkenata-llu! Tau͡gaam pisqen͞gavnga civciiqua.”

⁶Tuaten-llu piameng, cangliqut neq'rugarnek, kuvyait-llu allgurluteng.

⁷Tua-i-llu ilateng angyam aipaani uitalriit nulurarait ikayuusqelluteng. Taukut-llu taigut; angyak-llu muiragket kic'ukaarlutek-llu.

⁸Tua-i-llu Simon-aam Peter-aam man'a tangrramiu, Jesus-aam ciuqerranun ciisqumigtuq qanerluni, “Unisnga, tua-i assiilngurtuama, Ataneqa!”

⁹Tua-i irriami, ilani-llu neq'liqucimeggnek tuani.

¹⁰James-aaq John-aaq-llu Zebedee-am qetunrak, Simon-aam angyamtellgutek, cali tuaten piuk. Jesus-aam-llu Simon-aaq qanrutaa, “Alingevkenak, wak'nirnek yugnek cangciquten.”

¹¹Tagngameng-llu, angyateng unitait maliggluku-llu.

¹²Tuamta-llu nunat iliitni uitallrani, yuum ullagaa mamyuilngurmek apqucilgem. Jesus-aaq-llu tangrramiu ciuqerranun put'uq, kaigavikluku-llu qanerluni, “Ataneq, piyukuvet, carriyunarqerpenga.”

¹³Unatni-llu yagtai, agturluku-llu qanertuq, “Piyugtua, carriuten.” Egmianun-llu apquciirutuq tamatumek.

¹⁴Inerquraa-llu, “Kitumun qaneryaqunak, tau͡gaam ayii agayulirtem̄un-llu nasvagyarturluten, carriucin-llu pitekluku Moses-aam alerquutekellra ellikiu, tamakut nallunriutekaatnek.”

¹⁵Tau͡gaam ilangcivkenaku niitnaullra sekavvngiinartuq, yugugaat-llu quyurrvikaat niitnaluteng anirtuusqumaluteng-llu apqucimeggnek.

¹⁶Tau͡gaam ellii yuilqumun ayagtuq piicagyarturluni.

¹⁷Tuamta-llu tamatum nalliini, ernermi elicungcariuq Pharisee-aat-llu Kalikanek-llu elisngalriit tuantut, taillruluteng Galilee-am nunatainek, Judea-m-llu nunatainek, Jerusalem-aamek-llu, anirturiyunarivkaraa-llu Atanrem pinian.

¹⁸Tangerrluku-llu angutet pekcesciigalnguq akigarluku ullautaat. Itervigkaiturtut-llu ellinaluku ciuqerranun.

¹⁹Itlerkangenrilameng-llu yugyagpakaan enem qainganun mayurtut, enem-llu qiliin ilii callarqaarluku aqevlertaat, inangqavigtuumaan Jesus-aam ciuqerranun.

²⁰Ukvertaciat-llu tangrramiu qanertuq taumun yugmun, “Assiilnguirumauten.”

²¹Igatulit Pharisee-aat-llu ayagnerkarcurtut qanerluteng, “Kina una piciliutekiluni qallata? Kina Agayutngunrilnguq assiilnguiriyugngaa?”

²²Tau͡gaam Jesus-aaq elpengami ayagnerkarcuuciatnek kiugai, “Ciin umyuangcarceci ayagnerkarpecen̄ek?

²³Ukuk naliak qacignarqenrua, qallatellerkaq, ‘Assiilnguirumauten,’ wall'u waten qanerluni, ‘Nangerrluten piyuagi?’

²⁴Tau͡gaam nallunricesqelluci Yuum Qetunraan nunam qaingani assiilngurmek au͡g'ariyunarqucianek.” Nutaan pekcesciigalnguq pia, “Qanrutamken, nangerrluten, inarcessuuten teguluku enevnun ayii.”

²⁵Egmianun-llu nangertuq takuatni, inarcessuutni-llu teguluku eneminun ayagtuq, Agayun tuaten nanrarluku.

²⁶Tamarmeng-llu irr'iqapigtut, Agayun-llu nanraraat alingniurluteng-llu qanraqluteng, “Ernerpak wangkuta tangnerranarqelriamek tangellruukut!”

²⁷Tamatum kinguani ayagtuq, akiliqurautnek-llu quyurcista, Levi-amek at'lek, tangrraa akiliqu'urvigmi aqumgaluni, qanrutaa-llu, “Maligesnga.”

²⁸Taum-llu cat tamalkuita pegtai, nangerrluni-llu maligtaa.

²⁹Tauna-llu Levi enemini nerevkariuq angelriamek, yugyagluteng-llu akiliqurautnek quyurcisten̄ek allanek-llu, nerellgutekluki.

³⁰Tua-i-llu Pharisee-aat igartaita-llu elitnaurai qanemyuugautekait qanerluteng, “Ciin akiliqurautnek quyurcistet assiilngiumalriit-llu nerellgutek'larciki, mellgutekluki-llu?”

³¹Jesus-aam kiugai, “Caciilnguut yungcaristem̄ek pinarqenritut, apqucilget tau͡gaam.

³²Tainritua ellualrianun, tau͡gaam assiilngilrianun umyualinqigcesqelluki.”

³³Tua-i-llu qanrutaat, “John-aam elitnaurai yaalartut kaigcirluteng, piicagaqluteng-llu, tuaten-llu cali Pharisee-aat elitnaurait pilarmiut, tau͡gken elpet piten nerlartut merluteng-llu.”

³⁴Jesus-aam-llu qanrutai, “Uikautem-qaa uitallgutai yagceciiqaci uikaun ellaitnelluku?

³⁵Tau͡gaam cam iliiniku uikaun ellaitnek tegumakan tuani yagciqut.”

³⁶Cuqyutmek cali qanrutai, “Yuk-wa ilaariksaitelartuq nutaramek ak'allarmun, nutaraq caunrirciqngaku, ak'allaam-llu nutaraq ayuqevkenaku.

³⁷Tuaten-llu yuum wine-aq nutaraq imiuteksaitelaraa caqunun ak'allarnun, caqut qagerciiqngaki, wine-aq-llu maqluni, caqut-llu caunrirluteng.

³⁸Tau͡gaam wine-aq nutaraq caqunun nutaranun imiutnarquq.

³⁹Yuk-llu wine-amek ak'allarmek merraarluni, nutaraq cucukngaitaa. Qanerciquq-llu, ‘Ak'allaq assinruuq.’”