Read Yupik Luke 6 Bible Online

Luke 6 - Yupik bible

Luke 6

¹Cat iliitni Sabbath-aami, mukaarkat tumkai, elitnaurai-llu kangritnek qecuulluteng uluggaarluki ner'ut.

²Tau͡gaam Pharisee-aat ilait qanertut, “Ciin tuaten piceci pisqutngunrilngurmek Sabbath-aami?”

³Jesus-aam-llu kiugai, “Naaqiksaituci-qaa David-aam picillranek kaillermini, ilani-llu,

⁴qaillun Agayutem eniinun itellra, kelipanek-llu tangrresqutnek tegulluni nerellra, ilani-llu cikirluki; waniwa cailkanun neresqumanrilnguut, agayulirten̄un tau͡gaam?”

⁵Cali qanrutai, “Yuum Qetunraa agayunermun tuaten atanruuq.”

⁶Tuamta-llu Sabbath-aami cali, agayuvigmun itellruuq elicungcariluni-llu. Yuk-llu tuantuq tallirpilirneret unatai nalamaluteng.

⁷Igatulit Pharisee-aat-llu kellutekaat Sabbath-aami canrircecinayukluku, waniwa ayagnerkarcuameng.

⁸Tau͡gaam elliin umyugait nalluvkenaki, unatelek nalamalrianek qanrutaa, “Tailuten nangerten wavet.” Tauna-llu nangertuq tailuni-llu.

⁹Nutaan Jesus-aam qanrutai, “Apetnaamci, naliak elluanrua Sabbath-aami atawamek piluni, wall'u atawaunrilngurmek, unguvavkariluni wall'u tuquvkariluni?”

¹⁰Kassutmun kiarqaarluki imna qanrutaa, “Unateten yageski.” Tuaten-llu piuq. Unatai-llu canrirtut.

¹¹Tau͡gaam ellait eq'uqertut, qaillukuartut-llu qaillun pillerkameggnek Jesus-aamun.

¹²Tamatum-llu nalliini ingrimun ayagtuq piicagyarturluni, unugpak-llu taqeksaunani piicagtuq Agayutmun.

¹³Ercan-llu elitnaurani taisqai, taukunek-llu nakmikiuq qula malrugnek cipluku, taukut-llu acirai apostle-aanek.

¹⁴Wani-wa Simon, Peter-aamek aciraa, Andrew-llu anelgutii, James-aaq-llu, John-aaq-llu, Philip-aaq-llu, Bartholomew-llu,

¹⁵Matthew-llu, Thomas-aaq-llu, James-aaq-llu Alphaeus-aam qetunraa, Simon-aaq-llu cumignerulria,

¹⁶Judas-aaq-llu James-aam qetunraa, Judas-aaq-llu Iscariot-aaq, tunestekaa.

¹⁷Malikluki-llu atrartuq manilriamun. Elitnaurarugaat-llu yugugaat-llu, Judea-mek tamiinek, Jerusalem-aamek-llu, imarpiim cen̄iinek-llu Tyre-amek, Sidon-amek-llu,

¹⁸tailriit niicugluku, anirtuusqumalriit-llu apqucimeggnek. Anernerrlulget-llu anernerrluirumallruut.

¹⁹Yugugaat-llu agturyuumiryaaqaat, pinia elpegnaqngan, anirturai-llu tamalkuita.

²⁰Tua-i-llu elitnaurani tangerrluki qanrutai, “Atawaqertuci elpeci naklegnarqelriani, Agayutem angayuqauvia pikngavciu.

²¹Atawaqertuci elpeci kailriani watua maa-i, camirciiqngavci. Atawaqertuci elpeci iluteqcaralriani watua maa-i, nunaniryugciqngavci.

²²“Atawaqertuci yuut uumikekaceci, nallunguarluci-llu, qumlikluci-llu; picilirluci-llu Yuum Qetunraa pitekluku.

²³Tuani angniqici, qecgaurluci-llu angnim ugaani, akiliutsi angengan qilagmi, tuaten-llu ciuliarita prophet-aat pillruitki.

²⁴“Tau͡gaam nakleng elpeci tukuulriani! Akiliumariavci ak'a.

²⁵Nakleng elpeci kainrilngurni watua maa-i, kaigciqngavci; Nakleng elpeci angnirrlainalriani watua maa-i, qiaciqngavci neplialuci-llu.

²⁶“Nakleng elpeci, yuut tamarmeng assikekaceci, tua-i tuaten cali ciuliarita prophet-aat piciunrilnguut pillruit.

²⁷“Tau͡gaam niicugnistem̄aa qanrutamci: Kenkiciki inglukesteci, atawakiciki uumikesteci.

²⁸Atawaqaasqiciki aniqlaasteci, piicauciki qumlikesteci.

²⁹Yuum qacareskaten ulluvavgun, inglua-llu manikiu; yuum-llu qasperen tegukaku, paltuugen cali qunuksaqunaku.

³⁰Elpenun-llu cikiisqellria cikirru. Pivnek-llu tegutelleq tungcariyaqunaku.

³¹Qaillun-llu pisqumaaqavci yugnun, tuaten-llu pilarmikiciki.

³²“Kenkesceci kenkekuvciki nallaitgun, nau͡gg'un ilukegcinarqeciqseci? Tua-i assiilngilriarung'e'rmeng kenkesteteng kenkelaamegteki.

³³Pinqegciucesceci nallaitgun pinqegciutelaquvciki nau͡gg'un ilukegcinarqeciqseci? Tua-i assiilngilriarung'e'rmeng tuaten pilartut.

³⁴Navriskengkuvci-llu cimirarkanek, nau͡gg'un ilukegcinarqeciqseci? Tua-i assiilngilriarung'e'rmeng navriskenglaameng ilameggnun cimirarkaitnek.

³⁵Tau͡gaam inglukesteci kenkiciki, elluarrluki-llu piluki, navriskenglarnaurtuci-llu cimirarkaunrilengraata, tuaten akiliutengqerciquci qetunraugarkauluci Quyinrulriamun, tua-i ellii naklegtaungami quyatuilngurnun qunuyulrianun-llu.

³⁶Takumcutarci, Atavci Takumcukilauciatun.

³⁷“Cuqciyaqunaci ilavcen̄ek, cuqcimanritnaurtuci; picirkiriyaqunaci, picirkiumanritnaurtuci; au͡g'aricici au͡g'aricimanaurtuci.

³⁸Cikiqengici, cikiumanaurtuci, muirtepialriamek angalalluni, negtaarumalriamek, uryulriamek-llu kenirpecen̄un. Cuqyutevciuggun cuqcimaarkauguci.”

³⁹Cuqyutmek-llu qalarutai, “Cikmiumalriim-qaa cikmiumallgutni pekyuciiqaa? Tamarmek-qaa iggngaituk ilutulriamun?

⁴⁰Elitnauraq angenrunrituq elitnauristem̄ini, tau͡gaam kina imna eliskuniki elitnauristem̄itun ayuqarkauguq.

⁴¹Ciin-llu verun mikengraan tangvagciu ilavet iingani, tau͡gken veruten angelria iigpeni elpekumavkenaku?

⁴²Wall'u qaillun qaneryugngasit ilavnun, ‘Veruten au͡g'arnaurqa iivnek,’ amta-llu elpet veruten elpekumavkenaku? Usuuq malrugnek umyualegmi, ciumek veruten anterraarru iivnek, nutaan mecingqerrluten ilavet verutii iinganek anetnauran.

⁴³“Tua-i napa assilria atsangengaituq assiilngurnek, tuaten-llu napa assiitellria atsangengaunani assilrianek,

⁴⁴napat tamalkurmeng nallunaitelaameng atsamegteggun. Tua-i atsat fig-at iqvaumaksaitut naunerrlugnek, wine-at-llu atsat iqvaumaksaunateng cukilananek.

⁴⁵Yuk assilria ircaqumini elluamek qemangqaallerminek nasvagilartuq, tau͡gaam elluanrilnguq ircaqumini elluanrilngurnek qemangqaallerminek nasvagilartuq. Tua-i-wa ircaqum qemangqaiciatun qanraqami qanlartuq.

⁴⁶“Ciin-llu tuqluraralarcecia, ‘Ataneq, Ataneq,’ amta-llu pisqutenka aturyugpek'naki?

⁴⁷Kina imna wangnun tailria, qaneryaramnek-llu niitellria aturluki-llu, taum ayuqucia qanruteknaurqa.

⁴⁸Tauna enelilriatun ayuquq, tua-i elagtuq aciqvanun, inguqiriluni-llu qiurmun; tua-i-llu ulngan carvanrem ciuneqaa 'laavkaaq tauna, tau͡gaam angalacesciigataa, tua-i elluarrluni taqumiimi.

⁴⁹Tua-i-llu niitellria tau͡gaam aturyugpek'naki, tauna enelilriatun inguqiciriyunrilngurtun ayuquq. Carvanrem-llu ciuneqngaku, ussutaa egmianun, piunriqapiggluku-llu.”