Read Yupik Luke 9 Bible Online

Luke 9 - Yupik bible

Luke 9

¹Imkut-llu qulen malrugnek cipnelget quyurcetai, pinimek-llu cikirai piyunarqucirluki-llu anernerrlugnun apqucinun-llu.

²Ayaasqai-llu qaneryariurtelluki Agayutem angayuqauvianek, apqucilget-llu anirtulaasqelluki.

³Qanrutai-llu, “Camek ang'aqiksaunaci ayaruungraan, wall'u caqurraungraan, wall'u taquamek, wall'u akimek, paltuuci-llu aipirpek'naki.

⁴Nani enemun itquvci, tuantaurqici ayallerkarpecen̄un.

⁵Nani-llu ciuniunrilkaceci, tuaken ayakuvci it'gaci evcukiciki taukunun nallunairutkamek.”

⁶Ellait-llu ayagtut nunat tumekluki, qaneryaraq qalarutekluku anirturiluteng-llu tamiini.

⁷Herod-aaq-llu makunek pillrinek niicami paqnayugtuq, tua-i ilait qanlaata John-aaq tuqumalrianek maktellruniluku,

⁸allat tau͡gaam Elijah alaillruniluku, allat cali prophet-aat ciuqvallaat iliit maktellruniluku.

⁹Tua-i-llu Herod-aaq qanertuq, “John-aaq qamiqurrillruaqa, tau͡gaam kina una waten niitnaulria? Tangerrsugyaaqaa-llu.”

¹⁰Apostle-aat utercameng caliameggnek apervikuagaat. Tua-i-llu allakarmeng ayagtut, elliin malikluki, nunamun Bethsaida-mun.

¹¹Yugugaat-llu tamana elpekngamegteggu maligtaat. Elliin-llu ciuniurai qalarulluki Agayutem angayuqauvianek, apqucilget-llu canrircetai.

¹²Erneq-llu iquklitqataan imkut, qulen malrugnek cipnelget taigut qanrulluku-llu, “Yugugaat ayagceski nunanun nunarrarnun-llu, qavartallerkaatnun neqkangllerkaatnun-llu, yuilqumlamta.”

¹³Tau͡gaam qanrutai, “Elpeci nerevkarciki.” Qanertut-llu, “Kelipautengqertukut tallimanek tau͡gaam, neqek-wa malruk; kipucartuqumta tau͡gaam neqkangyallilriit tamarmeng makut,” tua-i amllertiimeng tiissitsaat talliman angutet.

¹⁴Elitnaurani-llu qanrutai, “Aqumevkarciki allakaqtaarluki yuinak malruk qulnek ciptaqluki.”

¹⁵Tuaten-llu piut, aqumevkarluki tamalkuita.

¹⁶Elliin-llu kelipat tamakut talliman neqek-llu malruk tegui, qulmun-llu ciuggluni atawaqaasqai, itumlluki-llu. Elitnauraminun-llu tunai yugugarnun aruqutkesqelluki.

¹⁷Ner'ut-llu camirrluteng tamarmeng, ilakuarit-llu quyurtait kalngat qulen malrugnek cipluki imirluki.

¹⁸Tua-i-llu piicagyartullermini allakarmi elitnaurani ilakluki aptai, “Qaillun yuut kilgaat qanlartat caucimnek?”

¹⁹Kiugaat, “Angllurcecisten͞guniatgen John-aaq, ilaita tau͡gaam Elijah-uniatgen, allat-llu prophet-aat ciuqvallaat iliit maketnilaraat.”

²⁰Qanrutai-llu, “Tau͡gaam elpeci cauyuksecia?” Peter-aam kiugaa, “Taunguuten Agayutem Christ-aa.”

²¹Tau͡gaam inerqurai kitumun qanrutkesqevkenaku man'a.

²²Qanerluni-llu, “Yuum Qetunraa nangteqciquq, qessakumaarkauguq-llu ciulirnerni agayulirten͞gunerni-llu, igatulini-llu, tuqucimaarkauniluni-llu, erenret-llu pingayuatni makcecimaarkauluni.”

²³Tamalkuita-llu qanrutai, “Kia imum maligcukunia, ellminek arcaqakenrilli kelistani-llu qugluku maligglua-llu.

²⁴Kia imum unguvani qunukekuniu tamarciqaa, tau͡gaam wii piteklua unguvaminek pegcilriim piksagutarkaugaa.

²⁵Wani-wa yuum nuna tamalkuan piksaguteng'e'rmiu tarneni tau͡gaam tamarluku, tua-llu tamakut cakciqaki?

²⁶Tua-i wangnek qaneryaramnek-llu talluryuutekilria, tauna Yuum Qetunraan cali talluryuutekciqaa tekiskuni ucurnartuumarmi, Atami-llu ucurnarquciakun, an'gilat-llu tanqilriit ucurnarquciatgun.

²⁷Waniwa piciulriamek qanrutqataramci, maani nangengqalriit ilait tuqu elpekngaitaat Agayutem angayuqauvia tangerpailegmegteggu.”

²⁸Erenret pingayunelgen pellugngatqerluki makut qallatellmi kinguatgun, Peter John-aaq-llu James-aaq-llu malikluki mayurtuq ingrimun piicagyarturluni.

²⁹Piicainanrani-llu kegginaa allayuurtuq, aturai-llu qat'riqapiggluteng qitngirnaqluteng.

³⁰Tangerrluku-llu, yuuk malruk qallatellgutkaak, Moses-aam Elijah-m-llu.

³¹Taukuk alairtuk ucurnartuumarmek qallallutek-llu elliin tuqumek aturarkaucianek ukaqvaggun, Jerusalem-aami.

³²Peter ilagni-llu qavaryukapigtut, tau͡gaam seggaumangnaqngameng ucurnarqucia tangrraat, cali-llu taukuk nangengqallgutek.

³³Ayakatainanragni, Peter-aam Jesus-aaq qanrutaa, “Ataneq, maancuuminaqvaa, pingayunek enelilta, elpenun Moses-aamun-llu Elijah-mun-llu.” (Wani-wa qanrucini nallua.)

³⁴Makunek qallasnginanrani amirlutanguq naligluki, tuaten-llu piameng alingut.

³⁵Tuaken-llu amirlumek erinamek niitut, waten qanerluni, “Wani-wa Qetunraqa, nakmik'ngaqa, ellii niisngaciu.”

³⁶Erinamek niicimariameng, Jesus-aaq tangrraat kiimenaku. Tamatum-llu nalliini qanrutkenritaat kitumun tangllerteng.

³⁷Tua-i-llu unuaquan, ingrimek atraumariata, yugugaat pairrsaagaat.

³⁸Tangerrluku-llu, yugugaat iliit qayagauq: “Ataneq, kaigavikamken, qetunraqa paqesgu, kiingan yukngamku.

³⁹Tangerrluku-llu, anernerrluum kaugaqani alqunaq qanpagalartuq, cagniqercet'laraa-llu kapniurteqevkarluku-llu, qiurqelaraa-llu uitacugpek'naku-llu.

⁴⁰Elitnauraten-llu kaigaviksaaqanka anevkaasqelluku, tau͡gaam caperqaat.”

⁴¹Jesus-aaq-llu kiuguq, “Arenqiapaa, ukuni ukverkilngurni kinguveqellriani, iqlutmuryulriani-llu, qaillun pitalriamek elpenciiqsia ilalcirlua? Qetunraan taisgu.”

⁴²Taisnginanratni-llu, anernerrluum ayaluqercetaa cagniavkarluku-llu. Tau͡gaam Jesus-aam anernerrluk inerquraa, tan'gaurluq-llu tauna anirturluku, atiinun-llu tunluku.

⁴³Tamarmeng-llu irriut Agayutem ucurnarqucianek. Irriinanratni pillrinek tamalkuitnek, elliin elitnaurani qanrutai,

⁴⁴“Makut qaneryaranka keviuciki ciutevcen̄un, Yuum Qetunraan tunumaarkaucianek yuut unataitnun.”

⁴⁵Tau͡gaam taukut camek qanruciitaat ipesngiimegteggu taringellerkaa, civuuraluteng-llu aptellerkaanek.

⁴⁶Tua-i-llu ayuqenriqertut apyutaagulluteng-llu ellmeggnun, nalirteng ciuqliullerkaanek.

⁴⁷Jesus-aam-llu umyugait elpekngamiki, mikelngurmek tegutuq caniminun-llu aqumlluku,

⁴⁸qanrulluki-llu, “Kia imum una mikelnguq ciuniuquniu wii atemkun wiinga ciuniuraanga, wangnek-llu ciuniurilriim ayagcesteka-llu ciuniuraa. Ilasi ellmikutuunrulria tauna ciuqliuguq.”

⁴⁹Tua-i-llu John-aaq qanertuq, “Ataneq, tangertukut anernerrlugnek anevkarilriamek aterpegun, wangkuta-llu inerqurarput ilakenrilamteggu.”

⁵⁰Tau͡gaam Jesus-aam qanrutaa, “Inerquqaunrituq, tua-i elpecen̄ek inglukinrilnguq ikayurtekarci.”

⁵¹Tua-i mayuucimallerkani canimellian, Jerusalem-aamun ayallerkaminek taqngairutuq, ciumikun-llu elpengcarilrianek ayagceciuq.

⁵²Taukut-llu ayagtut Samaria-rmiut-llu nuniita iliitnun iterluteng, ellii upyutnaluku.

⁵³Tamakumiut-llu ciuniunritaat, Jerusalem-aamun ayiin.

⁵⁴Elitnauragken-llu, James-aam John-aam-llu, man'a taringamegnegu, qanertuk, “Ataneq, kenermek-qaa pakmaken igcisqumaarpekuk ukut piunrirtelluki?”

⁵⁵Tau͡gaam elliin tuiggviklukek inerqurak qanerluni-llu, “Qaillun ayuqelriamek anerniumacirpecen̄ek nalluuci.

⁵⁶Wani-wa Yuum Qetunraa tekitenrilan piunririyarturluni yuut yuuciatnek, tau͡gaam anirturyarturluki.” Allanun-llu nunanun ayagtut.

⁵⁷Ayainanratni-llu yuum qanrutaa, “Maligtaqunaamken ayallren tamalkuan.”

⁵⁸Jesus-aam-llu qanrutaa, “Kaviaret igtengqelartut, yaqulget-llu unglungqelartut, tau͡gaam Yuum Qetunraan qamiquni nekaitaa.”

⁵⁹Alla elliin cali qanrutaa, “Maligesnga.” Tau͡gaam qanertuq, “Ataneq, ciumek atamnek tungmagciyarturraarcessnga.”

⁶⁰Tau͡gaam qanrutaa, “Tuqumalriit ilameggnek tungmagcikilit, elpet tau͡gaam, ayakina qaneryariurluten Agayutem angayuqauvianek.”

⁶¹Allam cali qanrusmia, “Maligciiqamken, Ataneq, tau͡gaam tua-ingunrituurcetraarnga ilamnek.”

⁶²Tau͡gaam Jesus-aam qanrutaa, “Yuk nunamek itumcissuutem epuanek tegumiarluni kingyalria Agayutem angayuqauvianun atuunrituq.”