Read Yupik Deuteronomy 1 Bible Online

Deuteronomy 1 - Yupik bible

Deuteronomy 1

¹Makut maa-i Moses-aam qanellri tamalkuitnun Israel-aam yuinun Kuigem Jordan-aam calaralirnerani yuilqumi uitallermeggni. Jordan-aam Kuignayuani uitallruut yaaqsinrilkiini Suph-am, yaatiitni nuna Paran-aaq uitaluni, nunat-llu Tophel, Laban, Hazeroth, Dizahab-aq-llu yaalirneratni qukaatni taukut uitaluteng.

²(Ernerrluni qula ataucimek cipluku ayagnarquq Ingrimek Sinai-amek Kadesh Barnea-mun tumekluki qemililria Edom-aam nunii.)

³Cali allrakut yuinaak malruurtellragni, erenrin ciuqliatni iralut qula ataucimek cipneratni, Moses-aam qanrutellrui Israel-aam yui tamalkuitnek ATANERMEK alerquumacini aturluku.

⁴Una pillruuq kinguakun ATANREM cirlakillmi Sihon-aamek angayuqratnek Amorite-at, atanirturilriamek Heshbon-aami, cali-llu Og-amek angayuqranek Bashan-aam, atanirturilriamek Ashtaroth-aami Edrei-mi-llu.

⁵Yuut uitallratni Jordan-aam calaralirnerani, Moab-am nuniini, Moses-aam taringnarcaraa una alerquun qanerluni.

⁶“ATANEQ Agayutvut qanellruuq wangkutnun Ingrimi Sinai-ami, ‘Akaurtuq uitangucirci wani ingrimi.

⁷Upluci ayagci. Ayagci qemilegmun Amorite-at nuniitnun, tamalkuitnun-llu Arabah-mi avaqliitnun, qemililriami nunami qerkilngurni-llu nunami, cali-llu Negeb-aamun, imarpiim-llu cen̄iinun, Canaan-aarmiut nuniitnun, Lebanon-aamun-llu, tekilluku kuigpak, Kuik Euphrates-aaq.

⁸Tangerrluku elkartellruaqa nuna ciunerpecen̄un; iterluci piksaguciu nuna ATANREM akqutkellra atavcen̄un Abraham-aamun, Isaac-aamun Jacob-aamun-llu, cikiuteknaluku ellaitnun kinguvritnun-llu.’

⁹“Taum nalliini wiinga qanellruunga elpecen̄un, ‘Wiinga kiima qaunqesciigaliamci,

¹⁰ATANREM Agayutevci amllerivkaaci, tangerrluku-llu, mat'umi ernermi amllertacirci ayuquq qiliim agyaitun yugyagiavci.

¹¹ATANREM, atavci Agayutiita, amllertacirci tiissitsaarqunek ilaliu, atawaqertelluci-llu, akqutni elpecen̄un aturluku!

¹²Qaillun kiima caliaqsugngasia arturnarqucirci inglukuceci-llu?

¹³Cucuklirci umyuartulrianek, taringumalrianek, elisngalrianek angutnek, tamalkuitnek ilakutellriartarpecen̄ek, wiinga-llu elkarciiqanka ciuliqagten͞gurrluki elpecen̄un.’

¹⁴Elpeci-llu kiullruarpecia, ‘Una wani qanellren atuyunarquq wangkutnun.’

¹⁵Tua-i ilakellriarpeci ciuliqagtait, umyuartulriit elisngalriit-llu angutet, elkartellruanka ciuliqagten͞gurrluki elpecen̄un, picirkiristen͞gurrluki tiissitsaanun, yuinarnun tallimanun, yuinaak malruk qulmek cipnelegnun, qulnun, atanerruanek-llu, yuullgutkelriani tamiini.

¹⁶“Taum-llu nalliini cuqcistet alerqullruanka, ‘Niicugniciki pinerrlugutait anelgutevci, elluarrlukek-llu cuqeskicikek angun anelgutii-llu, wall'u allaneq elliini uitalria.

¹⁷Cuqcillerpeciuggun aipaanun ingluarngaituci; niicugniciqaci pikegtaunrilnguut angelriarulriit-llu ayuqluki. Kina akilkarkaunritarci, tua-i-wa cuqciyaraq Agayutem pikngaku; pinerrlugun-llu elpecen̄i arturnarqekan, taitarkaugaci wiinga-llu niicugniciqaqa.’

¹⁸Taum-llu nalliini alerqullruamci canek tamalkuitnek atu'urkarpecen̄ek.

¹⁹“Tua-i-llu Mount Sinai-amek ayallruukut tumekluku-llu angelria alingnarqelria yuilquq tangelci ayallemten̄i nunamun qemililriamun Amorite-at nuniitnun, ATANREM Agayutemta alerquuciatun; tekilluta-llu Kadesh Barnea-mun.

²⁰Wiinga-llu qanellruunga elpecen̄un, ‘Tekituci qemililriamun Amorite-at nuniitnun, ATANREM Agayutemta wangkutnun cikiutiinun.

²¹Tangerrluku, ATANREM Agayutevci ciuqerpecen̄un nuna ellillrua; ullagluku piksaguciu. ATANREM, atavci Agayutiita, elpecen̄un qanellruciatun; alingyaqunaci wall'u nanikualuci.’

²²“Tua-llu tamarpeci taillruuci canimnun, qanerluci-llu, ‘Ataki ayagcecilta angutnek ciunemten̄un, paqluku yuvrirnauraat nuna, qanrutniaraitkut-llu nau͡gg'un ayallerkamten̄ek nunarpagnek-llu tekitarkamten̄ek.’

²³“Tamana-llu wangni assirngatellruuq. Tua-llu qula malrugnek cipluku angutnek cucuklillruunga ilavcen̄ek, ataucimek angutmek ilakutellrianek tegutaqlua.

²⁴Taukut ayallruut qemililriamun nunamun, tekilluteng-llu Kuignayuanun Eshcol-aam yuvrirluku-llu.

²⁵Tegulluteng-llu atsautain nunam ilaitnek tailluki-llu wangkutnun, qanrulluta-llu, ‘Assilriaruuq nuna ATANREM Agayutem wangkutnun cikiutii.’

²⁶“Tau͡gaam elpeci ayagyuumiitellruuci tamaavet, inglulilluci alerquutiinun ATANREM Agayutevci.

²⁷Qanemyuugarluci-llu pelatekarpecen̄i, qanerluci, ‘Agayutem eq'ukngamikut anulluta ayautaakut Egypt-aamek, tunenaluta Amorite-anun piunriisqelluta.

²⁸Ciin tua-i ayakatarceta? Alingyaaqvagceta. Ayagcetlemta angutet qanrutaakut, “Yuut angenruut sugtunruluteng-llu wangkutni; nunarpait-llu angluteng, asvailkuciumaluteng qilak tekilluku; cali-llu tangellruaput Anakim-aam qetunrai.”’

²⁹“Tua-llu wiinga qanertua elpecen̄un, ‘Uluryakenriciki alikevkenaki-llu.

³⁰ATANREM Agayutevci, ciunerpeciuggun ayalalriim ingluliuruciiqaaci, tangvallrucirpecetun tuaten pillrani elpeci pitekluci Egypt-aami,

³¹yuilqumi-llu, tuani tangellruarci qaillun ATANREM Agayutevci kevegluci ayautellrukiici, aataulriim irniani kevegluku ayautelauciatun, tamiin tumevcen̄i maavet tekisvigpecen̄un.’

³²Tau͡gken mat'umek qanrucimang'e'rpeci ukveqellrunritarci ATANEQ Agayutsi,

³³ciunerpeciuggun ayalalria yuarulluci nani pelatekarvigkarpecen̄ek, kenerkun-llu unugmi apertuutnaluci tumkarpecen̄ek, amirlukun-llu erenrani.

³⁴“ATANREM-llu niitellrui qanelci, qenqerrluni-llu, akqillruuq,

³⁵‘Ukut iliita assiilnguulriit yuut atauciunge'rmi tangerrngaitaa assilria nuna akqutkelqa cikiutekarkauluku atavcen̄un,

³⁶Caleb-aam tau͡gaam Jephunneh-am qetunraan tangerciqaa, elliinun irniarinun-llu tunciqaqa nuna elliin tutmallra, tua-i-wa maligtellruaku tamalkirrluni ATANEQ!’

³⁷ATANREM-llu wiinga qenrutellruanga elpeci pitekluci, qanerluni, ‘Elpet-llu tuavet iterngaituten;

³⁸Joshua Nun-am qetunraa, nangerngalria ciuqerpeni, iterciquq; eguaqurru, tua-i elliin Israel-aamun piksaguceciiqngaku.’

³⁹“Tua-llu ATANREM tamamta qanrutaakut, ‘Irniaci, mat'um nalliini nallulriit assilriamek assiilngurmek-llu, imkut qanrutkelci teguarurciiqniluki, iterciqut tamaavet nunamun. Ellaitnun cikiutekciqaqa ellaita-llu piksaguciiqaat.

⁴⁰Elpeci tau͡gaam, tuiggluci, ayagci yuilqumun Red Sea-m tungiinun.’

⁴¹“Kiullruarpecia-llu, ‘Wangkuta assiilngirtukut ATANERMUN; ayagluta callugciqukut, ATANREM Agayutemta alerqullruciatun.’ Tamarpeci-llu angutni naqugtuci caskuvcen̄ek anguyagcuutnek, umyuarteqluci-llu qacignaqsukluku ayallerkarci qemililriamun nunamun.

⁴²“ATANEQ-llu qanertuq wangnun, ‘Qanruski, Ayagyaqunaci wall'u anguyagyaqunaci, akunlevcen̄i uitanrilama; ingluvci cirlaksuaraiceci.’

⁴³Tuaten qanellruunga elpecen̄un, elpeci-llu niicugniyuumiitellruuci; ingluliurarci tau͡gaam alerquutii ATANREM, elpecen̄ek-llu pivakellerci aturluku ayagtuci qemililriamun nunamun.

⁴⁴Amorite-at-llu tamaani qemililriami nunami uitalriit ingluliraiceci malirqerluci-llu evegtaat pilauciicetun, cirlakluci-llu Seir-ami Hormah tekilluku.

⁴⁵Uterrluci-llu qiaguci ATANREM ciuqerrani; ikayuusqelluci tau͡gaam ATANREM erinasi niitenritaa ilangcivkenaci-llu.

⁴⁶“Taumek uitallrulriaci Kadesh-aami amllerni ernerni.