Read Yupik Deuteronomy 10 Bible Online

Deuteronomy 10 - Yupik bible

Deuteronomy 10

¹“Tua-llu taum nalliini ATANEQ qanertuq wangnun, ‘Pilinariaten malrugnek teggalqugnek manigcetellriignek, ciuqliigtun ayuqlukek, yaassiililuten-llu muragmek caqukakegnek. Nutaan mayurniartuten ingrimun ullaglua.

²Nutaan wii igarciqua taukugnun manigcimalriignun teggalqugnun igautellemnek ciuqliignun navvlerpet. Nutaan taukuk yaassiigmun ekniagken.’

³“Tua-i wii yaassiilillruunga muragagnek acacia-gnek teggalqugnek-llu mamcartellriignek ciuqliigtun ayuqellriignek, nutaan-llu mayurlua ingrimun taukuk teggalquk tegumiaqlukek.

⁴Taukugnun-llu teggalqugnun igartuq, ciuqlirmek igallerminek, qulnek alerquutnek, elliin ATANREM qanrutkellerminek elpecen̄un tuani ingrimi kenrem tungiinek quyungqallerpecen̄i; Nutaan-llu taillukek wangnun,

⁵tuigglua-llu ingrimek atrartua. Taukuk-llu igarviik ellillruagka yaassiigegnun piliallemnun; tua-i tuantaurtuk ATANREM alerquutekellratun.”

⁶(Israel-aam-llu yui ayagtut tuaken Jaakan-aam elakain nuniitnek Moserah-mun. Tuani Aaron-aaq tuquuq tuani-llu tungmagcimaluni, qetunraan-llu Eleazer-aam enii teguluku agayulirten͞gurrluni.

⁷Tuaken-llu ayagtut Gudgodah-mun, tuaken-llu Jotbathah-mun, nunamun mel'ilriamun.

⁸Taum nalliini ATANREM allakallrui Levi-aq ilai-llu ayagacisten͞gusqelluki Akqutem Yaassiigtaanek, kevgiureskelluki ellminun agayulirten͞guluki, at'mikun-llu atawaqercecilaasqelluki. Makut-llu maa-i mat'um nalliini cali caliaqait.

⁹Taumek Levi-aq ilani-llu akurtullrunrilnguut nunamek allat ilakellriit pillruciicetun; akurtullruameng piunarqucimek ATANREM agayulirtekarkauluki, ATANREM Agayutevci akqellruciatun.)

¹⁰“Uitallruunga-llu ingrimi ernerni unugni-llu yuinaagni malrugni ciuqlirmi pillrucimtun. ATANREM-llu niitellruanga cali tuani, puinriryuumiirulluci.

¹¹ATANREM-llu qanrutaanga, ‘Upluten ayii ciunratgun yuut, ayagnaurtut piksagucarturluku nuna akqutkelqa ciuliaritnun cikiutekciqniluku.’

¹²“Watua, Israel-aami, qaillun ATANREM Agayutem pisqaten? Qigcikesquq ATANEQ Agayutsi, pisqutni atuusqai, kenkesqelluni kevgiuresqelluni-llu ircaqurpeciuggun yuucirpeciuggun-llu tamalkirrluci,

¹³niisngaluki tamalkuita alerquutai. Wiinga cikiutekanka elpecen̄un unuamek piluaqautekesqelluki.

¹⁴ATANREM pikngaki quyinkacagaungraata qiliit; nuna-llu cali elliin pikaa ca-llu tamalkuan nunam qaingani uitalria.

¹⁵Tau͡gken ATANREM kenkellruamiki cakneq ciuliaci cucukaaci allat yuut pivkenaki, cali maa-i cucukek'ngaqluci yukaaci.

¹⁶Kitaki wak'nirnek niisngakiciu ATANEQ, pamaitenrirluci.

¹⁷Tua-i ATANEQ Agayutsi piunruuq tamaitni agayutni pinilegni-llu, angtataituq artuqaunani niisnganarqellriaruluni-llu. Ingluarvikek'ngaituq akilirtelluni-llu camek pingaunani.

¹⁸Elluarrluteng aulukumanritlerkaat murilkelaraa elliraat aipainret-llu; kenkelarai allanrulriit nunamten̄i, cikiraqluki neqkaitnek atu'urkaitnek-llu.

¹⁹Taumek kenkiciki allanrulriit, tua-i-wa elpeci-llu allanrullruavci Egypt-aami.

²⁰Takaqiciu ATANEQ Agayutsi agayuaqluci elliinun kiingan. Piciuluci elliinun, akqiquvci-llu elliin atrakun tau͡gaam piaqluci.

²¹Nanrarciu ellii, Agayutkarci. Tungaunaci tangellruaci angelriit irr'inarqelriit caliallri elpeci pitekluci.

²²Ciuliaci ayallermeggni Egypt-aamun yuinaat pingayun qulnek cipluku (70) amllertallruut. Tau͡gaam maa-i ATANREM Agayutevci amllerivkaraaci agyatun qilagmi pitariluci.