Read Yupik Deuteronomy 11 Bible Online

Deuteronomy 11 - Yupik bible

Deuteronomy 11

¹“Kenkiu ATANEQ Agayuten kesianek niisngaluki-llu alerquutai.

²Neq'akiciu unuamek elitellerci ayuqucianek ATANREM caurallerpeciuggun ilakluku. Elpeci makut atullruaci, irniarpeci pillrunritait. Elpeci tangellruarci ATANREM pinia, angtatailucia, artuqailucia-llu,

³irr'inarqelrialiari-llu. Tangellruarci-llu qaillun pillra Angayuqranun Egypt-aam tamiin-llu nuniinun.

⁴Tangellruarci piunririllra tamaitnek anguyagtainek Egypt-aam, horse-aartuumaita qecuqitevkarluki imarpigmi Red Sea-mi elpecen̄ek malirqallratni.

⁵Nallunritarci-llu qaillun elpecen̄ek aulukillra tamaani yuilqumi maavet tekipailegpeci.

⁶Nallunritarci-llu cali qaillun pillra Dathan-aamun Abiram-aamun-llu, qetunraagkenun Eliab-aam, Reuben-aam yuini; qaillun tamarmeng takuatni nuna qupellrulria, taukut-llu igcata nunam patuluki, tapqulluki ilakutait, pelatekait, kevgait, ungungssiutait-llu.

⁷Tua-i elpeci tangellruuci makunek irranarqelrianek ATANREM pillrinek.

⁸“Niisngaciu tamalkuan alerquutekelqa elpecen̄un unuamek. Nutaan piningqerrniartuci qeraryugngariluci nunamun piknaluku ullakevcen̄un.

⁹Tua-i uitaciquci ak'anun assilriami naungignarqelriami nunami ATANREM akqutkellranun ciuliarpecen̄un kinguvritnun-llu cikiutekciqniluku.

¹⁰Nuna tamana piksagutarkarci ayuqenrituq nuniitun Egypt-aam uitavikellerpeci. Tuani nauceciigaqavci mukaarkanek cakviurluci calilallruuci mertengnaqluki naucetaarviit.

¹¹Tau͡gaam nuna itrarkarci ingringqertuq kuignayugluni-llu, merqumaaqluni ellallugkun.

¹²ATANREM Agayutevci auluk'laraa tamana nuna murilkaqluku-llu allrakuq kassugluku.

¹³“Taumek kitaki niisngakiciki alerquutet elpecen̄un cikiutekellrenka unuamek; kenekluku ATANEQ Agayuten kevgiurluku-llu ircaqurpegun tamalkirrluten.

¹⁴Tuaten pikuvet elliin ellallircet'larciqaa nunavnun pinariaqan, uksuarmi cali-llu up'nerkami, quyurcilaasqelluten mukaarkanek, wine-arkanek, uquuciarkanek-llu olive-aanek.

¹⁵Nunauten-llu naugivkalarciqaa canegnek, neqkaitnek kuluvagpet; elpet-llu nerlarciquten camirrluten.

¹⁶Tau͡gaam iqlutmurucecimayaqunak, avvluten ATANERMEK agayunaluten kevgiurluten-llu allanek agayutnek.

¹⁷Tuaten pikuvet ATANREM qenruciiqaaten. Ellallircessngaitaa, nuna-llu kinerciqaa naunraat nausciigalivkarluki. Elpet-llu ak'anun uitavkenak tamaani tuquciquten, nuna tamana assingraan ATANREM cikiutii elpenun.

¹⁸“Neq'akiki makut alerquutet ilukegcitekluki-llu. Qillrulluki tallirpenun aturluki-llu qaurarpeni nalluyagucailkutekluki.

¹⁹Elitnaurutkiki irniarpenun. Qalarutkaqluki enevni uitaaqavet ayaumang'e'rpet-llu, mernuinercillerpeni calillerpeni-llu.

²⁰Igaulluki enevet amiigan caniqaagkenun ikirtuqerpenun-llu.

²¹Nutaan unguvamaciquten irniaten-llu nunami ATANREM Agayutvet akqutkellrani ciuliarpenun cikiutekciqniluku, pikarkauvkarluku qiliim piullran taktaciatun nunam quliini.

²²“Tua-i atungnaqu'urquvciki tamalkuita alerquutekellrenka elpecen̄un atuusqelluki, kenekluku ATANEQ Agayuten, pisqutii-llu maliggluku, piciuluten-llu elliinun,

²³nutaan ATANREM anciiqai tamalkuita angayuqauvilget ciutmurtellerpecen̄i, uitaviksaguciiqerci-llu nuna yuut elpecen̄i angenrulriit pininrulriit-llu pikellrat.

²⁴Tamalkuan nuna tumllerci pikciqerci. Nuna pikarci ayagnirciquq yuilqumek ungalalirnermi Lebanon-aam ingrii tekilluki neglirnermi cali-llu Kuigmek Euphrates calaralirnermi imarpik Mediterranean kanaknelirnermi tekilluku.

²⁵Natmun tamiin ayallerpecen̄i tamaani nunami, ATANREM Agayutevci uluryakevkarciqaaci tamatum yuinun elliin akqellrucirmitun, kia-llu imum arulairtesciigaciiqaaci.

²⁶“Tangerrluku unuamek cucuklillerkarpecen̄ek piamci; aipaa atawaqautnguluni aipaa-wa aniqlaan.

²⁷Atawaqautmek cucuklirciquci ATANREM Agayutevci alerquutai atuquvciki maa-i unuamek cikiutekek'nganka;

²⁸tau͡gken aniqlaatmek cucukiluci makut alerquutet atunrilkuvciki avvluci-llu allanun agayutnun nallukevcen̄un agayularnaluci.

²⁹Cali ATANREM Agayutevci iluvauskaci nunamun itrarkarpecen̄un piksagutarkauluku atawaqaasqiciquten Ingrimek Gerizim-aamek aniqlaaluten-llu ingrimek Ebal-aamek.

³⁰(Ukuk malruk ingrik uitauk kanaknelirnerani Kuigem Jordan-aam, nunautiitni Canaan-aarmiut, uitaluteng kuignayuani Jordan-aam. Tamaantut kanaknalirnermi yaaqsigpek'naku napa Moreh, nunarraam Gilgal-aam yaaqsinrilkiini.)

³¹Elpeci qerararkaurtarci Jordan-aaq piksagulluku-llu nuna ATANREM Agayutevci cikiutekaa elpecen̄un. Tegukuvciu uitaviksagulluku-llu

³²pinritevkenaci niisngakiciki tamalkuita alerquutet cikiutekellrenka elpecen̄un unuamek.