Read Yupik Deuteronomy 12 Bible Online

Deuteronomy 12 - Yupik bible

Deuteronomy 12

¹“Makut maa-i picirkiutet niisngaarkaci unguvallerpeci taktaciatun uitallerpecen̄i nunami ATANREM Agayutiita ciuliarpeci cikiutekaani.

²Nunami tamaani piksagutarkarpecen̄i piunriqiciki tamalkuita yuut agayutmeggnun agayuvikelallrit ingrini, qemini, napat-llu cungagcetellriit aciatni.

³Navguqiciki ekuaviit ciqumlluki-llu qigcikekait teggalqut napartat. Ekualuki-llu alailutai agayutnguam Asherah-m cali-llu piqertuarluki iqulluki agayutnguarit, agayunqiggviirluki tamakut nunaitni.

⁴“Agayuksaunaci ATANERMUN Agayutevcen̄un tamakut yuut agayulauciicetun agayutmeggnun.

⁵Nunautaita ilakutellriit akunlevcen̄i iliitnek ATANEQ cucuklirciquq ataucimek ullalararkarpecen̄ek ciuqamini agayuvigkarpecen̄ek.

⁶Tuavet ekuagarkat elliiteci allat-llu taitelarciqaci: qulngurutet elliitet, cikiutet-llu akqutkelci ATANERMUN, piyuumirluci elliiteci, irniqarraarutait-llu kuluvautevci qusngiyagautevci-llu.

⁷Tuani ciuqerrani ATANREM Agayutevci, atawaqautnek cikirtevci, elpet ilaten-llu nerciquci assilrianek caliarpeciuggun unakellerpecen̄ek.

⁸“Tauna tuaten pillerkarci tekiskan, maa-i ayuqucirci ayuquciqsaqunaciu. Una-wa tekilluku assiryukelci umyuarpeciuggun aturluku piavci.

⁹Tua-i-wa tuaten pilriaci iteqsailavciu nuna ATANREM Agayutevci cikiutekaa elpecen̄un, uitanqegciluci uitavigkarci.

¹⁰Jordan-aaq Kuik qeraquvciu ATANREM nuna tamana elpecen̄un nunakevkarciqaa, tamakumiunguvkarluci. Elliin inglukestevcen̄un pivkarngaitaaci, uitanqegciluci-llu tamaanciiquci.

¹¹ATANEQ cucuklirciquq ataucimek agayuvigkamek ellminun, tuavet-llu taitelarciqaci elliinun tamalkuita wii alerquutekellrenka: ekuagarkat elliiteci allat-llu, tamalkuita qulngurutet elliitet, cali cikiutet akqutkelci ATANERMUN.

¹²Nunaniryukici tuani ciuqerrani, ilakluki irniaci, kevgaci, Levite-at-llu uitalriit nunavcen̄i; tua-i-wa Levite-at nakmiin pimeggnek nunautengqerrngailata.

¹³Elliitnek-llu ekuagingaituci piciatun piyullerpecen̄i.

¹⁴Tau͡gaam ekuagiarkauguci ataucimi ATANREM cucukellrani ilakellriit ilavci nunautiitni. Tuani kiingan tau͡gaam ekuagarkanek ekuagilarciquci, cali-llu allat piarkat piluki alerquutekellrenka elpecen̄un.

¹⁵“Tau͡gaam tuquciyugngauci nerluci-llu ungungssiutevcen̄ek nunavcen̄i piyugtacirpecetun ATANREM Agayutevci cikiumataciatun. Tamarpeci menuliumang'e'rpeci menuileng'e'rpeci-llu neryugngauci, tuntut kemgitnek nerlaucirpecetun.

¹⁶Tau͡gaam elpeci ner'arkaunritarci augat; nunamun kuv'arkaugarci mertun.

¹⁷Ca-llu elliiteklerci nerumaarkaunrituq uitavigpecen̄i: mukaarkaunge'rmi, wall'u wine-aq, wall'u olive-aat uquat, wall'u ungungssiutevci irniqarraarutait, wall'u cikiutet akqutkelci ATANERMUN, wall'u piyuumirluci elliiteci, wall'u alla caungraan elliitekumalria.

¹⁸Tau͡gaam neryugngaaci ciuqerrani ATANREM Agayutevci pivigkami cucukellrani, elpet qetunraan paniin-llu, kevgaten angutet arnat-llu, Levite-aq-llu nunani uitalria. Angniutekiki-llu tamalkuita calialten.

¹⁹Pinritevkenak-llu nallungualarngaitaten Levite-at unguvarpet taktaciatun nunavni.

²⁰“Tua-llu ATANREM Agayutevci ilakaku nunautsi, akqellrucimitun, kemegmek nerlarciquci piyungaqavci.

²¹Tauna-llu cucukumalria agayuvigkaq yaaqsissiyaakan, tua-i piyugaqavci tuqucilarciquci piciatun kuluvagmek wall'u qusngiyagarmek ATANREM elpecen̄un cikiutekellrinek, nerluci-llu tamakunek nevcen̄i qanrutellrucimtun.

²²Kina imna menuliumang'e'rmi menuileng'e'rmi-llu nerciquq kemegmek, nerlaucirmitun kemganek tuntum.

²³Neryaqunaci tau͡gaam kemegmek augtuumaan, tua-i auk unguvakngaku, ner'arkaunritarci-llu tamana unguvaulria kemegmun tapqulluku.

²⁴Auk ner'arkaunritarci; tau͡gaam kuv'arkaugarci nunamun mertun.

²⁵Alerquun una atuquvciu ATANEQ ilukegciciquq, assirluci-llu piurciquci kinguveci-llu.

²⁶Taiciki tuavet cucukumalriamun agayulallerkarpecen̄un elliitet cikiutekaci-llu akqutkumalriit ATANERMUN.

²⁷Elliitekiciki-llu tuani ekuagarkat qamlluteng ekuamaarkaulriit ATANREM ekuaviani. Elliitekiciki-llu cali ekuamaarkat tamakut kemgit ner'arkaci kuvluku-llu augat ekuavigmun.

²⁸Niisngaciki pinritevkenaki tamalkuita alerquutellrenka elpecen̄un, assirluci piurniartuci kinguveci-llu ukanirpak, tua-i-wa tuatnakuvci piciulria aturciqngavciu ilukegcitkekii-llu ATANREM Agayutevci.

²⁹“ATANREM Agayutevci piunrirciqai angayuqauvilget nuniitnun itquvci, yirciqerci uitaviksagulluku-llu.

³⁰ATANREM piunriumarikaki tamakut angayuqauvilget, mulngakekici maligtaqungyuaci agayuyarait, tuaten pillerkaq aarnaqngan. Paqnayugluci-llu kangiituqsaunaku qaillun agayulallrat agayutmeggnun, umyuarteqluci elpeci-llu agayulauciicetun pinaluci.

³¹Agayuyaqunaci ATANERMUN Agayutevcen̄un tamakut yuut agayulauciicetun agayutmeggnun, tua-i-wa agayuaqameng agayutmeggnun ca tamalkuan ATANREM eq'ukqapigeskii atulaatgu; paniteng tuaten wall'u qetunrateng ekuavimeggni ekuagaqluki.

³²“Alerquutekellrenka tamalkuita atuqiciki; ilangaitaci-llu wall'u ilangarrluki.