Read Yupik Deuteronomy 14 Bible Online

Deuteronomy 14 - Yupik bible

Deuteronomy 14

¹“Elpeci yukaaci ATANREM Agayutevci. Taumek tuquigaqavci elpecen̄ek kilirturyaqunaci wall'u qauraci asmeggluki allat yuut pilauciicetun.

²ATANREM Agayutevci pikaaci; elliin cucukellruaci nakmiin yuknaluci akuliitnek yuut amlleqapigtellriit nunami.

³“Neryaqunaci camek ATANREM qanrutkellranek menuulriaruniluku.

⁴Makut maa-i nerlarciqaci ungungssiaraat: kuluviit, qusngit, qusngirngalnguut,

⁵tuntut, yuilqurmiutaat qusngit qusngirngalnguut-llu, tunturngalnguut antelope-at,

⁶allat-llu ungungssiaraat avgumalrianek cetumqulget cali neqmeggnek tamuanqigtetulit.

⁷Ca ungungssiar nerumangaituq tau͡gaam tamakut avgumalrianek cetumqulget cali-llu igglermeggnek tamuanqigtetulit. Makut maa-i ner'arkaunrilkeci: ungungssit qulugtellriit, qayuqegglit, uiret-llu. Menuurrnarqelriaruluteng pimaut tamuanqigtelange'rmegteki nerelteng, cetumqurrit avgumanrilata.

⁸Cali-llu sitiinkaat, cetumqungqeng'e'rmeng avvingalrianek tamuanqigcuilatki nerelteng. Makut ungungssit neryaqunaciki agtuqsaunaki-llu temait nalaaqata.

⁹“Nerlaqici neqnek qeltelegnek nakrut'legnek-llu,

¹⁰tau͡gaam mermi uitalria nakrutailnguq qeltailnguq-llu nerngaitarci; menuulriaruuq elpecen̄un.

¹¹“Neryugngauci-llu piciatun menuilngurnek yaqulegnek.

¹²Tau͡gaam makut maa-i yaqulget ner'arkaqenrilkeci: miterviit, kenriiret, qakurtat, eskaviat, tulukaruut, naruyat, unuirat-llu. Cali allat makut yugtun atrilnguut: buzzard-aat, vulture-aat, ostriches-aat, stork-aat, heron-aat, pelican-aat, hoopoes-aat, bat-at.

¹⁹“Tamarmeng yaqungqellriit ciissit menuulriaruut; neryaqunaciki.

²⁰Tau͡gaam menuilngurnek ciissinek neryugngauci.

²¹“Neryaqunaciu ungungssiar ca piciinaku tuqulleq. Allanret tau͡gaam nunavcen̄i uitalriit neryugngaat tauna, elpeci-llu allanernun tunyugngaluku. Tau͡gaam elpeci ATANREM Agayutevci pikaaci. “Keniryaqunaciu piyagaq qusngiyagaq qusngirngalnguq-llu aaniin milganek mirluku.

²²“Allakarilaqici qulngurutaitnek naucetaarpeci allrakut tamalkuita.

²³Nutaan-llu ayagluci tuavet ATANREM Agayutevci cucukellranun ellminun agayulaasqelluci. Tuani-llu ciuqerrani nerluci qulngurutaitnek mukaarkat, wine-at, olive-aat uquit, irniqarraarutait-llu kuluviit qusngiyagaat-llu. Waten pilaqici elitniarci qigciklerkaa kesianek ATANREM Agayutevci.

²⁴Tauna-llu cucukumalria agayularvigkarci nunavnek yaaqsissiyaakan ayaucikuvet tuavet naunrarnek ATANREM atawaqautainek elpenun, waten pikina:

²⁵Tuneniaqekiki naunrauteten akiit-llu ayaulluki tuavet cucukumalriamun agayuvigmun.

²⁶Taukut akit aturluki kipuskina camek piyullerpenek — kuluvagnek, qusnginek, wine-amek, wall'u tuknilriamek merkamek, camek-llu neryullerpenek — nutaan tuani ciuqerrani ATANREM Agayutevci ilaten-llu nerkiciki nunaniryugluci.

²⁷“Levite-at tau͡gaam nalluyagusngaitaci uitalriit nunavcen̄i, nunamek avgucimallrunrilata.

²⁸Allrakut pingayuurtaqata qulngurutait naucetaarpeci iluvautelarciqaci qemaggluki-llu nunavcen̄i.

²⁹Makut neqkat Levite-at pikaqait nunautailameng, allanret-llu cali-llu elliraat aipainret-llu nunavcen̄i uitalriit. Aqvat'larniartut enuqairulluteng. Waten pikici ATANREM atawaqercetniaraa callerci tamiin.