Read Yupik Deuteronomy 15 Bible Online

Deuteronomy 15 - Yupik bible

Deuteronomy 15

¹“Nangellrani allrakut malrunelgurutiita perrilarciqaci yuut elpecen̄i akiilnguit.

²Waten pimalarciquq: Kina navriskengellrukuni Israel-aarullgutminun perrirciqai tamakut akiilnguut. Akiilnguit tamakut tegungnaqngaitai, tua-i-wa ATANREM-llu elliin qanrutekngaku au͡gaumaluku.

³Allaneq akiilnguinek elpeni akilicivkarciqan, tau͡gaam nunavni yuullguten akiilngungqerqan elpeni akilicivkarngaitan.

⁴“ATANREM atawaqerceciiqaaci tuani nunami cikiutekamini, arrsaulriamek-llu ilangqerrngaunaci

⁵niisngakuvciu aturluki-llu tamalkuita alerquutekellrenka elpecen̄un unuamek.

⁶ATANREM atawaqerceciiqaaci akqellrucimitun. Amlleret angayuqauvilget navrit'larciqaci akinek, tau͡gaam elpeci navralarngaunaci ellaitnek; cali amlleret angayuqauvilget ataniumaciqaci, tau͡gken elpeci iliita ataniumangaunaci.

⁷“Nunarraat iliitni nunami ATANREM cikiutekaani elpecen̄un ilavcen̄ek Israelite-artangqerqan enuqitellriamek, elpenek arcaqakluten ikayuryuumiicaqunaku.

⁸Tau͡gaam qunuvkenak navriskiu nurutellra cuqluku.

⁹Navricuumiicaqunaku-llu camek piyullranek akiilnguut perriryaraat canimellirniluku. Tuaten umyuarrliqlerkan murilkekiu. Navricuumiilkuvni qayagaurutkeciqaaten ATANERMUN, elpet-llu pinarqelriaruciquten.

¹⁰Cikiqiu nagutaunak qunuvkenak-llu, ATANREM atawaqercetnauraa callren tamalkuan.

¹¹Israel-aat ilaitnek arrsaulriartangqerrlainalarciquq, enuqilluteng, taumek alerquramci qunuunaci pilaasqelluci tamakunun.

¹²“Ilasi-llu Israelite-aq, angun wall'u arnaq, kiputeskan elpenun kevgaqesqelluni, pegciiqan kevgauvkarraarluku elpeni allrakuni arvinlegni. Allrakut malrunelgat tekiskan peggluku ayagceciiqan.

¹³Pegeskuvgu-llu ayagcecaqunaku nangrraan.

¹⁴Cikiqiu qunuvkenak tamakunek ATANREM atawaqautainek elpenun: qusnginek, mukaarkanek wine-anek-llu.

¹⁵Neq'akluku teguaruluci kevgaullerci Egypt-aami, ATANREM-llu teguarunrirtelluci; taumek waniwa mat'umek alerquqemci.

¹⁶“Tau͡gaam kevgan ayagyuumiilkan kenekngamiten ilaten-llu, elpeni-llu uitayugcaliluni,

¹⁷nutaan elpet cingikellriamek tegulluten ciutiikun kapciqan ikirtuqamun assipiulluku; nutaan elpet kevgaqerkaurciiqan kesianek. Arnaq-llu kevgan tuaten cali piarkauluku.

¹⁸Kevgarpenek-llu pegcikuvet camek umyuarpegun cangayuutengqerrsaqunak, tua-i-wa allrakuni arvinlegni kevgiullruaten, akikillruluni akilirluku calistengqellerkami. Waten pikina ATANREM atawaqercetniaraa callren tamalkuan.

¹⁹“Allakarikici ATANERMUN Agayutevcen̄un pikevkarluki angucalut irniqarraarutait kuluviit qusngit-llu; calillerpecen̄i ukut kuluviit atularngaitaci, asmeggngaunaki-llu qusngit.

²⁰Allamiaquaqan makut nerlarciqaci ilaci ilakluki ATANREM ciuqerrani tuani cucukumalriami agayuvigkami.

²¹Tau͡gaam tamakut ungungssiaraat natlugnengqerqata, ipiggliqluteng wall'u cikmiumaluteng wall'u allamek assinrilngurmek natlugnerluteng, elliiteksaqunaciki ekuagarkauluki ATANERMUN Agayutevcen̄un.

²²Kingunerpecen̄i tau͡gaam neryugngaaci tamakut. Tamarpeci menuliumang'e'rpeci menuileng'e'rpeci-llu nerciquci tuntumek nerlaucirpecetun.

²³Tau͡gaam augit nerngaitaci; tau͡gaam kuvciqerci nunamun mertun.