Read Yupik Deuteronomy 16 Bible Online

Deuteronomy 16 - Yupik bible

Deuteronomy 16

¹“Takaqillerci nasvagciu ATANERMUN Agayutevcen̄un atullerpeciuggun Kituun iraluani Abib-am; uumi iralumi unugmi elliin anutellruaci Egypt-aamek.

²Ayagluci tuavet cucukumalriamun agayularvigkamun, tuani-llu tuquciluci iliitnek qusngit wall'u kuluvagmek, ner'arkarpecen̄ek Kituun, qigcikiyaraq ATANERMUN, atuquvciu.

³Nerkuvci-llu tapirngaituci kelipamek quuleciralegmek. Tua-i ernerni malrunlegni ner'arkauguci tapiraqluku kelipamek quulecirailngurmek, tuaten pillrucirpecetun cukangnaqluci Egypt-aamek ayallerpecen̄i. Nerlaqiciu una kelipaq — aterpagcimaciquq nangteqsaram kelipartaanek — unguvallerpeci taktaciatun umyuaqutekluku ernermun anllerpecen̄un Egypt-aamek nangteqnarqelriamek.

⁴Ernerni-llu malrunlegni atauciunge'rmi kina nunavcen̄i quuleciramek avalingqerrngaituq enemini; kemga-llu ungungssiaraam tuqucimallrem erenret ciuqliata atakuani nerumaarkauguq tuani unugmi.

⁵“Kituutmun ellimalriit ungungssiaraat tuqutelarngaitaci piciatun nunami ATANREM Agayutevci cikiutekellrani,

⁶tau͡gaam tuani ATANREM Agayutevci cucukellrani agayulaasqelluci ellminun. Atakumi akertem tevillrani atularciqerci, taum nalliini anellruavci Egypt-aamek.

⁷Kenirraarluku nerciqerci tuani ATANREM Agayutevci cucukellrani; taum-llu unuaquani unuakumi kingunerpecen̄un uterrluci.

⁸Tua-i ernerni arvinlegni nerlarciquci quulecirailngurnek kelipanek; erenret-llu malrunelgatni quyurciiquci agayuluci-llu ATANERMUN Agayutevcen̄un. Caliyaqunaci tuani ernermi.

⁹“Naaqici malrunlegnek nitilinek ayagnirluki kep'iqarraallerpecen̄ek mukaarkanek,

¹⁰kinguatgun aturniarci Quyurciyaram Nerevkaritii ATANERMUN Agayutevcen̄un elliitevcen̄ek iluvaulluci piullerpecen̄ek ATANREM atawaqercetellruciatun.

¹¹Nunaniryugluci ATANREM ciuqerrani, ilakluki irniaten, kevgaten, Levite-at, allanret, elliraat, aipainret-llu, uitalriit nunavcen̄i. Man'a aturarkaugaci ATANREM Agayutevci cucukellrani agayulaasqelluci ellminun.

¹²Pinritevkenaci atuqiciki makut alerquutet; nalluyagucaqunaciu teguaruluci kevgaullerci Egypt-aami.

¹³“Caranglluirumarikuvciki mukaarkat, wine-arkat-llu mecuirluki, Nerevkaritiit Uqisviit aturciqerci ernerni malrunlegni.

¹⁴Angnirluci aturniarci ilakluki irniaci, kevgaci, Levite-at, allanret, elliraat, aipainret-llu nunavcen̄i uitalriit.

¹⁵Ernerni malrunlegni nerevkarin aturarkaugarci ATANERMUN Agayutevcen̄un tuani ATANREM cucukellrani; tua-i-wa ATANREM atawaqerceciiqngaci naucetaarpeciuggun unatevci-llu caliarikun, angniisqelluci qaqimalriamek.

¹⁶“Allrakumi pingayurqunek tamarmeng angutet tailararkaugut ciuqerranun ATANREM Agayutevci tuani elliin cucukellrani: Kituutem nalliini nerevkaritiigni-llu quyurciyaram uqisviim-llu. Tamarmeng cikiutekameggnek tailluteng taiciqut

¹⁷piugngatacirmegcetun atawaqautnek cikiumacimegcetun ATANERMEK.

¹⁸“Cuqcisten̄ek cucukliqici arenqiirturtekanek-llu nunani tamaitni ATANREM Agayutevci cikiutekellrani. Makut cuqcistet cuqtelararkaugait yuut elluarrluteng.

¹⁹Cuqcillermeggni kitumun ingluarngaitut wall'u cuqciyaraq assiitellriakun aturluku; akilirtelluteng camek yuut nalluatgun pingaitut. Cikiutnek manamaarturluku pisqumalriim caliani elluarrluku pingaitaa, usvituyaaqeng'e'rmi iqluyuileng'e'rmi-llu cuqcillermini iqlutun piaqluni.

²⁰Elluarrluni cuqciyaraq kiingan atuqiciu, uitavikniarci nuna ATANREM Agayutevci cikiutii elpecen̄un tuani-llu uitaurniartuci.

²¹“Pilikuvci ekuavigmek pikaanek ATANREM Agayutevci, elliyaqunaciu canianun murak ayuqii agayutnguam Asherah-m.

²²Naparciyaqunaci-llu teggalqumek ciktaarvigkarpecen̄ek; tamakut ATANREM eq'ukai.