Read Yupik Deuteronomy 17 Bible Online

Deuteronomy 17 - Yupik bible

Deuteronomy 17

¹“Ekuagiyaqunaci ATANERMUN Agayutevcen̄un kuluvagnek wall'u qusnginek natlugnengqellrianek; ATANREM eq'ukai tuaten pilriit.

²“Akunlevcen̄i-llu yugtangqerqan angutmek wall'u arnamek assiilngilriamek ATANERMUN Agayutevcen̄un, navegluku-llu elliin akqut'liallra,

³agayullermikun kevgiullermikun-llu allat agayutet, wall'u akertem̄un wall'u iralumun wall'u agyanun, narurrluku ATANREM alerquutii.

⁴Niiskuvci tuaten pilriamek kangiitunqegcaarqiciu. Piciukan, tamana assiitellria pillinikan Israel-aani,

⁵kitaki anuciu tauna yuk nunat elatiitnun teggalqunek-llu miluquluku tuqulluku.

⁶Tau͡gaam tuqucimangaituq ataucimek nallunritestengqerquni; tuqucimaarkauluni tau͡gaam malrugnek wall'u malruk ciplukek nallunritestengqerquni.

⁷Taukut-llu nallunritestet ciumek teggalqumek milqerciqaat, nutaan-llu yuut tuanelnguut miluquciqaat tauna yuk; tuaten piluci assiitellria au͡g'alarciqerci.

⁸“Cuqtarkat-llu ilait arturnarqelarciqut cuqcisten̄un nunavcen̄i, ilakluki makut nunautmeggnek allanek-llu cautmeggnek arenqigingnaqellriit, wall'u kina akngirkengkan, wall'u taringnaullerkaa tuqucilriim. Waten pilriartangqerqan ayakici tuavet ATANREM Agayutevci cucukellranun,

⁹tamana-llu qanrutekluku arturnarqelria Levite-anun agayulirten̄un cuqcisten͞gulriamun-llu tuani taum nalliini, taukunun picirkaq nallunairesqelluku.

¹⁰Tua-i-llu picirkangutseng qanrutkekatgu elpeci qanellrat maliggluku piarkauluci.

¹¹Ciuniurluku picirkiuraat qanellrat aturniarci uniurtevkenaku.

¹²Kia imum narureskuniu picirkiutii cuqcistem wall'u agayulirtem, taum nalliini calilriim, tuqucimaarkauguq. Waten pillerpeciuggun assiilnguq au͡g'arciqerci Israel-aamek.

¹³Yuut-llu tamarmeng niiciiqaat alingeciqut-llu, tuaten-llu pillerkarteng alikeciqaat.

¹⁴“Piksagucimarikuvciu nuna ATANREM Agayutevci cikiutekaa elpecen̄un nunaliluci-llu tuani, tua-i qanerciqliuci, ‘Angayuqerkamten̄ek piciqukut avaqlimcetun.’

¹⁵Cucukliquvci atanerkarpecen̄ek cucuklirciquci ATANREM Agayutevci tau͡gaam cucukellranek. Ilavcen̄ek tau͡gaam cucuklirciquci. Allanermek angayuqerkarpecen̄ek piarkaunrituci.

¹⁶Angayuqaq-llu amllessiyaagnek horse-aarutengqerrngaituq anguyagtem̄i pikainek wall'u yugnek ayagcecingaunani Egypt-aamun horse-aanek kipukengyarturtelluki, ATANEQ waten qanellruan, ‘Tamatum tungiinun ayanqiggngaituci.’

¹⁷Nuliangqerrngaituq-llu amllernek, watnakuni ATANEQ tunuciiqngaku; cali quyurcingaunani tukuutekaminek qerrirlinek suulutaanek-llu.

¹⁸Atanrureskuni-llu kalikanek pingqerciquq igalegnek ayuqluki igausngalriarutait Levite-at agayulirtet, tuani igaucimaqerraallerni igausngaut Agayutem alerquutai.

¹⁹Taukut-llu canimini avaliqu'urciqai naaqiurluni tuaken unguvarmi taktaciatun, elitniaraa qigciklerkaa ATANREM niisngaluki-llu pinriteksaunaki tamalkuita taukuni alerquusngalriit.

²⁰Waten pillermikun umyuarteqenritniartuq ilamini assinruyukluni, narurtaanritniarai-llu ATANREM alerquutai. Nutaan atanirturiniartuq amllerni allrakuni, kinguvri-llu atanirturilriaruniartut Israel-aanek amllerni kinguveqellriani.