Read Yupik Deuteronomy 18 Bible Online

Deuteronomy 18 - Yupik bible

Deuteronomy 18

¹“Agayulirtet Levi-am yui paitangqerrngaitut nunamek Israel-aami; tau͡gaam yuugarkauluteng elliitetgun ekuagarkatgun-llu cikiutekumalriatgun ATANERMUN.

²Nunautengqerrngaitut ilamegcetun, tau͡gaam pikangqercecimaut ATANREM agayulirtekarkauluki, ATANREM akqellruciatun.

³“Ekuagarkanek elliigaqata, kuluvagnek wall'u qusnginek, agayulirtet cikiumalararkaugut tusganek, agluqumek aqsaqumek-llu.

⁴Akurturarkaugut-llu cali quyurtat ciuqliitnek: mukaarkanek, wine-anek, olive-aat uquatnek, qusngit-llu melqurritnek.

⁵ATANREM cucukellrui tamalkuitnek ilakutellriit Levi-am ilai kevgiureskelluki agayulirten͞guluki akwarpak.

⁶“Levite-at iliit piyulria taigarkauguq piciatun nunarrarnek Israel-aani tuavet agayuviketukiitnun.

⁷Tuani agayulirten͞guarkauluni ATANERMUN Agayutminun allacetun Levite-atun tuani kevgiulriatun.

⁸Akurturarkauluni tamakut pitaciluki allat agayulirtet neqkanek, avaliqsugngaluki-llu cat piciatun ilami tuyuutellrit.

⁹“Nunamun tekiskuvci ATANREM Agayutevci cikiutiinun maligtaquyaqunaciki pellernarqelriit cayarait yuut tamaanelnguut.

¹⁰Ekuagiksaunaci irniarpecen̄ek kenerkun ekuavigpecen̄i, ilaci-llu angalkumirtaalriit wall'u tuunriluteng-llu pilriit piciryaraitnek pinrilkilit,

¹¹wall'u tuqullret tarnait piluki qaillukuaqsailkilit.

¹²ATANREM eq'ukai makunek pellernarqelrianek atulriit, taumek anciiqekai tamakut yuut tamaaken nunamek ciunerpecen̄ek.

¹³Elpeci ATANREM Agayutevci ciuqerrani camek pinarqutailnguugarkauguci.”

¹⁴Tua-llu Moses-aaq qanertuq, “Nunami yiirarkarpecen̄i, yuut tamaani angalkumirtaatulit naspequtek'larait; tau͡gaam elpeci ATANREM Agayutevci tuaten pisqenritaaci.

¹⁵Tau͡gaam ayagceciciquq elpecen̄un prophet-aamek wangtun, akunlevcen̄ek nakmiin ilavcen̄ek, elpeci-llu niisngaarkaugarci.

¹⁶“Ernermi imumi quyurtellerpecen̄i Ingrimi Sinai-ami takumcucarallruuci niitenqigcuumiinaku ATANREM qanellra tangenqigcuumiinaku-llu kenerkun alaitellra, alingavci tuqunayukluci.

¹⁷Tua-i ATANEQ qanellruuq wangnun, ‘Ilumun elluarrluteng qanertut.

¹⁸Ellaitnun ayagceciciqua prophet-aamek elpetun ellaita iliitnek; wiinga-llu qanruciiqaqa qanerkainek, yuut-llu qanruciiqai tamalkuitnek alerquuteklemnek.

¹⁹Atqa aturluku qanlarciquq, anucimirqecetaarciqaqa-llu kina imna niicuumiitestii.

²⁰Tau͡gken cali prophet-aaq qanqan atemkun, wii tau͡gken alerqullruvkenaku tuaten qanresqelluku, wall'u allam agayutem atrakun qanqan, tauna tuquarkauguq.’

²¹“Cali-llu elpet umyuarpegun qanquvet, ‘Qaillun-mi wangkuta nallunriciiqseta prophet-aam qanellran ATANERMEK kingunengqenrilucia?’

²²Prophet-aaq qanqan ATANREM atrakun, qanellra-llu piciurtevkenani, tua-i ATANREM qanelqenritaa; Prophet-aaq tauna ellminek qanertuq elpeci-llu alikngaitarci.