Read Yupik Deuteronomy 19 Bible Online

Deuteronomy 19 - Yupik bible

Deuteronomy 19

¹“ATANREM Agayutevci piunriumarikaki yuut nunautiitnek cikirluci, elpeci-llu tegumarikuvciki nunarpait enait-llu, uitaviksagulluki,

²avkiciu tamana nuna pingayuurrluku, taukut-llu tamalkuita nunarpagmek pitangqertelluki ullakayunarqellriaruluki.

³Nutaan yuk ilaminek tuqucilria qimagniartuq taukut iliitnun.

⁴Yuk pitsaqa'artevkenani ilaminek tuqucikuni qimagyugngaluni taukut nunat iliitnun uqillerkaminun.

⁵Una cuqyutekluku: yuuk malruk ayakunek napanun kepurinalutek, tua-i-llu aipaa piqertuarinanermini napamek piqertuutaan cingilga qevcerrluni, tuqulluku tauna aipaa. Tua-i tauna qimagyugngauq taukut nunarpiit iliitnun uqillerkaminun.

⁶Atauciukan nunarpak yaaqsissiyaagnayukluku, taum-llu tuqullrem tungayiin, akinaurucugngastiin, qenengluni tauna angun malirqerciqaa anguamiu-llu tuqulluku. Tua-i pinarqenrilngurmek tuquciluni; nauwa pitsaqa'artevkenaku angutem tauna aipani tuquskii, inglukutellruvkenatek-llu ciungani.

⁷Una pitekluku allakarisqamci pingayunek nunarpagnek.

⁸“Cali ATANREM Agayutevci ilakaku nunautsi, ciuliaci qanrutellrucimitun piciqniluni, cikirluci-llu tamalkuan nunamek ellii akqellrucimitun,

⁹tua-i cali allakarinarqaaci pingayunek allanek nunarpagnek. (Elliin mat'umek nunamek cikirciqaaci atuquvciki tamalkuita alerquutekellrenka unuamek, kenekluku-llu ATANEQ Agayutsi yuuluci-llu elitnaurutai maligtaquluki.)

¹⁰Waten pikici pinarqenrilnguut yuut tuqunritnaurtut tuaten-llu elpeci pinarqelriarunritniartuci tuqucimallernun, nunami ATANREM cikiutekaani elpecen̄un.

¹¹“Tua-llu waten pilriartangqerqan: yuum pitsaqluni tuquskaku inglukesten̄i qimagluni-llu taukut nunarpiit iliitnun uqitnaluni.

¹²Tuaten pikan, ciulirneret nunalgutain taivkarluku tunciqaat tuqutaullrem tungelqurranun akinaurucugngastiinun, tauna tuqucimasqelluku.

¹³Takumcuksaqunaciu. Au͡g'arciu Israel-aanek tauna tuqutarayuli elluarrluci piurniartuci.

¹⁴“Nunaqlirpet nunautiin cuqai qaillukuaryaqunaki, ak'a elkarcimallret nunami ATANREM Agayutevci cikiutekaani.

¹⁵“Atauciq nallunritesta ikgetuq yuum picurlagluni pinarqelriarurtellerkaanun; malrugnek tau͡gaam wall'u ciplukek nallunritestengqelararkauguci kia pinarqutii piciugarkaukan.

¹⁶Ataucim yuum ilani picurlagcetaqaku, iqluurutekluku camek pinarqellriamek piniluku,

¹⁷tamarmek ayagciquk tuavet cucukumalriamun agayuvigkamun cuqcimalutek-llu agayulirtetgun cuqcistetgun-llu taum nalliini calilriatgun.

¹⁸Taukut cuqcistet yuvrirciqaat tamana pinqegcaarluku; taum-llu ilumun iqluurutkekaku tauna ilani Israelite-aq,

¹⁹ellii iqluurutkilleq anucimirqecetaarumaciquq taum iqluurutkellermi pikaqsallranek. Waten piluci assiitellria akunlevcen̄ek au͡g'arciqerci.

²⁰Nutaan yuut tamarmeng niiciiqaat tamana uluryayugluteng-llu tuaten pillerkameggnek.

²¹Tuaten ayuqellrianun takumcuyugyaqunaci; anucimirqecetaarun waten piugarkauguq: tuqucilria tuqulluku; iingirkengelria iingirrluku; keggutairkengelria keggutairrluku; unatairkengelria it'gairkengelria-llu cali tuaten.