Read Yupik Deuteronomy 2 Bible Online

Deuteronomy 2 - Yupik bible

Deuteronomy 2

¹“Tua-llu tuiggluta ayagyaqlirtukut yuilqumun tungiinun Red Sea-m, ATANEQ wangnun qanrutellruciatun; ernerni-llu amllerni ayagaukut Mount Seir-am nuniini.

²“ATANEQ-llu wangnun qanertuq,

³‘Maani ayagalci ingrililriami amllerriuq; negetmun ayagci.

⁴Alerqurluki-llu yuut, waniwa ayakatartuci anelgutevci nuniitgun Esau-m qetunrain, Seir-ami uitalriit; ellaita-llu alikeciqaiceci. Taumek murilkekici cakneq.

⁵Ingluliryaqunaciki; tua-i-wa cikirngailamci nuniita iliinek, qang'a, it'garpeci aluatun angtangraan piyuavigkarpecen̄ek, cikiutekellruamku Mount Seir-aaq Esau-mun pikesqelluku.

⁶Kiputarkauguci neqnek ellaitnek akilirluci, neqkangqerrniartuci; mermek-llu cali akilirluku kiputarkauguci merkangqerrniartuci.’

⁷“Tua-i ATANREM Agayutevci atawaqercetellruaki tamalkuita unatevci caliarit; nallunritaa ayagallerci maaggun angelriakun yuilqukun; makuni allrakuni yuinaagni malrugni ATANREM Agayutevci nayullruaci; camek-llu enuqitellruvkenaci.

⁸“Tua-i cali ayagtukut, anelgutemten̄ek qetunrainek Esau-m Seir-ami uitalrianek, unilluku Arabah-m tumyaraa Elath-amek Eziongeber-aamek-llu. Caqirrluta-llu ayagluta tungiinun Moab-am yuilqurtaan.

⁹ATANEQ-llu qanertuq wangnun, ‘Arenqiallugcecaqunaciki Moab-armiut, wall'u ingluliryaqunaciki anguyagkun, tua-i Wiinga cikirngailamci nunautiita iliinek, pikarpecen̄ek, cikiutekellruamku Ar-aq qetunrainun Lot-aam pikesqelluku.’”

¹⁰(Ukut Emim-aat tamaani uitallruut, yuut pinilriit yugyagluteng-llu Anakim-aatun-llu sugtutaluteng;

¹¹qanrutkumalalliniut-llu Anakim-aatun Rephaim-aaruluki, tau͡gaam Moabite-at aterpagtelalliniit Emim-aanek.

¹²Horite-at-llu uitalallruyaaqut Seir-ami, tau͡gaam Esau-m kinguvrin tamaaken ayagcetellrulliniit. Piunrirluki-llu, nunaliluteng-llu uitavillratni; Israel-aat pillruciicetun nunaseng piksagutellermeggni, ATANREM ellaitnun cikiutekellra.)

¹³“Kitaki nangerrluci qerarciu kuiggaq Zered-aaq. Tua-i-llu wangkuta qerararput.

¹⁴Ayaggaanemten̄ek-llu Kadesh Barnea-mek, qerallemten̄un kuiggaq Zered-aaq allrakut yuinaq akimiaq pingayunlegnek cipluku (38) amllertaut, tamaq'apiarmeng yuulgutkellriit-llu, imkut-wa anguyiurtet piunrillruut, ATANREM akqutkellratun ellaitnun.

¹⁵Tua-i ilumun ATANREM inglulirturallruateng tamalkurmeng piunrirnatkaatnun.

¹⁶“Tua-i-llu anguyiurtet piunriumariata tuquluteng yugnun ilautellermeggnek,

¹⁷ATANEQ qanertuq wangnun,

¹⁸‘Unuamek ayagarkauguci nuniitgun Moab-armiut Ar-aq tumekluku.

¹⁹Tekiteqataquvciki-llu nuniit Ammon-aam qetunrain, arenqiallugcecaqunaciki inglulirpek'naki-llu, tua-i Wiinga cikirngailamci iliinek nunautiita Ammon-aam qetunrain pikarpecen̄ek, tua-i-wa Lot-aam qetunrainun tunellruamku pikesqelluku.’”

²⁰(Tamana cali nallunritaat nunakucia Rephaim-anun; Rephaim-aat tamaani uitallruyaaqut, tau͡gken Ammonite-at aterpagtelarait Zamzummim-aanek,

²¹yuut pinilriit yugyagluteng-llu, sugtutaluteng-llu Anakim-aatun; tau͡gaam ATANREM piunrillrui, tua-i Ammonite-at-llu ayagcelluki, nunaliluteng uitavillratni.

²²Tuaten-llu ATANREM pillrui Edomite-at Esau-m kinguvri, Seir-ami uitalriit, piunrillerminiki Horite-at tua-i Edomite-at, ayagcetellruit, nunaliluteng-llu uitavillratni, cali tuanlluteng man'a erneq engelkarrluku.

²³Tua-llu ukut Avvim-aat, uitalriit nunarrarni Gaza tekilluku, Caphtorim-aat taillret Caphtor-aamek, piunrillruit nunaliluteng-llu uitavillratni.)

²⁴“Moab-aq pelluamteggu, ATANREM qanrutaakut, ‘Nangerrluci, ayagci, qerarluku kuignayua Arnon-aam; tangerrluku cikiutekaqa elpecen̄un Sihon-aq Amorite-aq atanra Heshbon-aam, nunautii-llu; piksagucarturciu, inglulirluku-llu anguyagmi.

²⁵Mat'umi ernermi ayagnirlua qiliim acianelnguut yuut uluryayungevkarciqanka alingengevkarluki-llu elpecen̄ek, niiciiqait qanemcikumallerci uulegciiqut-llu alingluteng elpecen̄ek pitekluci.’

²⁶“Tua-i wiinga ayagceciunga qanrarkanek yuilquanek Kedemoth-aam Sihon-aamun Heshbon-aam angayuqranun, unayaqluku uitanqegcitmek anguyagyuumiinii, qanerlua,

²⁷‘Nunautevkun ayagcessnga; ayagciqua tumyaraq kiingan aturluku, tuiggngaitua tallirpitmun wall'u iqsulirnetmun.

²⁸Tun'ivikeciqerpenga neqnek akinek akilirlua, neqkangqerrniartua, cikirlua-llu mermek akinek akilirlua, merkangqerrniartua; kiingan tua-i nunauten tumekluku ciutmurcugyaaqukut,

²⁹Esau-m qetunraitun Seir-ami uitalriim Moabite-at-llu Ar-ami uitalriit pivkallruciacetun, qerarnatkamnun Jordan-aaq iterluku nuna ATANREM Agayutemta cikiutii wangkutnun.’

³⁰“Tau͡gaam Sihon-aaq Heshbon-aam angayuqra kituusqumanrituq wangkutnun; tua-i-wa ATANREM Agayutevci asvairutevkallruani, cacetuvkarluku-llu ircaqrua, tunenaluku elpecen̄un.

³¹“ATANEQ-llu qanertuq wangnun, ‘Tangerrluku, ak'a tun'arkaurtaqa Sihon-aaq nunautii-llu elpecen̄un; teguciu, uitaviksagutniarci elliin nunii.’

³²Tua-llu Sihon-aaq malikluki tamalkuita yun'i an'uq anguyagnaluta nunam Joahaz-aam yaaqsinrilkiini.

³³ATANREM-llu Agayutemta taitaa wangkutnun; cirlakellruaput-llu, qetunrai-llu tamalkuita-llu yui.

³⁴Taum-llu nalliini tegullruaput tamalkuita nunarpautai piunriqapiggluki-llu tamalkuita nunarpiit, angutet, arnat mikelnguut-llu; iliit pinritevkenaku.

³⁵Kuluvautait kiingita tegullruaput, tapqulluki nunarpagnek aklunek tegutellemten̄un.

³⁶Aroer-aamek, mengliini Kuignayuan Arnon-aam uitalriim, nunarpagmek-llu uitalriamek kuignayugmi, Gilead-aaq tekilluku, nunarpagtaitellruuq artuq'ngamten̄ek; ATANREM Agayutemta taitellrui tamalkuita wangkutnun.

³⁷Ammonite-at tau͡gaam nuniit mallellrunritarci, Kuigem Jabbok-aam cen̄ek, nunarpiit-llu qemililriami uitalriit, allat-llu ATANREM Agayutemta inerquutellri.