Read Yupik Deuteronomy 20 Bible Online

Deuteronomy 20 - Yupik bible

Deuteronomy 20

¹“Ayagaqavci callugyarturluci inglukestevcen̄ek tangerquvci-llu ayagassuutnek akalrialegnek, horse-aanek, anguyagten̄ek-llu amllenrulrianek elpecen̄i, aliksaqunaciki. ATANREM Agayutevci anutestellerpeci Egypt-aamek nayurciqaaci.

²Callullerci ayagnirpailgan agayulirta ciuvarciquq qanerluni-llu anguyagten̄un,

³‘Yuini Israel-aam, niicugnici! Unuamek anguyagciquci. Alingyaqunaci ingluvcen̄ek caceskellivkenaci-llu wall'u nanikualuci.

⁴ATANREM Agayutevci maligciiqaaci cirlakivkarluci-llu.’

⁵“Anguyagtet-llu atanerruarita yuut qanruciiqai, ‘Kina-qaa ilasi enemek pilinerrartuq tau͡gaam elliin upagvikeksaunaku? Tuatnaksailkuniu ataam tuavet eneminun uterrli, tuqucimakuni anguyagkun allam upagviksuaraa.

⁶Yugtangqertuq-qaa ilavcen̄ek wine-arkanek nauceciinerraralriamek tamakut-llu atsaitnek quyurciksaunani? Piksailkuni tauna eneminun ut'reskili. Pitsaqevkenani tuqucimakan allam quyatekciqaa wine-aq.

⁷Ilasi-llu-qaa nulirkautengqertuq? Nuliqsaguteksailkuniu ut'reskili. Pitsaqevkenani tuqucimakuni anguyagmi tauna nulirkaa allam nuliqsagucuaraa.’

⁸“Waten cali anguyagtet atanerruarit qanerciqut, ‘Yugtangqertuq-qaa ilavcen̄ek alingelriamek? Pitangqerquni tauna ut'reskili ilani (anguyallgutni) nalirrungevkarciqngaki.’

⁹Atanerruat qanrumarikata yugnun, nutaan cucukliqici anguyagten̄un ciuqliugarkanek.

¹⁰“Ayakuvci-llu curugnaluku nunarpak, ciumek nallunairturraaqici taukut anguyanritlerkaq cucuksuaraat.

¹¹Ikirtuqateng ikireskatki ellmeggnek tunluteng, kevgaugarkaurciiqut elpecen̄un, makuggluteng calisten͞gurrluteng.

¹²Tau͡gaam taum nunarpiim yui ellmeggnek tunevkenateng callugyukata, anguyagtevcen̄ek kassuguskiciki.

¹³Tuaten-llu ATANREM Agayutevci nunarpak tauna cirlakevkaqaku tuquciiqaci tamalkuita angutet tuanelnguut.

¹⁴Elpeci tau͡gaam teguyugngaciqaci arnat, mikelnguut, ungungssiutait, cat-llu tamalkuita nunarpagnelnguut. Aturyugngaciqaci cat tamalkuita ingluvci pikellrit. ATANREM cikiutekngaki elpecen̄un.

¹⁵Tuaten pilarciqaci tamakut nunarpiit yaaqsilriit nunamek uitavigkarpecen̄ek.

¹⁶“Tau͡gaam cirlakaqavciki nunarpiit nunami ATANREM Agayutevci cikiutekaani, tuqutelarciqaci yuut tamalkuita.

¹⁷Tamaq'apiita piunriqiciki yuut: Hittite-at, Amorite-at, Canaanite-at, Perizzite-at, Hivite-at, Jebusite-at-llu, ATANREM alerqullruciatun.

¹⁸Tuquskiciki assiilngircetenritniaraiceci ATANERMUN elitnaurluci atuqaunrilngurnek piciryarameggnek agayuaqameng agayutmeggnun.

¹⁹“Nunarpiit anguyagaqavciki, napat atsangtulit tamaani kepuryaqunaciki, anguyallerci taqengraan. Atsaitnek ner'aqluci tau͡gaam piunrirpek'naki; napat inglukestekenrilavciki.

²⁰Napat tau͡gaam nallunrilkeci neqkanek naugiyuilnguut iquciiqaci aturluki-llu anguyagcuuciluci tauna nunarpak cirlakumanatkaanun.