Read Yupik Deuteronomy 21 Bible Online

Deuteronomy 21 - Yupik bible

Deuteronomy 21

¹“Nunami ATANREM Agayutevci cikiutekaani pikesqelluku, tangerquvci yugmek tuqutaullermek cailkami uitaluni, nalluluku-llu kitumun tuqutellrucia,

²tuani ciulirneci cuqcistet-llu taiciqut, cuqtaarluku-llu yaaqsigtacia tuaken tuqumalriim nuniinek avatiinelngurnun nunarpagnun.

³Tua-llu canimellrulriamek nunarpagmek ciulirneret kuluvayagarmek teguciiqut calissuutekumaksailngurmek, uskuraumaksailngurmek-llu.

⁴Taukut-llu ciulirneret ayauciiqaat tauna kuluvayagaq kuignayugmun kuiggaartalegmun carvanilriamek, nuna-llu ciungani itumcimaksaunani, tuani-llu taum kuluvayagaam uyaqui ayemlluki.

⁵Agayulirtet-llu qetunrai Levi-am tuanciiqut, ellaita arenqiirturarkaungatki tamaita yuut ilameggnek akngirkengelriit. ATANREM Agayutevci cucukellruateng kevgiuresqelluni atawaqaasqilaasqelluki-llu at'mikun.

⁶Taukut-llu ciulirneret tuaken nunarpagnek canimellrulrianek erurciqait unateteng taum kuluviim quliini,

⁷qanerluteng-llu, ‘Wangkuta una angun tuqutenritarput nalluluku-llu kitumun picia.

⁸ATANEQ, au͡g'ariski yut'en Israel-aat, anutelten Egypt-aamek. Au͡g'ariskut, wangkutnun-llu tuc'etevkenaku tuqucimallra camek pitkailnguum yuum.’

⁹Tua-i tuaten piluci ATANREM pisqutii aturluku, yuum tuqucimallra elpecen̄un tusngaituq.

¹⁰“Tua-llu cali ATANREM cirlakivkaqaci anguyakuvci yugnek-llu teguangluci,

¹¹tangerquvet taukuni arnaqegtaarmek, tauna-llu elpet nuliqsugluku.

¹²Tauna enevnun ut'ruskiu, tuani qamiquni meqniaraa cetuirluni-llu,

¹³ac'inqiggluni-llu. Iralumi ataucimi enevni uitaciquq angayuqaagminek yuarnayullermini; nutaan taum kinguani nuliqsagucugngaciqan.

¹⁴Kinguqvaarni piyuumiiruskuvgu ayagceciiqan natmun piyullranun. Tau͡gaam kasnguyugcetellruavgu kevgatun umyugiurutekngaitan tunngaitan-llu akinun.

¹⁵“Tua-llu angun nuliangqerquni malrugnek, aipaa kenekluku aipaa tau͡gken kenkevkenaku, taukuk-llu tamarmek irnianglutek. Tua-i-llu qetunrangqerraarutni taum kenkenrilkiin irniaqekaku,

¹⁶akluni avegnaluki irniaminun picirkiuquni, tauna kenkekmi irniara ciuqliunguarcessngaitaa, ingluarvikluku enairivkarluku kenkenrilkem̄i irniaranek.

¹⁷Ciuqliq irniani malrurqugnek amllenrulriamek ilaini cikirciqaa, kenkek'ngami qetunraqenrilengraaku. Angutem irniani ciuqliq nallunairumaciqaa cikirluku-llu pikiumataciatun piciryaraq aturluku.

¹⁸“Tua-llu cali angun qetunrangqerquni umyuani atuqiinek pamaunani-llu, niicuunakek angayuqaagni anucimirqecetaalangraagni.

¹⁹Angayuqaagken ayautarkaugaak nunat uitavimek ciulirneritnun, tuani naspaamaarkauluni.

²⁰Taukuk-llu qanerciquk taukunun ciulirnernun, ‘Qetunrarpuk una pamaituq umyuani-llu aturluku niicugpek'nanuk-llu; akinek cagmarilartuq taangiqerrlainarluni-llu.’

²¹Tua-i angutet tuaken nunarpagnek tuquciiqaat teggalqunek miluquluku. Tuaten assiitellria au͡g'alarciqerci akunlevcen̄ek. Tamarmeng Israel-aat niilluteng tamatumek alingeciqut.

²²“Angun-llu tuqucimakan picurlaucini pitekluku, temii-llu agarrluku napalriamun,

²³tuani agaarkaunrituq unugpak. Tungmagcimaarkauguq tuani ernermi, tua-i-wa tuqumalriim agalriim tut'eciiqaa nunamun Agayutem aniqlaatii. Tungmageskiciu tema caarrluurtenritnaurtuq nuna ATANREM Agayutevci elpecen̄un cikiutii.