Read Yupik Deuteronomy 22 Bible Online

Deuteronomy 22 - Yupik bible

Deuteronomy 22

¹“Tangerquvet Israelite-aullgutvet kuluvautiinek wall'u qusngiutiinek calligtellriamek, tangenrrilnguaryaqunaku; ut'ruskiu pikestiinun.

²Tau͡gaam pikestii yaaqsikan wall'u kitumun pikucia nallukuvgu, enevnun ut'ruskiu. Pikestii-llu taikan yuarluku tunkiu elliinun.

³Tuaten-llu piniartuten tangerquvet ciulvagmek wall'u aturamek wall'u allamek Israelite-aullgutvet tamaraanek.

⁴“Israelite-aullgutvet-llu ciulviinek kuluvautiinek-llu iqumalriamek tangerquvet, tangenrrilnguarpek'naku nangercetengnaqkiu.

⁵“Arnat-llu angutet aturaitnek aturarkaunritut, angutet-llu cali aturarkauvkenateng arnat aturaitnek; ATANREM Agayutvet eq'ukngaki tuaten pilriit.

⁶“Pitsaqevkenak nalaquskuvet yaqulgem ungluinek napami wall'u nunami, aaniit-llu evaluni kayangumini wall'u piyagamini, aaniit taukut tegungaitan.

⁷Piyagaat teguyugngaaten tau͡gaam aaniit ayagtelluku, unguvamaniartuten elluarrluten-llu piurniartuten unguvaqallerpeni.

⁸“Enelikuvet-llu nutaramek qiliin avatii igcailkucirciqan. Yuk igeskan tuquluni-llu, elpenun pinarqun tut'enritniartuq.

⁹“Nauceciingaituten atsanek wine-arkanek naucetaarvigpenun naucetaarkanek allanek, tuaten pikuvet naulriit tamarmeng tuani agayuviim pikarkaungaki, aturciiganaki-llu elpet.

¹⁰“Nunamek itumcingaituten kuluvagmek angucalumek ciulvagmek-llu ataucikun qimugcirluten.

¹¹“'Lumarrarmek-llu aturyaqunak pilimalriamek qusngit melqurritnek 'lumarrarmek linen-aamek avuluku.

¹²“Aqevlerucirarkaugan-llu kangiraikun ulikussukluku aturan.

¹³“Angun nulirtuquni nasaurlurmek tau͡gken kinguakun qessayagulluku,

¹⁴tua-i-llu iqluurutekluku nuliqsagupailegmek anguciullruniluku.

¹⁵“Waten pilriartangqerqan nasaurluum angayuqaagken teguciqaak augglugtuumaan curuqeqarraallrak kassuutellermegni, anguciuqsaitellran asguranairutii, nasvagarkauluku ciulirnernun tuani nunani.

¹⁶Nasaurluum-llu atiin qanruciiqai taukut, ‘Panika una uumun tunellruaqa nulirqesqelluku, tau͡gken waniwa nuliqsuumiirulluku.

¹⁷Picilirluku-llu kasngunarqellriamek, qanerluni anguciullruniluku nuliksagupailegmiu. Tau͡gken waniwa panimegnuk anguciuqsailucian asguranairutii; tangerciu auggluk curuqellragni nuliqsaguteqarraallermegni!’

¹⁸Tua-llu taukut ciulirneret uinga tauna teguluku kaugtuarciqaat.

¹⁹Akilirivkarluku-llu nasaurluum atiinun akinek yuinarnek tallimanek, tua-i-wa nasaurluq tauna Israelite-aq kasnguyuutekaanek piaku. Cali-llu nasaurluq nulirqurciqaa, avvusngaunaku unguvarmi taktaciatun.

²⁰“Tau͡gken angutem qanellra piciukan asguranairutkaunani-llu ciungani anguciuqsaitellra,

²¹tauna ayautarkaugaat iteryaraanun atiin eniin, tuani-llu angutet nunarpagmek teggalqunek miluquluku tuquciiqaat. Kasngunarqelriamek Israel-aani atuan, akusrarutekevkarluni akissutun uingvailegmi tuani angayuqaagmi eniigni uitainanermini. Waten piluci assiitellria una au͡g'arciqerci.

²²“Angun-llu iliita angukaku allam nulirranek akusrarutekiluku, tamarmek tuqucimaarkauguk. Waten piluci assiitellria au͡g'arciqerci.

²³“Tua-llu cali angun angukatgu akusrarutekiluku nasaurlurmek nunarrarni allam nulirkautiinek.

²⁴Anutarkaugagci taukuk nunarraat elatiitnun tuqullukek-llu teggalqunek miluqulukek. Nasaurluq tauna tuqunarquq qayagpaganrilami ikayuusqelluni, nunani uitang'e'rmi niitestekami nuniitni. Angun-llu tuqunarquq akusrarutekiami nasaurlurmek uikautengqengraan. Waten piluci assiitellria una au͡g'arciqerci.

²⁵“Angutem-llu yuilqumi nasaurluq callugluku akusrarutekekaku, tauna-llu uikautengqerrluni. Angun tau͡gaam tuqucimaarkauguq;

²⁶nasaurluq tau͡gken qaillun pimangaunani, assiilnginrilami tuqucimallerkaminek iqulegmek. Man'a-wa ayuquq yugtun callugluni tuqucilriatun.

²⁷Uum angutem callugluku akusrarutekngaku uikautengqellria nasaurluq, qayagpagange'rmi-llu ikayuusqelluni niitestekaunani.

²⁸“Tua-llu cali angun angukatgu callugluku akusrarutekilria uikautailngurmek nasaurlurmek.

²⁹Taum angutem akilirarkaugaa nasaurluum atii yuinaak malruk qulmek cipluku akinek, tauna-llu nasaurluq nuliqsagutarkauluku qessangraan akusrarutekngamiu. Avvusngaunaku-llu unguvarmi taktaciatun.

³⁰“Angutem tamarmi kasngunarqellriamek atani pingaitaa nulirranek akusrarutekiluni.