Read Yupik Deuteronomy 23 Bible Online

Deuteronomy 23 - Yupik bible

Deuteronomy 23

¹“Kina imna iguugiumalria wall'u qurrsaraa kepumakuni Agayutem yuinun ilausngaituq.

²“Acuniaqengaq cali kinguvri, qulngurutekengraiceteng, ilaungaitut Agayutem yuinun.

³“Ammonite-at Moabite-at-llu wall'u kinguvrit, qulngurutekengraiceteng, ilaungaitut Agayutem yuinun.

⁴Neqkarpecen̄ek mermek-llu cikillrunrilaceci tumevcen̄i anllerpecen̄i Egypt-aamek, Balaam-aaq-llu Beor-am qetunraa Pethor-armiu Mesopotamia-mi akilirluku aniqlaasqellrukiici.

⁵Tau͡gaam ATANREM Agayutevci niicuumiitellrua Balaam-aaq; tau͡gaam aniqlaatii cimirluku atawaqautmek kenekngamici.

⁶Uitanqegcillguteksugluki wall'u piluaqerallerkaat cingluku pingaituci unguvaqallerpecen̄i.

⁷“Eq'uksaqunaciki Edom-aarmiut; tungayakngavciki. Egypt-aarmiumek-llu eq'ukliryaqunak, nauwa nuniitni uitallrulriaci.

⁸Yuulgutkelriarita pingasuingitnek ayagluteng kinguvrit ilaucugngaciqut ATANREM yuinun.

⁹“Anguyiim nalliini pelatekaumavigmi uitakuvet menuurrnarqelriit avisngakiki.

¹⁰Ilasi-llu angutet iliit qavangumikun arniurluni maq'ikuni, ankili anguyiit pelatekaumaviata elatiinun tuani-llu uitaluni.

¹¹Tau͡gaam atakuqan erurarkauguq mermek, nutaan-llu akerta teviqan ilani ullagluki.

¹²“Cali anguyagtet pelatekaumaviatni elatiini yuqerrvingqerciquci.

¹³Caskuci-llu ilangqerciqut muraggarmek. Yuqertaqavci tauna aturluku elagniartuci, yuqerqaarluci-llu tuavet elallerpecen̄un cali patuluku.

¹⁴Pelatekaumavigci tauna menuiteskiciu, tua-i-wa ATANREM Agayutevci nayuaci anirturnaluci inglukestevcen̄ek tamakut-llu ingluci tunenaluki elpecen̄un. Taumek pelatekaumavigci kencignarqevkarciu camek pellernarqellriamek tangenrritnaurtuq akunlevcen̄i, elliin-llu uluryuaraaci.

¹⁵“Kevgaq ayakaqan pikestem̄inek qimagluni-llu elpenun, utercecaqunaku.

¹⁶Uitaarkauguq akunlevcen̄i nunarraat iliitni cucukellermini, uitacurlagcetaarngaitarci-llu.

¹⁷“Israelite-at iliit, angun wall'u arnak, agayuvigni akissuurrngaituq.

¹⁸Cali akit waten unakumalriit kia itrusngaitai eniinun ATANREM Agayutevci akiliutnguluki akqutkellminun. ATANREM eq'ukngaki agayuvigmi akissut.

¹⁹“Navriskengkuvet akimek, neqkamek, wall'u camek allamek Israel-aarullgutevnun ilangurcecaqunaku akilirnatkaanun.

²⁰Allaneq tau͡gaam navriskuvgu navrallra ilangu'rceciiqan, tau͡gaam tuaten piyaqunak Israelite-aullgutevnun. Niisngakuvciu una picirkiun ATANREM Agayutevci atawaqerceciiqaa callerci tamalkuan tuani nunami itrarkarpecen̄i.

²¹“Akqikuvet ukvernarcariluten ATANERMUN tamaa akqutkellren aturarkaugan; ATANREM ukvernarcautekellren neryuniurutkeciqaa, assiilnguuciquq-llu atunrilkuvgu akqutkellren.

²²Assiilnguunrituq ukvernarcarinritleq akqutmek ATANERMUN,

²³tau͡gaam elpenek piyugluten pikuvet pinritevkenak atuqiu.

²⁴“Tua-llu piyuakuvet tumyaraakun allam naucetaarviani, neryugngauten atsanek piyugtacirpetun tau͡gaam assigtan imirngaitan tuaken.

²⁵Cali-llu piyuakuvet tumyaraakun allam mukaarkanek naucetaarviani, qecuulluten neryugngauten piyugtacirpetun, tau͡gaam kepliarissuutekun kepuringaituten.