Read Yupik Deuteronomy 24 Bible Online

Deuteronomy 24 - Yupik bible

Deuteronomy 24

¹“Angun nulirtuquni kassuulluni-llu tau͡gken kinguakun qessayagulluku callran ilii assinrilnguq pitekluku, igarluni-llu kalikarnek avvutessuutnek tunluki elliinun eneminek ayagtelluku.

²Tua-llu cali allamek uingekuni,

³taum-llu cali qessayagulluku. Tua-i-llu tauna igarluni kalikarnek avvutessuutnek tunluki-llu taumun ayagtelluku eneminek. Wall'u aipaagni tauna kinguqliq uinga tuquluni.

⁴Tua-i ciuqliim uikellran ayagcetellni tauna nulirqenqiggngaitaa tuaten pellerniumarraartelluku; watnallerkaq ATANREM ciuqerrani pellernarqelriaruuq. Assiilnguq tuaten angtalria aturarkaunritarci nunami ATANREM cikiutekaani elpecen̄un.

⁵“Angun nulirtunrralria anguyagten̄un maligusngaituq wall'u caliarkicimangaunani; atauciq allrakuq aturluku caliarunaku uitasqelluku, angnillgucirluku tauna nulirtullni.

⁶“Navriskengkuvet ilavnun camek, taum teggalquq miilissuutii mukaarkanek avaliqngaitan navrallranek cimirinatkaanun. Tua-i-wa allungqaciqngavgu unguvangnaqluni nerangnaqsuutiinek.

⁷“Kina imna Israelite-aullgutminek ayakaucikan kevgaqluku-llu wall'u tunluku akinun kevgaurtellerkaanun, tauna tuqutnarquq. Waten piluci assiitellria au͡g'arciqerci akunlevcen̄ek.

⁸“Murilkekici mamyuilngurmek apqucingekuvci, maligtaqunqegcaarararkauluki tamalkuita Levite-at agayulirtet qanellrat; maligtaqukiciki ayuqucirtuutet cikiutekellrenka ellaitnun.

⁹Neq'akiciu qaillun pillra ATANREM Agayutevci Miriam-aamun ayainanerpecen̄i unilluku Egypt-aaq.

¹⁰“Camek navriskengkuvet ilavnun eniinun iteryaqunak aqvaluku aturaq akqutkellra pikevkarciqniluku akiilnguirciigalkuni;

¹¹utaqakiu ellami elliinek taitelluku elpenun.

¹²Arrsaulriarukan-llu, tauna avaliqsaqunaku unugpak.

¹³Ut'rutaqluku atakumi piciquten qavaraqami atularniaraa. Nutaan quyaciquq, ATANREM-llu Agayutevci ilukegcitkeciqaaci.

¹⁴“Teglegiyaqunaku arrsauluni enuqitellria calilria elpeni, Israelite-aullgutkeng'e'rpegu wall'u allanrungraan nunavci iliitni uitalria.

¹⁵Erenret tamaita akerta tevirpailgan akililarciqan ernerpak akingutainek; akiliutni arrsaungami neryuniurutkai. Akilinrilkuvni qayagaurciquq ATANERMUN assiilnguuluni-llu tauna elpenun.

¹⁶“Ataulriit tuqucimaarkaunritut irniameng pinarqutait pitekluki, wall'u irniaq tuqucimaarkauvkenani atami pinarqutii pitekluku. Yuk tamarmi tuqucimaarkauguq elliin tau͡gaam pinarqutni pitekluku.

¹⁷“Piunarquciat allanret wall'u elliraat picurlagngaitarci. Aipainrem-llu aturaanek tegusngaituci akiilnguanun navrutekluku.

¹⁸Tau͡gaam umyuaqeciqerci teguarullerci Egypt-aami, qaillun-llu ATANREM Agayutevci anirturillra elpecen̄ek tuaken; tamana pitekluku mat'umek alerquramci.

¹⁹“Quyurciaqavci-llu naucetaarpecen̄ek, mukaarkat-llu ilait kepullerpeci katagaukata, tamakut uterrluci aqvayaqunaciki. Pikaqait allanret, elliraat, aipainret-llu, ATANERMUN Agayutevcen̄un atawaqercecesqelluci caliarpeciuggun tamiin.

²⁰Olive-aat-llu iqvallrukuvciki ataucirqumek, ilakuaci uitaskiciki. Pikaqait allanret, elliraat, aipainret-llu.

²¹Quyurcikuvci atsanek wine-arkanek ataucirqumek, aipiriluci pinqigcaqunaci. Ilakuaci pikciqait allanret, elliraat, aipainret-llu.

²²Nalluyaguteqeryaqunaciu teguarullerci Egypt-aami. Tamana pitekluku mat'umek alerquramci.