Read Yupik Deuteronomy 25 Bible Online

Deuteronomy 25 - Yupik bible

Deuteronomy 25

¹“Tua-llu aipaagni angutek tamarmek aipartek avalitkeciqaak, cuqcivigmun-llu tailutek. Tuani cuqcistet yuvrirlukek qanerciqut aipaa pitkaitniluku, aipaa tau͡gaam pinarqelriaruniluku.

²Tauna pinarqelria kaugtuarumaarkaukan, cuqcistem palurceciiqaa takumini-llu kaugtuartelluku pinarqutii cuqluku.

³Yuinaak malruk tekillukek kaugtuarumayugngauq, ciptevkenaki; cipeskata kasngunarqeciqngan taumun.

⁴“Sugg'eliciryaqunaku kuluvak tutmarivkaquvgu mukaarkanek.

⁵“Malruk amaqliqelriik uitakunek ataucimi, aipaa-llu tuquluni qetunraunani, tua-i tauna nulirra uingarkaunrituq uillmi ilakenrilkiinek; taum tuqullrem anelgutiin nuliqsagutarkaugaa.

⁶Ciuqliq-llu qetunrangutiik taumun tuqullermun irniaqelriatun piciqaak, atra taum kinguvarturaasqelluku Israel-aani.

⁷Tau͡gken taum tuqullrem anelgutiin nuliqsuumiilkani, arnaq tauna ayagciquq taukut nunat ciulirneritnun qanerluni-llu, ‘Uima anelgutiin piarkani piyuumiitaa; anelgutni kinguverkiuryuumiinaku Israel-aani.’

⁸Taukut nunat ciulirnerita taisqeciqaat tauna qalarulluku-llu. Cali qessakekaku nuliqsuumiinaku,

⁹aipainrem taum ullagciqaa ciuqerratni taukut ciulirneret, aluilitaan-llu inglua yuurraarluku qecirciqaa kegginaakun qanerluni-llu. ‘Waten pimalartuq angun qessalria kinguverkiryuumiinaku anelgutni.’

¹⁰Taum ilai Israel-aani aprumaciqut ‘Ilai aluilitairumallrem.’

¹¹“Tua-llu malruk angutek callukagnek aipaan-llu nulirran ikayungnaqluku uini tauna inglua amelgakun tegulerluku,

¹²takumcukngaitarci tauna arnaq; unatai kepkiciki.

¹³“Uqamaltassiarcuutegnek ayuqenrilnguugnek pingqerrngaituten kalngagpeni, aipaa angluni aipaa-llu mik'nani.

¹⁴Enevni cuqcissuutengqerrngaituten ayuqenrilnguugnek, aipaa angenruluni.

¹⁵Uqamaltassiarcuutnek canganailngurnek atulaqici, unguvamanaurtuci nunami ATANREM Agayutevci cikiutekaani.

¹⁶Teglegissaatulit ATANREM eq'ukai.

¹⁷“Neq'akiciu Amalekite-at pillrat elpecen̄un anllerpecen̄i Egypt-aamek.

¹⁸Taukut qigcikenritaat Agayun, kingunerpecen̄ek-llu curugluci taqsuqeqapiarallerpecen̄i, tuqulluki-llu nuqlitellriit tamalkuita.

¹⁹Taumek ATANREM Agayutevci piksaguteskaku nuna uqisngavkarluci-llu inglukestevcen̄ek avatevcen̄i uitalrianek, pinritevkenaki tuqurqekiciki tamalkuita Amalekite-at, yuum atauciunge'rmi umyuaqenrirniarai. Nalluyagucaqunaci.