Read Yupik Deuteronomy 26 Bible Online

Deuteronomy 26 - Yupik bible

Deuteronomy 26

¹“Uitaviksagucimarikuvciu nuna ATANREM Agayutevci cikiutekaa elpecen̄un nunaliluci-llu tuani,

²tamarpeci elliigarkauguci caqumun naucetaarpeci qecullerpeci ciuqliitnek, taukut-llu malikluki ayagluci tuavet ataucimun agayularvigpecen̄un.

³Ullakiciu agayulirta calilria taum nalliini qanerluci-llu elliinun, ‘Wiinga waniwa nallunairaqa ATANERMUN Agayutemnun itruciqa nunamun akqutkellranun ciuliamten̄un cikiutekciqniluku wangkutnun.’

⁴“Agayulirtem-llu caqu teguciqaa elpenek elliluku-llu ATANREM Agayutvet ekuavian ciuqerranun.

⁵Nutaan ATANREM ciuqerrani makunek qanerciquten: ‘Wii ciuliaqa ayagalriarullruuq Aramean-aaruluni. Taum ayautellrui ilarrani Egypt-aamun uitanaluni tuani. Tuavet ayallermeggni carraullruut, tau͡gaam tuanelnginanermeggni angayuqauviurtellruut, yugyangluteng piniriluteng-llu.

⁶Egypt-aarmiut-llu ataniullruitkut picurlagluta, cingluta-llu calivkarluta teguacetun.

⁷Tua-llu wangkuta ikayuusqelluta qayagaurarput ATANEQ Agayutiit ciuliamta. Elliin-llu niitaakut tangerrluku-llu nangteqlerput, cakviullerput, umyuiqellerput-llu.

⁸Elliin artuqailngurkun pinimikun aviutaakut Egypt-aamek. Irr'inarqelrialiluni alangaanarqellrianek-llu, nanikuanarqellriit-llu pivkaraqluki.

⁹Tailluta-llu maavet cikirluta naungignarqelriamek mat'umek nunakegtaarmek.

¹⁰Taumek waniwa taiciunga ATANERMUN naunraat qecullma ciuqliitnek elliin wangnun cikiutekellrinek.’ “Nutaan caqu elliu ciuqerranun ATANREM agayuluten-llu tuani.

¹¹Quyaluten assilrianek cikiutainek ATANREM Agayutvet elpenun ilavnun-llu; ilagartelluten-llu Levite-anun allanernun-llu nunavni uitalrianun quyallerpeni.

¹²“Allrakut pingayuurtaqata cikiqenglarciquten naucetaarpet qulngurutaitnek Levite-anun, allanernun, elli'irnun, aipainernun-llu, nunani tamaitni nuryugcivkenaki nerlaasqelluki. Tuaten pimarikuvet,

¹³waten qanerniartuten ATANERMUN, ‘Qigcignarqellriamek qulngurutmek ilakuartaituq enemni; cikiutekellruanka Levite-anun, allanernun, elli'irnun, aipainernun-llu, tuaten pisqellua alerqullrucirpetun. Narurteksaitanka nalluyagutevkenaki-llu alerquuteten qulngurutem atullerkaa pitekluku.

¹⁴Iliinek nerellrunritua tuquinerrarlua; iliinek-llu enemnek anutellrunritua menuurcimalua, elliitekeksaunaku-llu ilii tuqumalrianun. Qanellra atullruaqa ATANREM Agayutma; ca tamalkuan pillruaqa maliggluki alerquutekelten wangnun.

¹⁵Uyanglluten tanqilriamek uitavigpenek qilagmek atawaqerteski yut'en Israel-aat; atawaqertessgu-llu naungignarqellria nunakegtaar cikiutekellren wangkutnun ciuliaput akqellrucirpetun.’

¹⁶“Unuamek ATANREM Agayutevci alerquraaci niisngasqelluki alerquutni tamalkuita. Kitaki niisngakiciki pinritevkenaki ircaqurpeciuggun yuucirpeciuggun-llu tamalkirrluci.

¹⁷Unuamek elpeci nallunairarci ATANEQ Agayutekniluku; akqellruarci-llu elliin piciryaraikun eglerciiqniluci; aturluki tamalkuita alerquutai pisqutai-llu.

¹⁸Unuamek ATANREM ciuniuraaci nakmiin yuksagulluci, akqellrucimitun; alerqurluci-llu alerquutni tamalkuita atuusqelluki.

¹⁹Angenrurceciiqaaci allani angayuqauvilegni piliaqellermini, elpeciuggun-llu atra nanrarnariciquq takarnariluni-llu. Elpeci elliin nakmiin yuksaguciiqaaci, akqellrucirmitun.”