Read Yupik Deuteronomy 27 Bible Online

Deuteronomy 27 - Yupik bible

Deuteronomy 27

¹Tua-llu Moses-aaq ilakluki ciulirnerit Israel-aat qanertuq yugnun, “Niisngaciki tamalkuita ayuqucirtuutet cikiutenka elpecen̄un unuamek.

²Ernermi tuani qerallerpecen̄i Kuik Jordan-aaq iterluci-llu nunamun ATANREM Agayutevci elpecen̄un cikiutekaanun, teggalqunek angelrianek quyurciarkauguci, qallirrluki-llu plaster-aamek,

³qaingatnun-llu igaulluki makut alerquutet elitnaurutet-llu tamalkuita. Itrumarikuvciu naungignarqellria nunakegtaar ATANREM ciuliarpeci Agayutiita akqutkellra elpecen̄un,

⁴Jordan-aam akianun ellirluci, ellikiciki taukut teggalqut Ingrimun Ebal-aamun, unuamek ayuqucirtuucimtun, mingugluki-llu.

⁵Pilikici-llu tuani ekuavigmek caviim calissuutem agtuqsailkainek,

⁶tua-i-wa piliaqavci ekuavigmek ATANERMUN Agayutevcen̄un piliaqumalarciqut teggalqunek calissuutem agtuqsailkainek. Tuani ekuagarkat ekualarciqaci.

⁷Tuani ilakuyucimun elliilarciquci nerluci-llu, angnirluci ATANREM Agayutevci ciuqerrani.

⁸Qaingatnun-llu taukut minguumalriit teggalqut igautniaci tamalkuita Agayutem alerquutai taringnaqluki.”

⁹Tua-llu Moses-aaq Levite-at-llu agayulirtet qanertut tamalkuitnun Israel-aanun, “Nepaunaci niicugnici Israel-aani: Unuamek yuksagutaaci ATANREM Agayutevci.

¹⁰Taumek niisngaciu aturluki-llu tamalkuita alerquutai cikiutekellrenka elpecen̄un unuamek.”

¹¹Cali Moses-aaq qanertuq Israel-aam yuinun,

¹²“Qeraumarikuvciu Jordan-aaq ukut yuullgutkellriit nangerngaciqut Ingrimi Gerizim-aami yugnun atawaqaasqun qanrutkumakan: Simeon, Levi, Judah, Issachar, Joseph, Benjamin-aaq-llu.

¹³Cali ukut yuullgutkellriit nangerngaciqut Ingrimi Ebal-aami aniqlaatet qanrutkumallratni: Reuben, Gad, Asher, Zebulun, Dan, Naphtali-llu.

¹⁴Levite-at-llu qanerciqut qastuluteng Israel-aam yuinun:

¹⁵“‘Aniqlaamali kina imna agayutngualilria teggalqumek, muragmek, wall'u cavigmek, aassaqluni-llu tuavet agayuaqluni, pellernarqelriaruan tuatnayaraq ATANERMUN.’ “Yuut-llu tamarmeng kiuciqut, ‘Amen!’

¹⁶“‘Aniqlaamali kina imna takaqinrilnguq ataminek wall'u aanaminek.’ “Yuut-llu tamarmeng kiuciqut, ‘Amen!’

¹⁷“‘Aniqlaamali kina imna calligcilria elaqlirmi nunautiin engeliin nallunailkutaanek.’ “Yuut-llu tamarmeng kiuciqut, ‘Amen!’

¹⁸“‘Aniqlaamali kina imna ciuliqagcilria cikmiumalriamek iqlutun.’ “Yuut-llu tamarmeng kiuciqut, ‘Amen!’

¹⁹“‘Aniqlaamali kina imna piyunarquciitnek catkinrilnguq allanret, elliraat, aipainret-llu.’ “Yuut-llu tamarmeng kiuciqut, ‘Amen!’

²⁰“‘Aniqlaamali kina imna atami nulirranek akusrarutekilria.’ “Yuut-llu tamarmeng kiuciqut, ‘Amen!’

²¹“‘Aniqlaamali kina imna akusrarutekilria ungungssiarmek.’ “Yuut-llu tamarmeng kiuciqut, ‘Amen!’

²²“‘Aniqlaamali kina imna akusrarutekilria alqaminek wall'u nayagaminek wall'u aanami wall'u atami panianek.’ “Yuut-llu tamarmeng kiuciqut, ‘Amen!’

²³“‘Aniqlaamali kina imna akusrarutekilria cakiminek arnamek.’ “Yuut-llu tamarmeng kiuciqut, ‘Amen!’

²⁴“‘Aniqlaamali kina imna nalluvkarluni yugmek tuqucilria.’ “Yuut-llu tamarmeng kiuciqut, ‘Amen!’

²⁵“‘Aniqlaamali kina imna akilirtelluni yugmek pinarqutailngurmek tuqucilria.’ “Yuut-llu tamarmeng kiuciqut, ‘Amen!’

²⁶“‘Aniqlaamali kina imna ukut alerquutet cingumastekenrilkiit aturpek'naki elliin. Narurcilria tamalkuitnek Agayutem alerquutainek elitnaurutainek-llu.’ “Yuut-llu tamarmeng kiuciqut, ‘Amen!’