Read Yupik Deuteronomy 28 Bible Online

Deuteronomy 28 - Yupik bible

Deuteronomy 28

¹“Niisngakuvciu erinii ATANREM Agayutevci, pinritevkenaki-llu aturluki alerquutai tamalkuita unuamek elpecen̄un alerquutekellrenka, ATANREM Agayutevci angayuqauvilegni tamalkuitni nunami angenrurciiqaaci.

²Niisngaciu ATANEQ Agayutsi atawaqautet makut piksagutniaci:

³“ATANREM atawaqerceciiqai nunarraci naucetaarvici-llu.

⁴“ATANREM atawaqerceciiqaaci irnialirtelluci, naucetaaci naugivkarluki, amllernek-llu kuluvagnek qusnginek-llu pingevkarluci.

⁵“ATANREM-llu atawaqerceciiqai mukaarkat naucetaaci, neqkat-llu neqkiuraci tamakut aturluki.

⁶“ATANREM atawaqerceciiqaa callerci tamalkuan.

⁷“ATANREM cirlak'larciqai inglukesteci curugaqaceci. Taukut curugciqut ataucim tungiinek, tau͡gaam qimagciqut elpecen̄ek piciatun ayagaluteng.

⁸“ATANREM atawaqerceciiqaa calillerci imirluki-llu qemaggvici mukaarkanek. Atawaqerceciiqaaci nunami cikiutekamini elpecen̄un.

⁹“Niisngakuvciu ATANEQ Agayutsi aturluku-llu tamalkuan alerquutii, elliin nakmiin yuksaguciiqaaci akqellrucimitun.

¹⁰Nutaan yuut tamarmeng nunami tangerciqaat ATANERMUN cucukellrucirci nakmiin yuknaluci, aliksagulluci-llu.

¹¹ATANREM irnialingevkarciqaaci amllernek-llu kuluvautengevkarluci, naunrarnek-llu amllernek, nunami tamaani akqutkellermini ciuliarpecen̄un cikiutekciqniluku elpecen̄un.

¹²Ellallircet'larciqaa pinariaqan imartulriamek qemaggviminek qilagmi atawaqertelluku-llu tamalkuan calillerci, navriskengyugngariluci atanruvignun amllernun, tau͡gken elpeci navrarngaunaci iliitnek.

¹³ATANREM Agayutevci ciuliqagten͞gurciiqaaci atanruvilegni, ellaitnun maligtaqulriaruvkarpek'naci. Piluaqerarrlainarciquci pisciigalliqeksaunaci-llu niisngakuvciki tamalkuita alerquutai cikiutekekenka elpecen̄un unuamek.

¹⁴Tau͡gaam elpeci narurteqerngaitaci nauwun tayima wall'u agayuluci kevgiurluci-llu allanun agayutnun.

¹⁵“Tau͡gken elpeci narureskuvciu ATANEQ Agayutsi aturpek'naki-llu alerquutai cikiutekellrenka elpecen̄un unuamek, makut assiitellriit tut'arkaugut elpecen̄un:

¹⁶“ATANREM aniqlaaciqai nunarpaci naucetaarvici-llu.

¹⁷“ATANREM aniqlaaciqai naucetaaci mukaarkat neqkat-llu uptelci tamakunek.

¹⁸“ATANREM-llu aniqlaaciqaaci ikgelngurnek irniangevkarluci, naucetaaci naugiluaqercetevkenaki, cali kuluvaci qusngici-llu ikgetevkarluki.

¹⁹“ATANREM aniqlaaciqaa callerci tamalkuan.

²⁰“Assiilngurmek atuquvci cakaarluku-llu ATANEQ, tut'eciiqai aniqlaatet, aakulaggnarqelriit picurlagnarqelriit-llu callerpecen̄i tamaitni, piunriumallerkarpecen̄un ak'anivkenaci.

²¹ATANREM cangerlagmun unitessngaitaaci nangnatkarpecen̄un tamaani nunami piksagutarkarpecen̄i.

²²ATANREM naulluutet cirlaurrnarqelriit tut'evkarciqai, puqervagaaqluci puvluci-llu; ellallircessngaitaa, anuqlirtelluku-llu uuqnarqelriamek piunrirarkauluki naucetaaci. Makut pillugnarqelriit nayurciqaiceci tuqunatkarpecen̄un.

²³Ellalluk iggngaituq kiituani-llu nunautsi tegtariciquq cavigtun.

²⁴Ellallircetevkenaku ATANREM pircirceciiqaa urr'armek qau͡gyamek-llu piunrillerkarci tekilluku.

²⁵“ATANREM-llu inglukestevcen̄un cirlakevkarciqaaci. Elpeci curugciquci ataucim tungiinek, tau͡gken qimagluci ellaitnek piciatun, yuut-llu tamarmeng nunami alingeciqut cakneq makut elpecen̄un tut'ellriit tangerrluki.

²⁶Tuqukuvci-llu yaqulget yuilqum-llu ungungssii taiciqut temci-llu nerluki, yugtangqerrngaunani-llu alingcetaartekaitnek tamakut.

²⁷ATANREM-llu aninguarceciiqaaci Egypt-aarmiut pivkallrucimitun. Temci-llu callartevkarciqai. Patumaciquq qaici pupignek ungilagluteng tamakut-llu mamngaunateng.

²⁸ATANREM umyugairuceciiqaaci; cikmirtelluci, ayuquciirutelluci-llu.

²⁹Tarraciiquci cikmiumalriatun erenrani natmun ayauciinaci. Callerpecen̄i-llu tamalkuan piluaqerngaituci. Kesianek-llu nakukumaciquci uayaumaaqluci-llu, kitumek-llu ikayurtekaitaqluci.

³⁰“Nulirkautengqerrsaaqeciquten-llu nasaurlurmek, tau͡gaam allam nuliqsaguciiqaa. Eneliyaaqeciquten, tau͡gaam uitavikngaunaku. Wine-arkanek nauceciiyaaqeciquten tau͡gaam nerngaunaki atsai.

³¹Kuluvauteten tuqucimalarciqut ciuqerpeni, tau͡gaam kemgitnek nerlarngaituten. Ciulvaten ayakaucimalarciqut tangvagtekluten ut'rucimangaunateng-llu. Qusngiuteten cikiutekumaciqut inglukestevnun, ikayurtekaiciiquten-llu elpet.

³²Qetunraten paniten-llu cikiutekumaciqut kevgaugarkaurrluteng allanernun tangvallerpeni. Unuaquaqan-llu iigken kiartelngularciquk elliinginaq kiarrluki irniaten uterrnayukluki.

³³Tangnerranarqelriim atanruviim yuin teguciqait naucetaat cakviurluten nauvkalten, elpet tau͡gken camek pingqerrngaunak tau͡gaam kesianek nangcimallerkarpenek eq'ukumallerkarpenek-llu.

³⁴Nangteqlerpeci-llu umyugairuceciiqaaci.

³⁵ATANREM-llu nauvkarciqai iruvcen̄i nangteqnarqelriit mamyuilnguut callanret; aninguat-llu patumaciqaat qaici qamiqurpecen̄ek ayagluteng it'garpecen̄un.

³⁶“ATANREM ayauciiqaaci atanertuumarpeci tangnerranarqelriamun nunamun, ciungani elpeci wall'u ciuliarpeci uitavikeksailkevcen̄un; tuani-llu kevgiurciquci agayutnun piliaqumalrianun muragmek teggalqumek-llu.

³⁷ATANREM-llu cekaveskaci allanun nunanun, tamakut yuita alangaarutkeciqait elpecen̄un tut'ellret; anglanitekciqaiceci caunrilkuurluci-llu.

³⁸“Nauceciiciquci naucetaarkanek amllernek, tau͡gken quyurciluci carrarnek, tua-i-wa petgertayulit nerciqngatki naucetaaci.

³⁹Nauceciiciquci wine-arkanek aulukluki-llu, tau͡gaam avurngaituci atsaitnek merngaunaci-llu wine-amek tamakut mecuatnek, ciissit nerciqngatki naucetaaci atsat.

⁴⁰Napat olive-aanek naugitulit nauciqut nunavcen̄i tamiini, tau͡gaam tamakut uquatnek pingengaituci, tua-i-wa olive-aat igqaqciqngata.

⁴¹Qetunrangciquci paningluci-llu, tau͡gaam elpecen̄i uitangaitut, tua-i-wa teguaruciqngameng.

⁴²Napat naumalriit nunavni atsat-llu petgertayulit nerciqait tamalkuita.

⁴³“Allanret nunavcen̄i piniriinarciqut, elpeci tau͡gken piniarusngiinarluci.

⁴⁴Tamakut akiutmeggnek navrit'larciqaiceci, tau͡gaam elpeci navrisngaitaci pikailavci. Iquani-llu tamakut atanirtungciqaiceci.

⁴⁵“Makut tamarmeng pillugnarqelriit tuciiqut elpecen̄un, nayurarkauluci piunrillerpeci engeliinun, tua-i-wa niisnganrilavciu ATANEQ Agayutsi aturluki-llu alerquutai cikiutekellri elpecen̄un.

⁴⁶Nallunairutnguciqut Agayutem anucimirqecetaarutiinun elpecen̄un kinguverpecen̄un-llu akwarpak.

⁴⁷ATANREM atawaqercetellruaci catgun tamaitgun, tau͡gaam elpeci kevgiuryuumiinaku tengruluci nunaniryugluci-llu.

⁴⁸Taumek kevgiurciqaci inglukesteci ATANREM ayagcetarkai elpecen̄un, kaigluci, meqsugluci, matangqaluci-llu. Canek-llu tamalkuitnek enuqilluci. ATANREM nangteqevkarciqaaci cakneq piunrillerpecen̄un.

⁴⁹ATANEQ-llu taivkariciquq yaaqvanek nunam iquanek ingluliurtekarpecen̄ek, allakatun qantuluteng taringesciigalkevcen̄ek; tailuteng cukataluteng yaqulegpiim tengaulauciatun.

⁵⁰Mulngakenrilnguuciqut takumcuyugngaunateng-llu yugmek, ayagyuangraan ak'allaungraan-llu.

⁵¹Nerciqait ungungssiuteci naucetaaci-llu, elpeci-llu paluluci. Unicingaitut pikarpecen̄ek mukaarkanek, wine-amek, olive-aam uquanek, kuluvagnek, qusnginek-llu: elpeci-llu tuquluci.

⁵²Curugciqait tamaita nunarraat nunami cikiutekaani ATANREM Agayutevci elpecen̄un, qertulriit-llu asvairqumalriit nunavci avaperutait cacetuqutekelci iquciqut.

⁵³“Inglukestevci avatairumakaki nunaci, kaigem ugaani nerlarciquci mikelngurnek ATANREM Agayutevci cikiutekellrinek.

⁵⁴Tuaten-llu cali yuk takarnarqelriarullrung'e'rmi cacirkairuciiquq avatairumallrata nalliini, kiituani-llu nerlangciquq nakmiin irniami ilaitnek allamek neqkailami. Qunukuciiqai-llu anelgutni nuliani-llu kenkekni, wall'u irniani uitalriit.

⁵⁵

⁵⁶Tuaten-llu cali arnaq pirpakumallrung'e'rmi, takarnarqellrianek-llu yuurtellruluni, tukuum-llu ugaani natmun ayagaqami piyuayuunani, tuaten cali piciquq. Anguyiit kassugusngallrata nalliini cacirkairuciiquq kaigem ugaani, kiituani-llu aassaqluni irniayaani nerciqaa al'erpagtuumaan. Uini-llu kenkekni iliinek cikirngaitaa wall'u irniani tamaanelnguut.

⁵⁷

⁵⁸“Niisnganrilkuvki piciuluten tamalkuita Agayutem elitnaurutai igausngalriit ukuni kalikarni qigcikenrilkuvgu-llu assiqapigtellria irranarqelria-llu atra ATANREM Agayutevci,

⁵⁹elliin ataam tut'eciiqai elpecen̄un kinguverpecen̄un-llu iinruilnguut apqucit alingnarqellriit-llu cangerlagpiit arulaircimasciigalnguut.

⁶⁰Elpecen̄un tuc'etarkaugai ataam cali assiitellriit apqucit atulci Egypt-aami, assiringaituci-llu.

⁶¹Cali-llu allat apqucit cangerliit-llu tut'eciiqai elpecen̄un qanrutkumanrilnguut ukuni kalikarni imalegni Agayutem alerquutainek ayuqucirtuutainek-llu, piunriumallerkarci tekilluku.

⁶²Amllertariyaaqeciquci-llu agyatun qilagmi, carraat tau͡gaam uitaqerciqut, tua-i-wa niisnganrilavciu ATANEQ Agayutsi.

⁶³ATANREM-llu tengruluni yugyangevkallrukiici piluaqeravkarluci-llu, tuaten-llu cali tengrutkeciqaa piunrirtellerkarci navguumallerkarci-llu. Qecuumaciquci-llu nunamek piksagutarkarpecen̄ek.

⁶⁴“ATANREM-llu cekavciiqaaci tamalkuitnun atanruvilegnun, nunam iquanek cali iqua tekilluku, tamaani-llu kevgiurciquci agayutnun piliaqumalrianun muragnek teggalqunek-llu, elpeci wall'u ciuliarpeci agayuvikeksailkaitnun.

⁶⁵Nanleng'e'rpeci uitanqegcivingqerrngaituci wall'u ca uitavigci pikniluku qanerciiganaci; ATANREM artuqevcen̄ek umyuarpeciuggun nanikuavkarciqngaci, neryuniurutairulluci ciunerkairulluci-llu.

⁶⁶Aarnarqutailngurmek unguvallerkaiciiquci. Erenrungraan unuungraan-llu alingmek imangqerciquci, uluryayugglainarluci tuqullerkarpecen̄ek.

⁶⁷Ircaquci-llu nutengvalarciqut alikluki cat tamalkuita tangelci. Unuakut tamalkuita amci atakullerkaa nerinik'larciqerci, atakumi-llu unuakullerkaanek cali nerinilluci.

⁶⁸ATANREM-llu uterceciiqaaci Egypt-aamun sun'atgun, qanellrung'e'rmi tuavet ayanqiggngaitniluci. Tuani elpecen̄ek tunengnaqsaaqeciquci inglukestevcen̄un kevgauyugluci, tau͡gaam kia atauciunge'rmi kipucugngaitaaci.”