Read Yupik Deuteronomy 30 Bible Online

Deuteronomy 30 - Yupik bible

Deuteronomy 30

¹“Waniwa cikillrurtamci cucuklillerkarpecen̄ek atawaqautmek wall'u aniqlaatmek. Makut-llu tamalkuita pimarikata elpecen̄un uitaluci-llu atanruvigni ATANREM Agayutevci cekavtellrani umyuaqeciqerci cucukliisqumalqa.

²Elpeci kinguveci-llu ut'reskuvci ATANERMUN ircaqurpeciuggun-llu tamalkirrluci niisngakuvciki alerquutai unuamek elpecen̄un cikiutekellrenka,

³nutaan ATANREM takumcukciqaaci ataam-llu piluaqerangevkarluci. Ut'ruciiqaaci-llu atanruvignek elliin cekavtellrukiici tamakunun.

⁴Cekavcimallrung'e'rpeci yaaqvaqapiarnun nunam iquinun, ATANREM Agayutevci quyurciiqaaci ut'rulluci-llu,

⁵ataam nuna piksagutesqelluku ciuliarpeci uitavikellrat. Ciuliarpecen̄i-llu tamakuni piluaqeranrurciiquci yugyanrurrluci-llu.

⁶ATANREM Agayutevci niisngarivkarciqaaci kinguveci-llu cali, tua-i elpeci kenkarkauluku ircaqurpeciuggun tamalkirrluci, nunami-llu tamaani uitaurluci.

⁷Elliin-llu aniqlaatet makut tuc'eciiqai inglukestevcen̄un, tamakut eq'ukellrukaiceci nanglluci-llu.

⁸Elpeci-llu ataam niisngariciqerci aturluki-llu alerquutai unuamek qanrutkellrenka elpecen̄un.

⁹ATANREM callerpeciuggun tamalkuan piluaqeravkarciqaaci; irnialingciquci ungungssiarauteci-llu amllericiqut, naucetaarvici-llu naugilarciqut amllernek. Angniutekciqaa piluaqeravkallerci, tuaten pillrucirmitun ciuliarpecen̄un.

¹⁰Tau͡gaam elpeci niisngaarkauluku aturluki-llu alerquutai igausngalriit ukuni kalikarni elitnaurutaini. Umyualinqigtarkauluci-llu ircaqurpeciuggun tamalkirrluci.

¹¹“Alerquun cikiuteka unuamek, elpecen̄un arturnarqelriarunrituq pisciigalnguuvkenani-llu.

¹²Qilagmi-llu pagaani uitavkenani. Apnarqevkenaci waten, ‘Kia-kiq mayurluni atraucarturyartau, niitniarput aturluku-llu?’

¹³Wall'u imarpiim akiani uitavkenani. Apnarqevkenaci waten, ‘Kina-kiq qeraryarta imarpiim akianun aqvanaluku, niicaqvut aturluku-llu?’

¹⁴Qang'a, elpecen̄i tua-i uitauq. Nallunritarci qanruteksugngaluku, kitaki aturciu.

¹⁵“Unuamek cikiramci cucuklillerkarpecen̄ek assilriamek wall'u assiilngurmek, unguvallerkamek wall'u tuqullerkamek.

¹⁶Niisngakuvciki alerquutai ATANREM Agayutevci, unuamek qanrutkellrenka elpecen̄un, kenkekuvciu niisngaluku-llu, aturluki-llu tamalkuita alerquutai, nutaan piluaqeraciquci yugyagluci-llu atanruviurciiquci. ATANREM-llu Agayutevci atawaqerceciiqaaci nunami piksagutarkarpecen̄i.

¹⁷Tau͡gken niitenrilkuvci niicuumiinaci-llu iqlutmurucimaluci agayullerkarpecen̄un allanun agayutnun,

¹⁸piunriumaarkauguci. Wii aarcirturamci waniwa, unguvangaituci ak'anun akiani Jordan-aam piksagutarkarpecen̄i.

¹⁹Wiinga-llu watua cikiramci cucukillerkarpecen̄ek unguvamek wall'u tuqumek, Agayutem-llu atawaqaasqutiinek wall'u aniqlaatiinek. Waniwa-llu qayagaaqa qilak nuna-llu nallunritesten͞gusqellukek camek cucukillerpecen̄ek. Cucukiciu unguva, kinguveci-llu unguvaniartuci.

²⁰Kenkiciu ATANEQ Agayutsi, niisngaciu piciuluci-llu elliinun, nutaan elpeci kinguveci-llu unguvamanaurtuci nunami akqutkellrani ciuliarpecen̄un Abraham-aamun, Isaac-aamun, Jacob-aamun-llu cikiutekciqniluku.”