Read Yupik Deuteronomy 31 Bible Online

Deuteronomy 31 - Yupik bible

Deuteronomy 31

¹Moses-aaq cali qalartuq yuinun Israel-aam,

²qanerluni, “Wiinga waniwa allrakungua yuinarnek arvinlegnek (120), ciuliqagten͞gusciigalilua elpecen̄un. Cali-llu ATANREM qanrutellruanga qerarngaitniluku Jordan-aaq.

³ATANEQ Agayutsi ciuvciuggun ayagciquq piunrirluki-llu atanruviit uitalriit tamaani, elpecen̄un piksagutesqelluku nuna; Joshua-m ciuliqagciiqaaci ATANREM qanellruciatun.

⁴ATANREM piunrirciqai tamakut yuut cirlakellrucimitun Sihon-aaq Og-aq-llu, angayuqakek Amorite-at, piunrirluku-llu nuniit.

⁵ATANREM cirlakevkarciqai elpecen̄un, picirkiullemtun-llu elpeci ellaitnun piciquci.

⁶Piningqerqici pektayiinaci-llu, uluryaksaqunaciki-llu: tua-i Agayutevci ATANREM tungaunani nayurciqaaci; Qacuvallagtessngaitaaci cakaarngaunaci-llu.”

⁷Tua-llu Moses-aam Joshua taisqaa qanrulluku-llu ciuqerratni tamalkuita Israel-aam yuin, “Piningqerqina pektayiinak-llu; elpet waniwa ciuliqagciiqaten ukut yuut piksagutellerkaanun nuna ATANREM akqutkellra ciuliaritnun.

⁸ATANREM elliin ciuliqagciiqaaci nayurluci-llu. Cakaarngaitaaci wall'u qacuvallagtelluci, taumek qacuiryaqunaci alingyaqunaci-llu.”

⁹Tua-i Moses-aam igautai Agayutem alerquutai tunluki-llu Levite-anun agayulirten̄un, aulukilrianun ATANREM Akqutiin Yaassiigtaanek, cali-llu ciulirnernun Israel-aani.

¹⁰Elliin-llu alerqurai, “Allrakut malrunelgen iquatni, akiilngurnek perririyaraq tekitaqan, una naaqelarciqerci qastuluci Nerevkaritiitni Uqisviit.

¹¹Naaqelaqiciu niitelluku Israel-aam yuinun agayuyarturaqata ATANERMUN Agayutevcen̄un tuani ataucimi cucukumalriami agayuvigkami.

¹²Qayagaurluki quyurtelluki tamalkuita angutet, arnat, mikelnguut, allanret-llu uitalriit nunavcen̄i, tamarmeng niitnaurtut tamatumek elilluku-llu qigciklerkaa ATANREM Agayutevci, niisngaluki-llu elitnaurutai pinritevkenaki.

¹³Waten piluci kinguveci niiteksailnguut ATANREM Agayutevci alerquutiinek niicet'larciqaci. Cali-llu ellaita elitniaraat elliin niisngallerkaa uitallermeng taktaciatun nunami piksagutarkarpecen̄i akiani Jordan-aam.”

¹⁴Tua-llu ATANEQ qanertuq Moses-aamun, “Ak'anun unguvangairututen. Qayagaurru Joshua tailluku-llu Pelatekamun, alerquaniarqa.” Moses-aankuk-llu Joshua-llu Pelatekamun quyurrvigmun ayaglutek.

¹⁵ATANREM-llu alairvikak tuani amirlukun napalriakun, tauna napaluni Pelatekam quyurrviim ikirtuqaan mengliini.

¹⁶ATANEQ-llu qanertuq Moses-aamun, “Ak'anun pivkenak tuquciquten. Tuqullerpet-llu kinguani yuut avtarkaugut wangnek, akqun-llu taqelqa ellait pillgutekluki navgarkaugaat. Cakaarciqaatnga agayulangluteng agayutnguaritnun itrarkameng nunam yuin.

¹⁷“Tuaten pikata wiinga eq'uqruciiqanka; cakaarciqanka piunrirarkaugut-llu. Cangerliit amlleret tekiciiqut ellaitnun, ellait-llu tamatum nalliini qanerciqut, ‘Makut-wa assiitellriit wangkutnun tut'ellilriit Agayutem nayunriakut?’

¹⁸Tau͡gaam wiinga ulurciqanka assiitellriamek caliata agayutnun-llu allanun cauluteng.

¹⁹“Waniwa una yuarun igausgu. Elitevkarluku-llu Israel-aanun, asguranairutngunaurtuq ellaitnun.

²⁰Tua-i tekiucimarikumteng nunamun enuqitnailngurmun, akqutkellemnun cikiutekciqniluku ciuliaritnun, tamaani camirrluteng nerlarciqut uitavimeggnek-llu arenqililuteng. Tau͡gaam allanun agayutnun cauciqut tamakut-llu kevgiurluki, qessayagullua-llu wii akqutka-llu navegluku.

²¹Amlleret-llu cangerliit arenqiallugutet-llu tuskata ellaitnun, man'a yuarun nallunairutnguciquq ellaitnun. Uum-llu nalliini, tuavet nunamun akqutkellemnun ayaupailemki, nallunritaqa ak'a qaillun pinaluteng umyuanguciat.”

²²Taumi ernermi Moses-aam igautellrua yuarun elitnaurtelluku-llu Israel-aam yuinun.

²³Tua-llu ATANREM qalarutaa Joshua, qetunraa Nun-am, qanerluni, “Piningqerqina qacuiryaqunak-llu; tua-i-wa elpet Israel-aam yui ayauciiqngavki nunamun ukvernarcarilua akqutkellemnun: wiinga nayurciqamken.”

²⁴Moses-aam-llu ATANREM alerquutii igautaa kalikarnun qaqilluku.

²⁵Qaqicamiki alerquutet igautellni alerqurai agayulirtet Levite-at, ATANREM Akqutiin Yaassiigtaan aulukestai,

²⁶“Ukut kalikat imalget alerquutmek teguciki elliluki-llu canianun ATANREM Agayutevci Akqutiin Yaassiigtaan, tuani uitaluteng nallunairutnguniartut ukunun yugnun.

²⁷Nallunritaqa pamailucirci ciumuaryullerci-llu. Atam ak'a unguvallma nalliini ciumuarluci narureskessi Agayun; qaillun-kiq nutaan pitaniarceci catairuskuma!

²⁸Tamalkuita ilakellriartavci ciuliqagtait ciulirneret-llu taivkarciki ciuqamnun, makunek qanrutnianka, qilak-llu nuna-llu qayagaurniagka nallunritesten͞gusqellukek tungiitnun.

²⁹Nallunritaqa tuqumarikuma assiitellrianek aturciquci, qessakengluki-llu elitnaurutkellrenka. Ukegkuni-llu ernerni tekitarkani cangerlagmun puukarciquci, tua-i-wa ATANEQ eq'uqertem̄un cingciqngavciu assiitellria inerquutekellra aturluku.”

³⁰Tua-llu Moses-aam yuarun tamalkuan naaqaa tamarmeng Israel-aam yui niicugnillratni.