Read Yupik Deuteronomy 32 Bible Online

Deuteronomy 32 - Yupik bible

Deuteronomy 32

¹“Qilagmi, niicugni qalartellemni; nunam-llu niilliki. Elluarrluku niicugnikiciu qanelqa.

²Wii elitnaurutka igeskili ellallugtun, nunamun-llu tull'uni unuakum yukutaatun. Wii qanellrenka igqaqciqut ellallilriatun naugaarnun, ellallilriatun-llu canegnun naugaarnun.

³Wii nanrarciqaqa ATANREM atra, elliin-llu yuin qanrutkeciqaat angtatailucia.

⁴“ATANEQ artuqailnguq ingluliurtekan, natlugnerunani pitalqeggluni-llu tamiin ayuqucimikun; Elpet Agayuten piciulriaruuq, iqluyuituq; calilartuq piciulrianek ellualrianek-llu.

⁵Tau͡gaam elpeci piciunrituci, tunriukutnaqluni elliinun yuk'evkallerkarci, atanruviuluci assiilngurtuluci iqluuryugluci-llu.

⁶Waten-qaa ayuqutnarqerci ATANEQ, elpeci usviilngurni umyugailngurni-llu? Ellii atakarci, piliaqestekluku, elliin-llu atanruviurtellruaci.

⁷“Umyuaqiciu kingunerci, ak'a tamaani pilleq; apciki ataci qanrutesqelluci qaillun pillratnek; apciki-llu angukaraat qanrutkesqelluku kingunerci.

⁸Quyinrulriim elkartellrui atanruviit nunautekaitnun; pillerkiurumaluku-llu nani yuut uitallerkaat. Ellii-llu elkarciuq tamalkuitnun atanruviit pikirluki qilagmiungulriamek.

⁹Tau͡gaam Jacob-aam kinguvri elliin cucukai piknaluki.

¹⁰“Nalaqellrui ayagallratni mertailngurkun nunakun, alianarqellriami anuqetulriami-llu yuilqumi. Caiyailkuciumallrui aulukluki-llu, ellminek tuaten caiyailkuciumaiyaucirmitun.

¹¹Yaqulpagtun piyagaminek elitnaurilriatun tengauryaurtellerkaatnek, mic'etaqluki cavkarpek'naki nengingalriignun yaqugminun, tuaten ATANREM Israel-aat igtellerkaatnek avisngavkallrui.

¹²Kiimi ATANREM ciuliqagtellrui yun'i, ikayurtaunani tangnerranarqelriamek agayutmek.

¹³“Atanirturilriaruvkallrui qertulriani nunani, nerlartut-llu naumalriarinek nunam. Nalaqutaqluteng evegtaam neqiinek teggalqut akuliitni; napautait-llu olive-aat nauluaqeraqluteng teggalqulilriami nunami.

¹⁴Kuluvautmeng qusngirngalnguutmeng-llu milgatnek amllermek pingqellruut; assinkacagaitnek-llu qusngit, qusngirngalnguut, kuluviit, mukaarkat, wine-at-llu pingqerrluteng.

¹⁵“ATANREM yui tukuurtellruut, tau͡gaam inglulicugluteng; uquringluteng aqsimarrlainarluteng-llu. Tua-i-llu Agayun piliaqestellerteng unilluku, qessakluku artuqailnguq anirturteteng.

¹⁶Agayutnguanun-llu agayulallermegteggun ATANEQ ciknavkaraat; assiilnguliullermegteggun tuaten qenngevkarluku.

¹⁷Ekuagiaqluteng tuunrangayagnun agayutngunrilngurnun, agayutnun nallukaitnun ciuliarita allanun-llu kinguqvaggun alailrianun, agayutnun Israel-aam ciungani maligtaquksailkaitnun.

¹⁸Nalluyagutellruat artuqailnguq Agayutseng, unguvamek cikirtellerteng.

¹⁹“ATANREM man'a tangrramiu qenertellruuq, qessayagulluki-llu qetunrani panini-llu.

²⁰Qanerluni-llu, ‘Wiinga ulurciqanka; tangerrniarqa qaillun pimallerkaat, ukut pamailnguut, piciunrilnguut yuut.

²¹Agayutngualiamegteggun qenercetellruatnga, ciknakluki apqait agayutet, agayutet ilumuulriamek agayutngunrilnguut. Taumek wii ciknavkarciqanka tamakutgun yuunrilngurteggun; qenercetaarluki-llu usviilngurkun atanruvigkun.

²²Eq'uqertelqa kumangarkauguq kenertun ekualuku-llu ca tamalkuan nunami. Tekitarkauluku-llu tuqumalriit nuniit camani ekualuki-llu ingrit aciit.

²³“‘Tuc'eciiqanka ellaitnun nangyuilnguut cangerliit aturluki-llu pitegcautenka tamalkuita ellaitnun.

²⁴Tuquaciqut paluluteng puqelvagkun-llu; naulluutet-llu cali assiitqapigtellriit tuqurqeciqait. Ayagceciciqua yuilqum ungungssiinek uirrestekaitnek, tuqunarqelrialegnek-llu ciissirpagnek keggmartekaitnek.

²⁵Anguyagkun tuqurqumaciqut tumyarani; ircaqruallaganarqelriit-llu enaitni pilarciqut. Ayagyuat angutet arnat-llu tuquciqut; uitacimangaunateng-llu mikelnguut wall'u angukaraat.

²⁶Piunriryugngayaaqanka tamaq'apiita kitumun umyuaqerkaunrirtelluki.

²⁷Tau͡gaam inglukestait ucuryagtesqumanritanka, cirlakellruniluki yuunka, wiinga wangnek tuaten pillruamki.’

²⁸“Israel-aaq atanruviuguq umyugaunani; umyuartuneq pikenritaat.

²⁹Ayuqucingesciigataat-llu ciin cirlakumacirteng; taringesciiganaku qaillun picirteng.

³⁰Ciin tiissitsaat cirlakaki ataucim, qulen-llu tiissitsaat malrurraak? ATANREM Agayutiita unitellrui; artuqailnguum Agayutiita tuatequallrui.

³¹Inglukestaita nallunritait ellaita nakmiin agayutmeng pinialuciat, ayuqevkenaku artuqailnguq Israel-aat Agayutiit.

³²Ellaita inglukestait assiitqapiggluteng Sodom-aarmiucetun Gomorah-rmiucetun-llu, ayuqut napayaartun naugilriatun cungarninarqellriamek tuqunarqellrianek-llu wine-arkanek atsanek,

³³wine-atun-llu piliaqumalriamek tuqunarqelriaratnek ciissirpiit.

³⁴“ATANREM umyuaqaa qaillun inglukestaita pillrat; utaqalgirtuq-llu piunarqellerkaatnek anucimirqecetaarnaluki.

³⁵ATANREM akinaurciqai anucimirqecetaarluki; iqullerkaat erenrem iliini tekiciiquq; piunrillerkaat canimelliuq.

³⁶ATANREM akinauruciiqai yun'i tangerquniu piningqenriuciat. Takumcukciqai kevgiulriit ellminun, tangerquniu ellmeggnek ikayurciigaluciat.

³⁷Nutaan-llu ATANREM apciiqai yun'i, ‘Nauwa-mi tamakut artuqailnguut agayutet cacetuqutekelci,

³⁸nerevkalci uquitnek ekuagiaqavci cikilci-llu wine-amek merkaatnek? Taivkarciki ikayurnauraiceci; aqvaqurluteng-llu tailit anirturyarturluci.

³⁹“‘Wii, wiinga kiima Agayutnguunga; allamek agayutetaituq avatemni. Tuqucilartua unguvavkarilua-llu; kiliqenglartua mam'ivkarilua-llu, kia-llu imum ingluliurciigataa ca wii pilqa.

⁴⁰Unguvangqerrlua Agayutngucimtun talliqa nalugaqa ukvernarcarilua-llu

⁴¹wii ipegcararkauluku qevlialria nuussirpaka ellualria taqnaluku. Akinaurciqanka inglukestenka anucimirqecetaarluki-llu eq'ukestenka.

⁴²Pitegcautenka kuterpagciqut augatnek, nuussirpama-llu tuquciiqai tamalkuita ingluliurtenka. Kina callugteka uitasngaunaku, kilinelget teguat-llu ayuqluteng tuquciqluteng.’

⁴³“Atanruviulriani, nanrarnarqaci ATANREM yui, anucimirqecetaalarai tuqutestait. Akinaularai inglukesten̄i au͡g'aritaqluki-llu assiilnguitnek yun'i.”

⁴⁴Joshua-m, Nun-am qetunraan, Moses-aam-llu man'a naaqaa Israel-aam yuinun niitesqelluku.

⁴⁵Moses-aam qaqicamiki qalarutkellni yugnun, Agayutem elitnaurutai,

⁴⁶qanertuq, “Pinritevkenaci niiskiciki alerquutet qanrutkellrenka unuamek elpecen̄un. Qanrutkaqluki pikiciki irniarpecen̄un, ellaita-llu pinritevkenateng niisnganaurait tamalkuita Agayutem elitnaurutai.

⁴⁷Makut elitnaurutet ellmikuunritut; elpeci unguvakaci. Niisngakiciki unguvamanaurtuci nunami Jordan-aam akiani piksagutarkarpecen̄i.”

⁴⁸Tuani-llu ernermi ATANEQ qanertuq Moses-aamun,

⁴⁹“Ayii ingrinun Abarim-aanun, Moab-am nuniini nalliini nunarpiim Jericho-m. Mayurru Ingriq Nebo kiarrluku-llu Canaan-aam nunii cikiutekarkaqa Israel-aam yuinun.

⁵⁰Elpet tuquciquten qaingani taum ingrim anelguten Aaron-aaq tuqullruciatun qaingani Ingrim Hor-am, tua-i-wa tamarpetek piciullrunrilavtek wangnun ciuqerratni Israel-aam yuin. Meribah-m mer'ini uitallerpecen̄i, Kadesh-armiut caniatni Zin-am yuilqurtaani, qigcignailngurtun ayuqucavtegnga yuut tangvallratni.

⁵¹

⁵²Yaaqvanek tangerciqan nuna, tau͡gaam iterngaitan nuna cikiutekaqa Israel-aam yuinun.”