Read Yupik Deuteronomy 33 Bible Online

Deuteronomy 33 - Yupik bible

Deuteronomy 33

¹Makut maa-i atawaqautet Moses-aam, Agayutem pistiin, qanrutkellri Israel-aam yuinun tuquvailegmi.

²Qanerluni, “ATANEQ taillruuq Ingrimek Sinai-amek; akertetun-llu pit'ellruuq Edom-aam quliikun ciqinqerluki-llu yun'i Ingrimek Paran-aamek. Tiissitsaanek qulnek an'gilanek maligluni tegumiarluni tallirpilernerkun unatmikun ekualriamek kenermek.

³ATANREM kenkai yun'i cavkarngaunaki-llu elliin pikekni. Taumek wangkuta ciktukut it'gainun niisngaluki-llu alerquutai.

⁴Wangkuta niisngaaput alerquutet Moses-aam cikiutekellri wangkutnun, atanruvimta piutaini qununarqenrulriit.

⁵ATANEQ atanrurtellruuq yum'inun Israel-aanun ilakutellriit ciulirneret-llu quyungqallratni.”

⁶Reuben-aam ilakellriartai piluki Moses-aaq waten qanertuq: “Reuben-aam kinguvri nangyuilkilit yugyanrilngermeng.”

⁷Ilakellriari-llu Judah-m piluki waten qanertuq: “ATANEQ, niiski qayagaullratni ikayuusqelluteng; ilaitnun ataam ilaksaguteski. Calluuciski ATANEQ ikayurluki-llu inglukestaitnek.”

⁸Levi-am ilakellriartai piluki waten qanertuq: “ATANEQ, elpet pisquten nasvaggu Urim-aakun Thummim-aakun-llu, piciulriatgun kevgarpegun Levite-atgun; Naspaallrukten Massah-mi, asguranairluku-llu piciulriaruciat mer'ini Meribah-m.

⁹Ellaita-llu nasvallruat arcaqakinrucirteng elpenek pinruluten angayuqameggni, anelgut'meggni, irniameggni-llu. Ellaita-llu niisngait alerquuteten piciuluteng-llu akqutevnun.

¹⁰Elitnaurciqait yut'en niisngallerkaatnek alerquutevnek; elliitnek ekuagilarciqut ekuavigpeni.

¹¹ATANEQ, ikayurki ilakutellriari piniriinartelluki; ilukegcitekluki caliarit. Passiki tamalkuita inglukestait, naunqigcetevkenaki.”

¹²Benjamin-aam ilakellriari piluki waten qanertuq: “Ukut waniwa ilakellriit ATANREM kenkekai cayailkuciumaluki; ernerpak nayularai, uitaluni akuliitni.”

¹³Joseph-aam-llu ilakellriari piluki waten qanertuq: “ATANREM atawaqertelliu nuniit ellallugmek, mermek-llu ulvelriamek camaken nunamek.

¹⁴Nuniit-llu atawaqercecimali atsanek akertem̄i taqmigingalrianek nurnaunateng assinkacagait atsat nauyarameggni tamalkuita.

¹⁵Ak'a tamaanillaat penguit patumalit assinqurritnek naucetaat neqkat.

¹⁶Nuniit-llu imiumali canek tamalkuitnek assilrianek, atawaqercecimaluni assiuciakun ATANREM, Ellii qalartellrulria ekualriamek napayaarmek. Makut atawaqautet tuskilit ilakutellriartainun Joseph-aam, tua-i-wa ellii ciuliqagten͞gullruan anelgutmini.

¹⁷Joseph-aaq piningqertuq kuluvagtun angucalutun. Cirunengqertuq yuilqurmiutartun kuluvagtun. Cirunri Manasseh-mi tiissitsaaruut amlleret, Ephraim-aami-llu qulen tiissitsaat. Aturluki cirunermiaraciqai atanruviit, cingluki nunam iquinun.”

¹⁸Ilakutellriari Zebulun-aam piluki waten qanertuq: “Zebulun-aaq piluaqerrlainaqili imarpigmi naverrniallermeggni, Issachar-am-llu tukuutai ulelit nunameggni.

¹⁹Kelgilartut allanernek ingrimeggnun, tuani-llu elliitnek canganarqutailngurnek ekuagilartut; tukuurcameng imarpiim tukuutainek, qau͡gyam-llu iirumalriarinek tukuutnek imarpiim cen̄iini.”

²⁰Gad-aq-llu piluku waten qanertuq: “Nanraumali Agayun, nunautiit pivigturivkaaku. Gad-aq nayulartuq yugtutulitun, tallinek nuyanek-llu qecigtuumaita qecuginaluni.

²¹Cucuklillruut nunam assinranek pikameggnek; ciuliqagcilrianun allakaumalria ellaita pikarkaurtellruat. Niisngallruit-llu ATANREM alerquutai ciuliqagtai Israel-aam quyungqallratni.”

²²Dan-aq-llu piluku qanertuq: “Dan-aq yugtutulim piyagaqaa; Bashan-aam tungiinek qeckalria.”

²³Naphtali-llu piluku qanertuq: “Naphtali atawaqercecimauq ATANREM piluaqaasqutiinek; nunautii ungalatmun ayaumauq nanvamek Galilee-amek ayagnirluni.”

²⁴Asher-aaq-llu piluku waten qanertuq: “Asher-aaq atawaqaasqumanruuq allani yuullgutkellriani. Kenkataqlitgu anelgutain, nunautiini-llu enurnaillit olive-aat napait.

²⁵Nunarrai asvairqumalit iteryarait cavignek; ernernek-llu cikiumatacirpetun pitaciluki piniliumaciquten.”

²⁶Israel-aam yuini, Agayutevcetun ayuqelriamek agayucetaituq. Qilagteggun ucurnarqucimikun ayalartuq; amirlut akuliitgun ayagluni ikayuryartularaaci.

²⁷Agayun eterrlainalria uitavikarci; piunrirngailnguuk tallik nayumiqastekaci. Elliin inglukesteci antellrui ciunerpecen̄ek, qanrulluci-llu piunriisqelluki tamalkuita.

²⁸Tua-i Jacob-aam kinguvri uitaut uitanqegciluteng, camek enuqitevkenateng nunami mukaarkalilriami wine-arkalilriami-llu; nunami mercimalriami qiliim taituanek.

²⁹Israel-aaq, angnirpagcit! Elpetun ayuqellriamek atanruvigmek pitaituq, yui ATANREM anirtuumaluki. Ellii-llu ATANEQ capkutaqerci caskukluku-llu, ingluliurutarkauluci cirlakivkarluci. Inglukestevci ullagciqaiceci takumcukesqelluteng, tau͡gaam elpeci tutmauciiqaci.