Read Yupik Deuteronomy 4 Bible Online

Deuteronomy 4 - Yupik bible

Deuteronomy 4

¹“Nutaan-llu Israel-aam yuini, niicugniciki picirkiutet alerquutet-llu elitnaurutenka elpecen̄un, aturluki-llu; unguvanaurtuci, iterluci-llu piksagutnaurci nuna ATANREM ciuliarpeci Agayutiita cikiutii.

²Elpeci-llu ilangaitarci qaneryaraq alerquutekelqa elpecen̄un, wall'u cali ilangarrngaunaku. Aturciki alerquutai ATANREM Agayutevci cikiutekellrenka elpecen̄un.

³Iigpeciuggun tangellruarci qaillun ATANREM pillra Baalpeor-ami. Tua-i ATANREM Agayutevci piunrillrui tamalkuita akunlevcen̄ek ciktaallret Baal-amun.

⁴Tau͡gaam elpeci asvaitellerni ukverpeciuggun ATANERMUN Agayutevcen̄un maa-i tamarpeci unguvauci.

⁵“Tangerrluku elicungcallruamci picirkiutnek alerquutnek-llu ATANREM Agayutma alerquuciatun, elpecen̄un atuusqelluki nunami itqevcen̄i piksagutarkauluku.

⁶Qemangqakiciki aturluki-llu; tua-i umyuartuciquci taringumaluci-llu tangellratni atanruvilget. Ellaita niiskunegteki makut tamalkuita picirkiutet qanerciqut, ‘Ilumun una atanruvik yungqertuq umyuartulrianek taringumalrianek-llu.’

⁷“Nani atanruvilegmek pitangqerta agayutengqellriamek canimenaku, ATANERTUN Agayucetun wangkutnun canimelngurtun? Tamiini elliin niitelaraakut qayagaaqamten̄i ikayuusqelluta.

⁸Cali-llu nani pitangqerta atanruvilegmek picirkiutengqellriamek alerquuterluni-llu ellualrianek makucetun alerquutetun ciuqerpecen̄i unuamek nasvallemtun?

⁹Tau͡gaam qaunqici, murilkelluci cakneq elpecen̄ek, iigpeci tangellrit nalluyagucuaraci, ircaqurpecen̄i-llu uitanriryuartut unguvallerpeci taktaciatun. Nallunrirceciu irniarpecen̄un tutgarpecen̄un-llu

¹⁰qaillun tuani ernermi nangengqallerci ATANREM Agayutevci ciuqerrani Horeb-aami, ATANREM-llu qanellra wangnun waten, ‘Quyureski yuut ciuqamnun niicetnaunka qaneryaramnek, elitnauraat qigcigyullerkarteng wangnek ernerni tamalkuita unguvallermeggni nunami, tuaten-llu elitnaurnaurait irniateng ayuqesqelluki.’

¹¹“Qanrutekluku-llu elpeci nangerngallerci caniani ingrim, ekurpallrani ingriq kenermek qilak tekilluku, caqumaluni amirlumek tan'gercetqapigtellriamek.

¹²Tuani ATANREM qalarutellrukiici kenrem akuliinek; elpeci niilluku qanelriim nepii tau͡gaam elucia tangerpek'naku, erinaqainarmek tau͡gaam niilluci.

¹³Cali qanrutkaa elpecen̄un akqutni tauna elpecen̄un alerquutekellni atuusqelluku, taukut-wa inerquutet qulen elliin igautellni malrugnun teggalqugnun.

¹⁴Alerqurlua-llu elitnauresqelluci alerquutnek aturarkarpecen̄ek nunami piksagutarkarpecen̄i.

¹⁵“Taumek murilkici cakneq elpecen̄ek. Tua-i tangellrunrituci elucilegmek tuani ernermi ATANREM Horeb-aami qalarutellrani kenrem qukaanek.

¹⁶Taumek assiiruyutekarpecen̄ek elpecen̄ek pilingaituci watqapik cam ayuqiinek: angutnguamek, arnaruamek,

¹⁷ungungssimek, yaqulegmek,

¹⁸ciissimek wall'u neqmek.

¹⁹Cali ciktaarviknaluki wall'u kevgiurnaluki umyuartequcaqunaciki qilagmi tangtukci — akerta, iraluq, agyat-llu. Makut ATANREM Agayutevci tamalkuitnun yugnun qiliim aciani allakalqai.

²⁰Tau͡gaam ATANREM elpeci teguluci anutaaci kaminiarpagmek, Egypt-aamek, yuusqelluci elliin nakmiin pikluci, maa-i pikliusngallermitun.

²¹Cali-llu ATANREM qenrutellruanga elpeci pitekluci, qanerluni-llu wangnun Jordan-aaq qerarngaitniluku, iterngaitnilua-llu assilriamun nunamun ATANREM Agayutevci cikiutekellranun elpecen̄un paitaqesqelluku.

²²Tua-i wiinga tuquarkaugua maani nunami, ayagciigatua akianun Jordan-aam; tau͡gaam elpeci ayagciquci piksagulluku-llu tamana nuna assilria.

²³Murilkekici elpecen̄ek, nalluyagucuarci akqutii ATANREM Agayutevci akqut'liallra pillgutekluci. Niisngaluku-llu inerquutekellra pilisqevkenaci agayutnguanek;

²⁴tua-i-wa ATANEQ Agayutsi kenertun ayuqngan ayulriatun, inglukesten̄i uitasngaunaki.

²⁵“Irniangellerpeci kinguani tutgarangluci-llu, nunami-llu tamaani ak'allaurrluci, assiilnguq atuquvciu agayutngualiluci elucilirluku canek piciatun, aturluku assiilnguuluku-llu tangvakngaa ATANREM Agayutevci, eqcetaarluku qenertellerkaanun,

²⁶tua-i waniwa qayagaagka qilak nuna-llu nallunritesten͞gusqellukek elpecen̄un unuamek, niitenrilkuvciu alerquuteka, piunriumaqapigciiquci maaken nunamek. Tamaani-llu piksagutarkarpecen̄i nunami akiani Jordan-aam ak'anun yuungaunaci. Pinrilqurrunaci piunriumaarkauluci.

²⁷Cali ATANREM cekavciiqluci akuliitnun ayuqenrilnguut yuut, ikgellrurtarkauluci tamakuni allani angayuqauvilegni ATANREM ayagvikevkallrini.

²⁸Cali-llu tamaani kevgiurciquci agayutnun muragnun, teggalqunun-llu, yuut unataita piliaritnun, tangerciigalngurnun, niicuilngurnun, neryuilngurnun, naryuilngurnun-llu.

²⁹Tau͡gaam tamaantellerpecen̄i yuarciqerci ATANEQ Agayutsi, nalaqeciqerci-llu, yuaquvciu ircaqurpeciuggun yuucirpeciuggun-llu tamalkirrluci.

³⁰Nangteqkuvci, makut tamarmeng tuskata elpecen̄un ernerni kinguqlirni, uterciiquci ATANERMUN Agayutevcen̄un niilluku-llu erinii.

³¹Tua-i-wa ATANEQ Agayutsi naklegtalriaruami; cakaarngaitaaci piunrirngaunaci-llu, nalluyagusngaunaku-llu elliin akqun piliallni ciuliaci pillgutekluki.

³²“Kitaki apqaurutkiciki watua erenret pellullret yuurpailegpeci, erneq ayagneqluku Agayutem pilillra yugmek nunami. Apqaurluci qiliim iquanek iquanun waten angtalriamek piurcimalriartangqellrucianek, wall'u kina niitellrucianek mat'um ayuqiinek.

³³Nani-qaa yuut niiteqaqsaitut eriniinek agayutem qalartellriamek akuliinek kenrem, elpeci niitellrucirpecetun tau͡gken unguvaluci?

³⁴Wall'u nani agayucetangqerta teguilriamek yugnek piknaluki allamek angayuqauvigmek, tuaten ATANEQ Agayutsi elpecen̄un pillruciatun Egypt-aami? Iigpeciuggun tangellruksi pinini artuqailucini-llu aturluku cangerlagnek anguyagmek-llu tut'evkarillra; irr'inarqellriatgun-llu wall'u nallunailkutatgun calillra, cat-llu alingnarqelriit tut'elluki.

³⁵Elpecen̄un man'a nasvaumallruuq nallunritesqelluku ATANREM Agayutngucia; allataituq-llu avatiini.

³⁶Qilagmek pakmaken elpecen̄un erinani niicetaa ellangcarluci; nunami-llu keneq angelria, elliin pini tangercetaa, niitarci-llu qalartellrani kenrem akuliinek.

³⁷Tua-i-wa kenekngamiki ciuliaci cucukluki-llu kinguvrit kinguatgun, anulluci-llu Egypt-aamek tungaunani, angelriakun-llu pinimikun.

³⁸Ciunerpecen̄ek au͡g'arluki atanruviit angenrulriit pininrulriit-llu elpecen̄i, itrutnaluci cikiutekluku nuniit kinguvanertaqevkarluku, maa-i tuaten ayuquciatun.

³⁹Taumek nallunriciu unuamek umyuarpeciuggun ATANREM Agayutngucia qilagmi pakmani nunami-llu. Allataunani-llu.

⁴⁰Taumek aturarkaugaci picirkiutai alerquutai-llu, alerquutekellrenka elpecen̄un unuamek, elluarrluci piurniartuci irniaci-llu kinguvcen̄i, unguvamaniartuci-llu nunami ATANREM Agayutevci cikiutekellrani elpecen̄un.”

⁴¹Tua-llu Moses-aaq allakariuq nunarpagnek pingayunek Jordan-aam calaralirnerani,

⁴²tuqucillrem qimagvigkainek, ilani tuquskaku pitsaqa'artevkenaku inglukellruvkenaku-llu, tua-i qimakuni taukut nunarpiit iliitnun unguvani anirturciqaa.

⁴³Ukut waniwa nunarpiit: Bezer-aaq yuilqumi manigcelngurmi nunami Reubenite-at qimagvigkaat, Ramoth Gilead-aaq Gadite-at qimagvigkaat, cali Golan-aaq Bashan-aami Manassite-at qimagvigkaat.

⁴⁴Waniwa alerquun Moses-aam taqellra Israel-aam yuinun;

⁴⁵makut-llu cali maa-i picirkiutet alerquutet-llu Moses-aam qanrutkellri Israel-aam yuinun Egypt-aamek anellratni.

⁴⁶Akiani Jordan-aam kuignayugmi nalliini Bethpeor-am, nunautiini Sihon-aam angayuqrata Amorite-at. Tauna uitauq Heshbon-aami, Moses-aam Israel-aam-llu yuin cirlakellrat Egypt-aamek anllermeggni.

⁴⁷Cali ellaita tegullruat piksagulluku nunii, Og-am-llu nunautii angayuqrulriim Bashan-aami, ukuk malruk Amorite-at angayuqaqagket uitalutek calaralirnerani Jordan-aam.

⁴⁸Nuna una ayagnirtuq Aroer-aamek uitalriamek mengliini kuignayuan Arnon-aam, tekilluku Ingriq Sirion-aaq (tauna Hermon-aaruuq).

⁴⁹Ilakluku tamalkuan Arabah calaralirnerani Jordan-aam, tekilluku imarpia Arabah-m, Ingrim Pisgah-m aciani.