Read Yupik Deuteronomy 5 Bible Online

Deuteronomy 5 - Yupik bible

Deuteronomy 5

¹Moses-aam-llu taisqai Israel-aat tamalkuita, qanrulluki-llu, “Yuini Israel-aam, niiciki picirkiutet alerquutet-llu qanrutkarkanka elpecen̄un unuamek. Elitarkaugaci pinritevkenaki-llu maligtaquluki.

²ATANEQ Agayutvut akqut'lillruuq Ingrimi Sinai-ami,

³ciuliamten̄un kiingan pivkenani tau͡gaam wangkutnun tamamta maa-i unguvalrianun.

⁴ATANREM qalarutellruaci tungaunani tuani ingrimi kenrem akuliinek.

⁵Wii nangerngallrulua akulevcen̄i ATANEQ-llu taum nalliini qanrutnaluci qanellranek elliin; tua-i-wa alingellruavci kenermek mayuryugpek'naci-llu ingrimun. “Ellii waten qanertuq:

⁶‘Wii ATANRUUNGA Agayutsi, anutestellerci Egypt-aamek, teguarullerpecen̄ek.

⁷“‘Allanek Agayutengqerrngaituci ciuqamni.

⁸“‘Pilingaituci pikarpecen̄ek agayutnguamek wall'u cam ayuqiinek pakmani qilagmi uitalriim wall'u nunam qaingani uitalriim ayuqiinek wall'u camek camani mermi nunam aciani uitalriim ayuqiinek.

⁹Cikngaituci tamakunun kevgiurngaitaci-llu, tua-i-wa wii ATANEQ Agayun Agayutnguunga ilunglua, ataita assiilngillrit tuc'etaqluki irniaritnun, kinguvrita-llu pingasuingitnun cetamaingitnun-llu eq'ukestemnun.

¹⁰Tau͡gaam kenkutka manilaraqa amlleqapigtellrianun kenkestemnun alerquutma-llu aturtainun.

¹¹“‘ATANREM Agayutvet atra elliinginaq apaayaqunaku. Tua-i-wa ATANREM pinarqelriaruvkarciqngaku at'mi elliinginaq apaastii.

¹²“‘Aturru Sabbath-aaq kenciknarqevkarluku-llu ATANREM Agayutvet alerqullruciatun.

¹³Ernerni arvinlegni caliarkaten caliaqeciqaten,

¹⁴tau͡gaam erenret malrunelgat Sabbath-aaq uitayarauguq allakaumalria ATANERMUN; tuani ernermi camek calingaituci — elpet, qetunraan, paniin, wall'u kevgaten arnat angutet-llu, wall'u ungungssiuteten wall'u allanrulria nunavni. Tua-i-wa kevgaten-llu mernuinercirarkaungata elpetun.

¹⁵Umyuaqiciu kevgaullerci Egypt-aami, cali-llu ATANREM Agayutevci nauwa anuskiici pinini aturluku. Taumek ATANREM Agayutevci alerqullrukiici atuusqelluku erneq uitayaraq Sabbath-aaq.

¹⁶“‘Takaqikek aatan aanan-llu, ATANREM Agayutvet alerqullruciatun, unguvamaniartuten piluaqeraluten-llu nunami ATANREM Agayutvet cikiutekellrani.

¹⁷“‘Tuquciyaqunak.

¹⁸“‘Akusrarutekiyaqunak.

¹⁹“‘Teglegyaqunak.

²⁰“‘Piciliqengyaqunak ilavnek.

²¹“‘Aglumayaqunak nunalgutvet nulirranek, piksuumirpek'naki-llu nunalgutvet enii wall'u nunautii, wall'u kevgai angutet arnat-llu, wall'u ungungssiutai, wall'u caungraan nunalgutvet pia.’

²²“Makut maa-i qaneryarat ATANREM qanrutkellri elpecen̄un quyungqallerpecen̄i ingrimi, qalarrluni qastuluni kenrem, amirlum, tan'gercetqapigtellriim-llu akuliinek. Makut alerquutet qanrutkellrui ilavkenaki allanek. Igautellrui-llu teggalqugnun malrugnun tunluki-llu elpecen̄un.

²³“Cali niicavciu erina tailria tungiinek tan'gerem, ingriq ekuallrani, yuullgutkellriit ciuliqagtait ciulirneci-llu wangnun taigut,

²⁴elpeci-llu qanertuci, ‘ATANREM Agayutemta nasvitaakut ucurnarquciminek angtaciminek-llu, niitellruarput-llu erinii tailuni tungiinek kenrem. Wangkuta unuamek tangrrarput Agayun qalartelluku yugmun, yuk-llu tuquvkenani.

²⁵Ciin waniwa tuqullerkamten̄un ataam piqatarceta? Tua-i nallunailngurmek uum kenerpiim piunrirciqaakut. Ilumun nutaan tuquciqukut niitenqigeskumta ATANREM Agayutem eriniinek.

²⁶Tua-i kitumek yugtangqerta niitellermek eriniinek unguvalriim Agayutem, qanelriamek tungiinek kenrem, wangkuta pillrucimcetun, unguvaluni-llu?

²⁷Canianun ayagluten niicarturki tamalkuita ATANREM Agayutemta qanerkai. Nutaan qanrutniarpekut tamalkuitnek ATANREM Agayutemta elpenun qanellrinek. Wangkuta niilluki aturniaput.’

²⁸“ATANREM-llu tamakunek niicami qanrutaanga, ‘Ukut qanellrat yuut niitaqa, ilumuuguq-llu qanellrat.

²⁹Waten-tuq kesianek umyuangqelarlit, qigciklua aturluki-llu tamalkuita alerquutenka, elluarrluteng yuunaurtut irniartuumarmeng akwarpak.

³⁰Ullagluki qanruski utertesqelluki pelatekaitnun.

³¹Tau͡gaam elpet nangengqa canimni, qanrutniamken tamalkuitnek alerquutnek picirkiutnek-llu elitnaurutkarpenek ellaitnun, aturniarait nunami cikiuteklemni pikesqelluku.’

³²“Kitaki mulngakluci atuqiciki ATANREM Agayutevci alerquutekellri elpecen̄un, cakaaqsaunaki.

³³Piyuaciquci tumiikun ATANREM Agayutevci alerquutekellrakun, unguvaniartuci umyuarniurutaunaci, unguvamanaurtuci-llu nunami piksagutarkarpecen̄i.