Read Yupik Deuteronomy 6 Bible Online

Deuteronomy 6 - Yupik bible

Deuteronomy 6

¹“Tua-llu waniwa alerquutet picirkiutet-llu ATANREM Agayutevci alerquutekellri wangnun elitnaurutkesqelluki elpecen̄un, atuusqelluki nunami ullagarkarpecen̄i piksagutarkauluku.

²Tuaten-llu elpecen̄un qigcigyagutesqelluku ATANEQ Agayuten, elpet, qetunraan, tutgaraan-llu, aturluki tamalkuita picirkiutai alerquutai-llu, wii alerquutekellrenka elpenun, unguvarpet taktaciatun, unguvamaniartuten.

³Taumek niiten, Israel-aami, mulngakluten-llu atuqiki elluarrluten yuuniartuten, yugyangluten-llu, ATANREM, ciuliarpeci Agayutiita akqutkellruciatun elpecen̄un, nunami enuqitnailngurmi.

⁴“Elpet Israel-aami: ATANEQ Agayutvut atauciuguq.

⁵Kenkarkaugan-llu ATANEQ Agayuten ircaqurpegun tamalkirrluten, cali yuucirpegun pitacirrarpegun-llu tamalkirrluten.

⁶Cali makut qaneryarat alerquutekellrenka unuamek umyuarpecen̄i uitaciqut.

⁷Cali-llu ilungluci elitnaurutkeciqaci irniarpecen̄un, qalarutkelarciqaci-llu nevcen̄i aqumgallerpecen̄i, tumyarani-llu piyuagaqavci wall'u mernuinercillerpecen̄i calillerpecen̄i-llu.

⁸Qillruciki unatevcen̄un, aturluki-llu qaurarpecen̄i nallunailkutauvkarluki.

⁹Igauciiqaten-llu maavet ikirtuqam avategkenun iteryaranun-llu.

¹⁰“Tuaten cali ATANREM Agayutvet akqellrucimitun ciuliaci, Abraham, Isaac, Jacob-aaq-llu, cikirciqaaci nunamek, nunarpagtalegmek angelrianek canek nuuqitenrilngurnek elpeci nunaliaqenrilkevcen̄ek.

¹¹Enet-llu tamakut imartuciqut assilrianek elpeci ellilqenrilkevcen̄ek, mermek-llu elakarluteng elalqenrilkevcen̄ek, naucetaarvigluteng-llu nauceciilqenrilkevcen̄ek. ATANREM taiskaci maavet nunamun neqkarpecen̄ek-llu enuryugcivkenaci,

¹²murilkekici nalluyagucuarci ATANEQ anutestellerci Egypt-aamek teguarullerpecen̄ek.

¹³Qigcikiciu ATANEQ Agayutsi, agayuaqluci elliinun kiingan, ukvernarcariaqluci-llu elliin atrakun kiingan.

¹⁴Allanun agayutnun cauyaqunaci, yuut avaqlirpeci agayutaitnun.

¹⁵Tua-i allanun agayulaquvci eq'uqertii kenertun elpecen̄un tuciiquq piunrirluci-llu, tua-i-wa ATANEQ Agayutsi nayurtessi ciknatalriaruami.

¹⁶“ATANEQ Agayutsi naspaayaqunaciu, Massah-mi pillerpecetun.

¹⁷Pinritevkenaci niisngakiciki alerquutet elliin cikiutekellri.

¹⁸Caliurluci ATANREM qanllermikun elluakekiinek assikekiinek-llu, elluarrluci piniartuci. Piksagucugngariciqerci naungignarqellria nuna ATANREM akqutkellra ciuliarpecen̄un,

¹⁹anevkarluki inglukesteci tamaaken ATANREM akqellratun.

²⁰“Ukani-llu tekitarkami irniarpeci apqaurciqaiceci, ‘Ciin ATANREM Agayutemta alerqurtakut niisngasqelluki tamalkuita makut alerquutet?’

²¹Waten qanruskiciki, ‘Wangkuta teguaqellruakut Egypt-aam Angayuqran. ATANREM-llu anulluta pinimikun.

²²Wangkuta-llu iimteggun tangellruarput calillrani irr'inarqelrianek, cali irranarqelriit tuc'etellrani Egypt-aarmiunun, angayuqratnun, atanerruarinun-llu.

²³Anutaakut-llu Egypt-aamek maavet taitnaluta cikirnaluta-llu mat'umek nunamek ciuliaput akqellrucimitun tuaten piciqniluni.

²⁴Nutaan-llu ATANREM Agayutemta alerquraakut niisngasqelluki tamalkuita makut alerquutet, cali-llu qigcikesqelluni. Tuaten pikumta elliin qaunqerkauluku kesianek nunavut enuqitnairulluku-llu.

²⁵Piciuluta niisngakumteki tamalkuita Agayutem alerquutekellri wangkutnun, ilukegcitkeciqaakut.’