Read Yupik Deuteronomy 7 Bible Online

Deuteronomy 7 - Yupik bible

Deuteronomy 7

¹“ATANREM Agayutevci ayauciiqaaci nunamun piksagutarkarpecen̄un, ayagtelluki-llu amllellriit angayuqauvilget ciunerpecen̄ek, makut maa-i: Hittite-at, Girgashite-at, Amorite-at, Canaanite-at, Perizzite-at, Hivite-at, Jebusite-at-llu.

²Cali ATANREM Agayutevci tunkaki ukut yuut, elpeci-llu cirlakluki, tuqutarkaugaci tamalkuita; iliksugyaqunaciki takumcukevkenaki-llu.

³Kassuusngaituci-llu ellaitnun, panici-llu cali uingevkarngaitaci tamaaken nulirkaitnek-llu qetunrarpeci ellaitnek pingaunaci.

⁴Tua-i-wa iqlutmuruciiqngatki irniaci maligtaquillratnek wangnek, kevgiungevkarluki allanun agayutnun. Tuaten pikuvci, ATANREM qenqerrutarkaugaaci piunrirluci-llu egmian.

⁵Kitaki navguqiciki ekuaviit tamakut piit, ciqumlluki teggalqut napartait, iqulluki agayutnguarata Asherah-m nallunailkutai, ekualuki-llu agayutnguarit.

⁶Tuaten pikici waten ATANREM Agayutevci yukngaci. Yuut amllerrsaaqut nunam qaingani, tau͡gaam elliin cucukellruaci nakmiin yuknaluci.

⁷“Allani-llu yugyanrucirci pitekluku kenkenritaaci cucukluci-llu; elpeci ikgellrullruuci allani angayuqauvilegni.

⁸Tau͡gaam ATANREM kenkaaci akqutkellni-llu piciurcecuumiraa ciuliarpecen̄un. Tamana pitekluku anirturaaci artuqailucimikun teguarullerpecen̄ek Egypt-aam angayuqranun.

⁹Neq'akiciu ATANREM Agayutevci kiingan agayutngucia piciulriaruluni. Akqutkellni aturciqaa nasvagluku-llu kenekni nangyuilnguq tiissitsaanun kinguveqellrianun kenkestem̄inun alerquutmi-llu aturtainun.

¹⁰Tau͡gaam pinritevkenani anucimirqecetaarciqai eq'ukesten̄i.

¹¹Kitaki pinritevkenaci ayuqucirtuutet maligngaciki; niisngaluki-llu alerquutet cikiutekellrenka elpecen̄un unuamek.

¹²“Alerquutet makut niicugnikuvciki niisngaluki-llu, nutaan ATANREM Agayutevci akqutni piugurceciiqaa elpecen̄un, kenekni-llu cali cimiyuilnguq ciuliarpecen̄un akqutkellrucimitun;

¹³kenkarkaugaaci atawaqertelluci-llu cali-llu yugyangevkarluci irnialingevkarluci-llu. Naucetaarvici-llu naugiluaqercetaqluki, mukaarkautengqelararkauluci, cali-llu wine-anek, olive-aat-llu uquitnek. Cali atawaqercetarkauluci cikirluci amllernek kuluvagnek qusnginek-llu. Atawaqautnek makunek cikirciqaaci tuani nunami akqutkellermini ciuliarpecen̄un cikiutekciqniluku.

¹⁴Yuut allat nunami elpecicetun pitalriamek atawaqercecimangaitut. Ilasi atauciunge'rmi, ungungssiuteci-llu irniyuilngurmek ilangqerrngaituq.

¹⁵ATANREM-llu naulluutmun pivkarngaitaaci. Egypt-aami-llu assiitellriit cirliqutet nallunritelci elpecen̄un tut'essngaitai, inglukestevcen̄un tau͡gaam.

¹⁶Piunriqiciki tamalkuita angayuqauvilget ATANREM cirlakarkaurcetellri. Takumcukngaitaci-llu. Cali kevgiuryaqunaciki agayutait picurlautekciqngavciki.

¹⁷“Umyuarpeciuggun-llu qaneryaqunaci, ‘Ukut yuut amllenruut wangkutni tavaqaa cirlaknauput.’

¹⁸Alikenriciki tamakut, tau͡gaam neq'akiciu qaillun ATANREM Agayutevci pillra Egypt-aarmiunun angayuqratnun-llu Pharaoh-mun.

¹⁹Neq'akiciki-llu alingnarqellriit cangerliit iivciuggun tangelci, imkut-llu irr'inarqelrialiat irranarqelriit-llu, pinia-llu ATANREM Agayutevci artuqailnguq, tamaaggun pinimikun teguarunrircetellrukiici. Tuaten cali ayuqellriakun piunrillrucimitun Egypt-aarmiut, elliin piunrirciqai makut yuut maa-i alikek'ngaci.

²⁰Cali ATANEQ Agayutsi ayagceciciquq tamakunun puukatulinek 'vegtarnek, piunrirarkauluki tamakut qimallret iirluteng-llu pillret elpecen̄ek.

²¹Taumek uluryakngaitaci tamakut yuut; tua-i-wa ATANREM Agayutevci nayuaci; ellii angtatailnguuluni Agayutnguuq uluryakumaarkauluni-llu.

²²ATANREM Agayutevci ayagceciiqai tamakut angayuqauvilget carraugurluki. Ataucikun piunrirciigaciiqaci, tua-i-wa tuaten pikuvci yuilqum ungungssii amllericiqngata alingnariluteng elpecen̄un.

²³ATANREM inglukesteci elpecen̄un tunciqai, umyugairuceciiqai-llu piunrirnatkaatnun.

²⁴Cali-llu elliin angayuqat cikiutekciqai elpecen̄un. Tuquciiqaci, umyuaqumangairulluteng-llu. Yuum atauciunge'rmi ingluliurciigaciiqaaci, tamalkuita piunrirciqngavciki.

²⁵Agayutnguarit ekuakiciki. Ayariyaqunaciki qaingitni uitalriit qerrirlit suulutaat-llu, teguyaqunaciki-llu piknaluki. Tuaten pillerkarci aarnarquq, tua-i-wa ATANREM eq'ukngaku agayutngualiyaraq.

²⁶Agayutnguamek-llu itrusngaituci nevcen̄un, ayuqiinek aniqlaamallrata pimayuartuci. Eq'ukarkaugaci caunrillekluki-llu tamakut agayutnguat, tua-i-wa ATANREM aniqlaamiiki.