Read Yupik Deuteronomy 8 Bible Online

Deuteronomy 8 - Yupik bible

Deuteronomy 8

¹“Pinritevkenaki niisngakiciki tamalkuita alerquutet elpecen̄un cikiutekellrenka unuamek, unguvaniartuci yugyangluci-llu piksagulluku-llu nuna ATANREM akqutkellra ciuliarpecen̄un.

²Neq'akiciu qaillun ATANREM Agayutevci ciuliqagtellrukiici yuilqumi allrakut yuinaak malruk aturluki, naspaagaqluci caknernarqellriatgun, nallunriryuamiu qaillun pillerkarci wall'u niisngaarkaucirci alerquutminek.

³Kainiqevkallruaci, nutaan-llu cikirluci neqkarpecen̄ek manna-mek, elpeci ciuliarpeci-llu ciungani nereksailkevcen̄ek. Waten ellii pillruuq nallunriisqelluku elpecen̄un yuum kelipaqainarkun unguvangailucia, tau͡gaam tamalkuitgun ATANREM qanellrikun.

⁴Aturaci qaivcen̄i nangeksaitellruut, it'gaci-llu puvyuunateng tamakuni yuinaagni malrugni allrakuni.

⁵Nallunriciu kitaki ATANREM Agayutem kitugcilallra elpecen̄ek anucimirqecetaarutetgun aatam qetunraminek pilauciatun.

⁶Taumek tuaten pilaqici ATANREM alerquuciatun: yuuluci maligtaquluki alerquutai niisngaluku-llu.

⁷ATANREM Agayutevci iluvautaaci nunamun naungignarqellriamun. Kuigtalegmun mermek-llu ulvelriartalegmun, nunam-llu aciakun kuiggartalegmun, qurrlurluteng kuignayugni qemini-llu.

⁸Tamana nuna naugilartuq mukaarkanek, atsanek-llu ayuqenrilngurnek. Cali pitarluni olive-aanek neqnirqelriamek-llu evegtaat neqaitnek.

⁹Tuani kailarngaituci camek-llu enuqisngaunaci. Teggalqurri cavigmek pitangqertut, qemiinek-llu elagyugngaluci tegglimek punernermek.

¹⁰Nerlarciquten camirrluten, quyavikciqan-llu ATANEQ Agayuten nunamek naungignarqellriamek cikiutellranek.

¹¹“Murilkekici nalluyagucuarci ATANEQ Agayutsi, atunrirluki alerquutai picirkiutai-llu, alerquutekellrenka elpecen̄un unuamek.

¹²Camirrluten nerlaquvet, eneliluten-llu assilrianek uitavigkarpenek,

¹³cali-llu kuluvauteci qusngiyagauteci-llu wall'u akiuteci suulutaaruteci-llu amllerikata, (wall'u tukuureskuvci),

¹⁴murilkekici umyuarci quyigiyuartuq nalluyagulluku-llu ATANEQ Agayutsi anutestellerci Egypt-aamek teguarullerpecen̄ek.

¹⁵Elliin ciuliqagtellrukiici angelriakun pillugnarqellriakun yuilqukun ciissirpalilriakun. Tamaani-llu kinreskiini mertailngurmi nunami elliin meq qurrlurcet'lallrua qiurmek.

¹⁶Nerevkaraqluci-llu tamaani yuilqumi manna-mek ciuliarpeci cauciilkiitnek, elpecen̄ek picalqukenriisqelluci naspaanaluci-llu, tau͡gaam iquani atawaqercetnaluci cikirluci assilrianek.

¹⁷Taumek elpeci umyuarteqerkaunrituci tukuurcukluci pingnatullerpeciuggun pinirpeciuggun-llu.

¹⁸Neq'akiciu elliin ATANREM Agayutevci pinimek cikilaraaci tukuurtelluci. Waten pillermikun, maa-i cali man'a engelkarrluku, ciumurutaa akqutkellni ciuliarpecen̄un.

¹⁹Nalluyaguteqaqsaunaciu ATANEQ Agayutsi wall'u tuigcaqunaci allanun agayutnun, tamakunun agayularnaluci kevgiurnaluci-llu. Tuaten pikuvci waniwa aarcirturamci nallunailngurmek piunriumaciquci.

²⁰Elpeci niisnganrilkuvciu ATANEQ tua-i piunriumaciquci ayuqluki tamakut angayuqauvilget elliin piunrirarkai ciunerpecen̄i.