Read Yupik Deuteronomy 9 Bible Online

Deuteronomy 9 - Yupik bible

Deuteronomy 9

¹“Niici yuini Israel-aam! Unuamek qerararkaurtarci Jordan-aaq yirluku-llu nunautiit angayuqauvilget pininrulriit elpecen̄i. Nunarpait ang'ut, avaperuterluteng quyikapigtellrianek.

²Tamakut yuut sugtuut pinirluteng-llu; yugpaugut, elpeci-llu niitellruuci yugmun akiurciigatniluki.

³Tau͡gaam watua tangerciqerci tungaunaci ATANEQ Agayutsi ayakan ciunerpeciuggun ayuqluni ekurpalriatun kenertun. Elliin cirlakciqai ciutmurtellerpecen̄i, akqellratun-llu tua-i elpeci kasemluki ayagcetarkauluki piunrirluki-llu cukamek.

⁴“Tua-llu ATANREM Agayutevci ancimarikaki tamakut yuut, waten umyuarteqsaqunak, ‘ATANREM wii elluaruciqa pitekluku maavet nunamun taitaanga piksagutesqelluku.’ Qang'a, ATANREM anciiqai tamakut yuut assiiluciat pitekluku.

⁵Elluarucirci wall'u piciulriamek atuucirci pitekluku nuniit tamana piksaguteqatanritarci. Elliin anciiqai inerciigalata, akqutkellni-llu aturnaluku ciuliarpecen̄un, Abraham-aamun, Isaac-aamun Jacob-aamun-llu.

⁶Nallunriciu ATANREM cikinritaaci mat'umek naungignarqellriamek nunamek elluarucirci pitekluku, tua-i elpeci pamailnguungavci.

⁷“Neq'akiciu nalluyagutevkenaku-llu eq'uqercecilallerci ATANERMEK Agayutevcen̄ek. Nauwa ayagnirluci anllerpecen̄ek Egypt-aamek wavet tekitellerci engelkarrluku tua-i inglulitaalalriaci ATANERMUN.

⁸Tuaten-llu cali Ingrimi Sinai-ami ATANEQ qenercetellruarci, qenertem-llu ugaani piunriqataryaaqluci.

⁹Ingrimun-llu mayullruunga ciuniuryarturlukek manigcimalriik teggalquk igaumalriik akqutkellranek ATANREM elpecen̄un. Uitallruunga-llu tuani ernerni unugni-llu yuinaagni malrugni nereksaunii meqsaunii-llu.

¹⁰Nutaan-llu ATANREM taitak wangnun malruk manigcimalriik teggalquk qaingagnun igarraarluni elliin unatmikun qanrutkellerminek elpecen̄un kenrem tungiinek tuani ernermi quyungqallerpecen̄i ingrim caniani.

¹¹Iquatni-llu yuinaak malruk erenret unuut-llu ATANREM taitak wangnun teggalquk malruk manigcimalriik igartarlutek akqutnek elliin igallrinek.

¹²“Tua-llu ATANEQ qanertuq wangnun, ‘Atraa cukamek waken ingrimek; yut'en ukut taitelten Egypt-aamek assiirutut, aturluku assiitqapigtellria, avvluteng ak'a alerquuteklemnek ellaitnun; pililuteng-llu agayutnguarkameggnek.’

¹³“ATANEQ cali qanerluni wangnun, ‘Nallunritaqa pamailuciat ukut yuut;

¹⁴arulairtengnaqsaqunii, piunrirnianka ukut kitumun umyuaqerkaunrirtelluki. Nutaan wii elpeggun angayuqauvik piurrnaurqa ukuni angenrulria pininrulria-llu.’

¹⁵“Tua-i tuigglua atrallruunga ingrimek, ang'aqlukek malruk akqutem igausngaviik. Tuani keneq ingrimek tuaken pillruuq.

¹⁶Tangrraqa-llu ak'a narurtelliniksi alerquun ATANREM Agayutevci cikiutekellra elpecen̄un, assiilngirluci-llu elliinun pililuci cavigmek agayutnguamek angucaluq kuluvak ayuqeliluku.

¹⁷Tua-i tuani ciuqerpecen̄i egtagka teggalquk manigcimalriik naveglutek-llu ciqumlutek.

¹⁸Tua-i-llu palurrlua ataam ciuqerranun ATANREM ciungani pillrucimtun, nereksaunii meqsaunii-llu ernerni yuinaagni malrugni unugni-llu. Waten pillruunga assiilngiavci ATANERMUN, eq'uqertelluku.

¹⁹Wii alingellruama ATANREM uluryanaqluni qenertellranek, tuani qenercan piunriryugyaaqellerci tekilluku; tau͡gaam cali tuani ATANREM qanelqa niitellrua.

²⁰Cali ATANREM Aaron-aaq qenrutellrua, qenrucamiu cakneq tuqucugyaaqluku, taumek wii piicautellrukeka Aaron-aaq taum nalliini.

²¹Tauna-llu assiitellria — kuluvaguaq cavigmek piliallerci — egtaqa kenermun, ciqumlluku-llu passilluku urr'artun pitariluku; eggluku-llu qamllera kuiggaarmun qurrlulriamun ingrimek.

²²“Cali-llu Taberah-mi, Massah-mi, Kibroth Hattaava-mi-llu, eq'uqercetellruarci ATANEQ.

²³Ayagcetellrani-llu Kadesh Barnea-mek alerqurluci ayagluci piksagucartuusqelluku nuna cikiutekarkani elpecen̄un, tuani cali inglulitellruuci; cacetuqutekellrunritarci niitellruvkenaku-llu.

²⁴Tua-i maaten nallunriramci inglulitaalriaruluci ATANERMUN.

²⁵“Taumek wii palungqallruunga ATANREM ciuqerrani taukuni yuinaagni malrugni ernerni unugni-llu, tua-i nallunrilamku ellii umyuamikun cumigcan piunrirnaluci.

²⁶Piicagtua-llu ATANERMUN, ‘ATANEQ Agayun, ukut nakmiin yut'en, anirtulten anutelten-llu artuqailucirpegun Egypt-aamek piunriryaqunaki.

²⁷Neq'akiki kevgaten Abraham-aaq, Isaac-aaq, Jacob-aaq-llu; ukut-llu yuut tangvanrilki pamaitellratgun, yurrluullratgun, assiilngillratgun-llu.

²⁸Egypt-aarmiut waten qanerciqngata, “Tua-i-wa ATANREM tekiutesciigalamiki nunamun akqutkellerminun, eq'ukngamiki-llu, ayautai yuilqumun tuqutnaluki.”

²⁹Tua-i elpet ukut yukngavki, cucukellruavki nakmiin yuk'arkauluki anutellruavki Egypt-aamek pinirpegun artuqailucirpegun-llu.’