Read Yupik John 1 Bible Online

John 1 - Yupik bible

John 1

¹Nutem etellrani Qaneryaraq uitallruuq, Qaneryaraq-llu Agayutmi uitallruuq, Qaneryaraq-llu Agayutnguluni.

²Tamana ciumek Agayutmi uitallruuq.

³Elliikun piurcimalria tamalkuan piurtellruuq; elliingunrilngurkun-llu ca man'a piurtellrunrituq.

⁴Unguva elliinetellruuq, unguva-llu tamana tanqiuluni yug'ni.

⁵Tanqik tanqiulartuq tan'germi, tan'gerem-llu cirlakenritaa.

⁶Tua-i-llu yuk tekitellruuq, Agayutmek ayagcecimaluni, atengqerrluni John-aamek.

⁷Tauna tekituq nallunairiyarturluni, tua-i Tanqik nallunairyarturluku, tamalkuita-llu elliikun ukvengesqelluki.

⁸Ellii-llu taunguvkenani tauna Tanqipiaq, tau͡gaam tekilluni Tanqigmek nallunairiyarturluni.

⁹Tuani imna Tanqipiaq, tua-i yuum tamarmi tanqiutii, nunamun tut'eqatarluni.

¹⁰Nunametellruyaaquq, nuna-llu elliikun piurtellruluni, tau͡gaam nunam elitaqenritaa.

¹¹Nakmiin ilaminun tekicaaquq, tau͡gaam nakmiin yuin ciuniunritaat.

¹²Tau͡gaam ciuniurten̄i, piyunarivkarai Agayutmun yuksagutesqelluki; tua-i imkut at'minun ukvelriit.

¹³Wani-wa imkut augkun, wall'u kemgem pisquciatun, wall'u yuum piyullrakun yuurtellrunrilnguut, Agayutem pisquciatun tau͡gaam.

¹⁴Qaneryaraq-llu kemgurtellruuq nayullruluta-llu, naklegtaqapiggluni piciuqapiggluni-llu; wangkuta-llu ucurnarqucia tangrrarput, wani-wa Aatam kiingan Qetunraan ucurnarqucia.

¹⁵John-aam-llu nallunairutkaa qayagpagluni, “Tua-i wani-wa imna qanrutkelqa, qanerlua, ‘Kingunemkun taigarkaq ciuliqagten͞guuq wangni, tua-i ciuqliqngamku.’”

¹⁶Qaqimallranek naklekuterrlainarmek unangelartukut.

¹⁷Tua-i alerquutet Moses-aakun cikiutekumaut, tau͡gaam naklekun piciuneq-llu Jesus-aakun Christ-akun piuq.

¹⁸Yuum-wa Agayun tangeqsaitaa watqapik, kiingan Qetunraan, Ataminun manuqliutellriim nallunairaa.

¹⁹Maa-i-llu John-aam nallunaillra, imumi Jerusalem-aamek Jews-aat agayulirten̄ek Levi-anek-llu elliinun ayagcecillratni aptesqelluku, “Kituusit?”

²⁰Tua-i-llu aperturtuq iqluvkenani-llu aperturluni: “Christ-aunritua.”

²¹Tua-i-llu aptaat, “Causit-mi? Elijah-uguten-qaa?” Qanertuq-llu, “Taungunritua.” “Prophet-aaruuten-qaa imna tauna?” Kiuguq-llu, “Qang'a.”

²²Tua-i-llu qanrutaat, “Kituusit-mi? Imkut ayagtesteput kiunaluki. Qaillun qaneryarangqercit elpenek?”

²³Ellii qanertuq, “Wiinga qayagalriamun erinaugua, yuilqumi qayagaluni: ‘Atanrem tumyararkaa manigcarciu,’” prophet-aam Isaiah-m qalaruciatun.

²⁴Wani-wa ellait ayagcecimallruluteng Pharisee-aanek.

²⁵Tua-i-llu aptaat, “Ciin-mi angllurcecilarcit Christ-aunrilkuvet, Elijah-uvkenak-llu, prophet-aaruvkenak-llu imna tauna?”

²⁶John-aam kiugai, “Wiinga-wa angllurcecilartua merkun, tau͡gaam cimirkaqa, nallungerpecen̄i, akunlevcen̄i nangengqauq,

²⁷taum aluilitagken cingigkenek angicillerkaqa ancurtukaqa.”

²⁸Makut piut John-aam angllurcecillran nalliini Jordan-aam akiani.

²⁹Unuaquan Jesus-aaq tangrraa tungminun tailria, qanerluni-llu, “Tangerrluku, Agayutem Qusngiyagaa, uum nunamiut assiilnguit au͡g'ararkaugai!

³⁰Wani-wa imna qanrutkelqa qanerlua, ‘Kingunemkun yuk taigarkauguq ciuliqagten͞guluni wangni, tua-i ciuqliqngamku.’

³¹Wang'ung'e'rma nallullruyaaqaqa, tau͡gaam Israel-aani alaitesqelluku, tamana pitekluku tekitellruunga merkun angllurcecilua.”

³²John-aaq-llu nallunairiuq qanerluni, “Wiinga tangellruaqa Anerneq yaqulegtun qilagmek atrarluni, elliinelluni-llu.

³³Wang'ung'e'rma nallullruyaaqaqa, tau͡gaam ayagtestem̄a angllurcisqellua merkun, pianga, ‘Kitumun Anerneq atrarluni tangerquvgu misvikluku-llu, tua-i taunguuq angllurcisten͞guluni Anernerkun Tanqilriakun.’

³⁴Tua-i tangellruunga nallunairilua-llu, una Agayutmun Qetunraqniluku.”

³⁵Unuaquan cali John-aaq elitnauragminek ilaluni nangengqauq.

³⁶Jesus-aaq-llu tamaani tarritellrani tangvagaa, qanerluni-llu, “Tangerrluku, Agayutem Qusngiyagaa!”

³⁷Elitnaurak-llu taukuk qanellra niitaak, Jesus-aaq-llu maliggluku.

³⁸Jesus-aam-llu kingyarluni tangrrak maligutellriik, aptak-llu, “Camek yuarcetek?” Tua-i-llu kiugaak, “Nani uitalarcit Rabbai?” (Una aperyaraq kangingqertuq “Ayuqucirturta.”)

³⁹Qanrutak-llu, “Tailutek tangerrnaurtutek.” Tua-i maligtaak, uitavia-llu tangerrluku; taumi ernermi nayuraak. Maa-i man'a piuq sass'aq cetamanek kaullrani.

⁴⁰Taukuk aipaak John-aamek niitellriik maligutellriik-llu Andrew-ruuq, Simon-aam Peter-aam amaqlia.

⁴¹Taum ciumek kinguqlini Simon nall'artaa, qanrulluku, “Wangkuk imna Messiah nataqerpuk.” (Una aperyaraq kangingqertuq “Christ-aq.”)

⁴²Elliin-llu Jesus-aamun ullautaa. Jesus-aam tangvagaa, qanerluni-llu, “Elpet Simon-aaruuten Jona-m qetunraa. Elpet atengqerrarkauguten Cephas-aamek, mumigcimallrakun Peter-aamek.”

⁴³Unuaquan Jesus-aaq umyuarteq'nguq Galilee-amun ayagnaluni. Tua-i-llu Philip-aaq nall'artaa. Jesus-aam-llu qanrutaa, “Maligesnga.”

⁴⁴Wani-wa Philip-aaq Bethsaida-rmiunguuq, Andrew, Peter-llu nunalguteklukek.

⁴⁵Philip-aam-llu Nathaneal nall'artaa qanrulluku-llu, “Wangkuta imna Moses-aam picirkiutaini, prophet-aat-llu igaitni qanrutkumalria nataqerput, Jesus-aaq Joseph-aam qetunraa, Nazareth-aarmiunguluni.”

⁴⁶Tua-i-llu Nathaneal-aam qanrutaa, “Ellualria-qaa Nazareth-aamek kingunengqerrsugngauq?” Philip-aam kiugaa, “Tailuten paqesgu.”

⁴⁷Jesus-aam tangrraa Nathaneal ellminun ullautellrani, qanrutekluku-llu qanerluni, “Tangerrluku, Israel-aapiaq, yuk piciulria!”

⁴⁸Nathaneal-aam qanrutaa, “Qaillun nallunricia?” Jesus-aam kiugaa, “Philip-aam kelegpailgaten tangrramken napam atsangqetulim aciani uitallerpeni.”

⁴⁹Tua-i-llu Nathaneal-aam kiugaa, “Rabbi, elpet Agayutem Qetunraqliniaten! Angayuqauluten-llu Israel-aani!”

⁵⁰Jesus-aam kiugaa, “Qanrucamken tuani napam atsangqetulim aciani uitallerpeni tangellruniluten, ukvertuten-qaa? Atam, irr'inarqenrulrianek tangerciquten.”

⁵¹Qanrutaa-llu, “Ilumun, Ilumun, qanrutamken, qiliit ikingqaluki tangerciqaci, Agayutem-llu an'gilai mayurluteng atrarluteng-llu Yuum Qetunraanun.”