Read Yupik John 11 Bible Online

John 11 - Yupik bible

John 11

¹Tua-i-llu yuk naulluullruuq atengqerrluni Lazarus-aamek, Bethany-rmiu, Mary-m anelgutiin-llu Martha-m nuniigni.

²Wani-wa tauna Mary Atanrem it'gainek mingugmek akitulriamek mingugilleq nuyaminek-llu perrirluki, taum angutngunra Lazarus-aaq naulluuguq.

³Taumek taukuk alqaqelriik elliinun ayagceciuk qanrucesqelluku, “Ataneq, tangerrluku kenkek'ngan naulluuguq.”

⁴Tau͡gaam Jesus-aaq niicami qanertuq, “Naulluun una tuquunrituq, tau͡gaam Agayun ucurnarisqelluku, Agayutem-llu Qetunraa mat'ukun ucurnarisqelluku.”

⁵Jesus-aam-llu Martha, anelgutii-llu, Lazarus-aaq-llu kenkai.

⁶Tua-i-llu naulluucianek niiteng'e'rmi uitallermini uitauq cali erenregni malrugni.

⁷Kinguani-llu qanertuq elitnauraminun, “Cali Judea-mun ataam ayiilta.”

⁸Elitnaurain qanrutaat, “Ayuqucirturtaa, watua-ggem Jews-aat miluqungnaqsaaqaatgen, tuavet-qaa ayanqigteqatartuten?”

⁹Jesus-aam kiugai, “Erneq-qaa sass'angqenrituq qula malrugnek cipluki? Yuk erenrani piyuakuni paallagngaituq, tua-i nunam mat'um tanqia tangviimiu.

¹⁰Tau͡gaam yuk unugmi piyuakuni paallagciquq, elliini tanqigtailan.”

¹¹Makunek qanrraarluni qanrutai, “Yugnikekvut Lazarus-aaq qavartuq, wiinga-llu tupagcarturciqaqa.”

¹²Taumek elitnaurain qanrutaat, “Ataneq, qavaquni assiriciquq.”

¹³Tua-i Jesus-aaq tuqullranek qaneryaaquq, ellait tau͡gaam umyuartequt qavarluku qanruteksukluku.

¹⁴Nutaan Jesus-aam elluarrluki nalqigutai, “Lazarus-aaq tuquuq.

¹⁵Elpeci-llu pitekluci quyaunga tuantellrunrilama, ukvengesqelluci; tua-i ilangcivkenaku ullaglaut.”

¹⁶Tua-i-llu Thomas-aaq, malrimek at'lek, elitnauraullgutminun qanertuq, “Maliggnaurput, tuqullgutekniarput.”

¹⁷Tua-i-llu Jesus-aaq tekicami, niituq ak'a ernerni cetamani qungumelucianek.

¹⁸Bethany-m-llu Jerusalem-aaq yaaqsinritaa, tayima mile-ak malruk.

¹⁹Jews-aat-llu amlleret Martha, Mary-llu ullallruagket qarutaarnalukek angutngunrak pitekluku.

²⁰Martha-llu Jesus-aam agiirucianek niiyucimitun pairrsaagaa, Mary tau͡gken enemi uitaluni.

²¹Tua-i-llu Martha-m Jesus-aaq qanrutaa, “Ataneq, maantellrukuvet, angutngunqa tuquyanrituq.

²²Waten-llu pingraan nallunritua Agayutmun camek piicakuvet niiciiqaaten.”

²³Jesus-aam qanrutaa, “Angutngunren makciiquq ataam.”

²⁴Martha-m kiugaa, “Maktellerkaa ataam nallunritaqa makcarami ernermi nangneqlirmi.”

²⁵Jesus-aam qanrutaa, “Wiinga makyutnguunga unguvaulua-llu, wangnun ukvelria, tuqunge'rmi, unguvaciquq.

²⁶Unguvalria-llu wangnun ukverluni tuqungaitqapigtuq. Ukveqan-qaa man'a?”

²⁷Kiugaa, “Aa-ang, Ataneq, ukvertua Christ-aucirpenek tauna Agayutem Qetunraa, nunamun tekitarkaulleq.”

²⁸Mat'umek qanrumariami, ayagtuq Mary kelegluku yuut nalluyurcivkarluki, qanrulluku-llu, “Ayuqucirturta maantuq, tangerrsugaaten-llu.”

²⁹Tauna-llu mat'umek niicami egmian nangertuq ullagluku-llu.

³⁰Wani-wa Jesus-aaq nunanun tekiteksaitellruuq, tau͡gaam cali tuanlluni Martha-m pairtellrani.

³¹Jews-aat-llu, tuani enemetellriit qarutaartain, Mary tangrramegteggu patagmek nangerrluni anelria, maligtaat, qungumun ayagluku qianayukluku tuani.

³²Tua-i-llu Mary, Jesus-aamun tekicami tangrramiu-llu, ciuqerranun ciisqumigtuq qanrulluku, “Ataneq, maantellrukuvet, angutngunqa tuquyanrituq.”

³³Jesus-aam-llu qiallrani tangrramiu, Jews-aat-llu maligcestai qialuteng, umyuamikun uqamaituq, arenqianani-llu,

³⁴qanerluni-llu, “Natmun elliceciu?” Qanrutaat, “Ataneq, tailuten tangerrnauran.”

³⁵Jesus-aaq-llu aluviliurtuq.

³⁶Taumek Jews-aat qanertut, “Tangerrluku kenkillrutacia taumun.”

³⁷Ilait qanertut, “Uum-qaa tangerrsaurcecillrem una-llu canrircesciigatellrua tuquvailgan?”

³⁸Jesus-aaq, ataam umyuamikun uqamaunani, qungumun tekituq. Qunguq tauna qerranquuguq, teggalqumek-llu patumaluni.

³⁹Jesus-aaq qanertuq, “Teggalquq au͡g'arciu.” Martha-m, pillrem nayagiin qanrutaa, “Ataneq, maa-i mat'umi temii tep'nguq erenret cetamaurcata.”

⁴⁰Jesus-aam qanrutaa, “Qanrutellrunritamken-qaa ukvequvet Agayutem ucurnarqucianek tangrrarkauniluten?”

⁴¹Tua-i-llu teggalquq au͡g'araat. Jesus-aaq-llu ciuggluni qanertuq, “Aata, quyavikamken niicavnga.

⁴²Wiinga-wa niiterrlainaucirpenek nallunritamken, tau͡gaam ukut yugugaat maantellriit pitekluki qanertua tuaten, mat'ukun ukvengesqelluki ayagcecillrucirpenek wangnek.”

⁴³Waten qanrumariami, qayagpagtuq, “Lazarus-aaq, ani.”

⁴⁴Tuqulleq-llu an'uq, imgutartuumarmi, kegginaa patutuumarmi. Jesus-aam qanrutai, “Angiciu, ayagtelluku-llu.”

⁴⁵Taumek amlleret Jews-aat Mary-m ullagtain, pillranek tangvalriit ukvervikaat.

⁴⁶Tau͡gaam ilait Pharisee-aanun ayagtut Jesus-aam pillrinek qanrucarturluki.

⁴⁷Taumek agayulirten͞gunret Pharisee-aat-llu qaillukuartet quyurtait, qanerluteng, “Qaillun piciqseta? Tua-i tangerrluku una yuk irr'inarqelrialilalria amllernek.

⁴⁸Uitaskumten̄i, yuut tamarmeng ukvervikciqaat, Roman-aat-llu taiciqut nunavut wangkuta-llu yuullgutkelriani piunrirluta.”

⁴⁹Tau͡gaam iliita, Caiaphas-aam, tuani allrakumi agayulirten͞gunrem, qanrutai, “Nallumavagceci;

⁵⁰atawaunrituq-qaa yuk atauciq tuquskan yuut pitekluki, wangkuta-llu yuullgutkelriani piunrirpek'nata?”

⁵¹Tuaten ellminek qanenrituq, tau͡gaam agayulirten͞gunruami taum nalliini, Jesus-aam tuqullerkaa, tamakut yuullgutkelriit pitekluki, qanrutkaa;

⁵²wani-wa tamakut-llu yuullgutkelriit kiingita pitkevkenaki, tau͡gaam Agayutem yui tamiini sekavcimalriit quyurtarkaungaki.

⁵³Tuaken ayagluteng qaillukuartut tuquiturluku.

⁵⁴Taumek Jesus-aaq tangercetenrirtuq Jews-aanun, nunarpagnek-llu ayagluni yuilqumun nunarrarmun Ephraim-aamek at'legmun, tuantaurluni-llu elitnaurani ilakluki.

⁵⁵Jews-aat-llu Paaskaarat ukaqsigian, Jews-aat amlleret nunanek tamanek Jerusalem-aamun mayurtut, Paaskaam ciungani caarrluirnaluteng.

⁵⁶Tua-i-llu Jesus-aaq yuaraat, Agayuvigpagmi nangengqaluteng qanruyutut, “Qaillun umyuarteqseci, agayunerpaliyarngaituq-qaa?”

⁵⁷Tau͡gaam agayulirten͞gunret Pharisee-aat-llu alerquillruut nanlucianek nallunrilngurtangqerqan, qanrutkesqelluku, teguyugluku.