Read Yupik John 12 Bible Online

John 12 - Yupik bible

John 12

¹Tua-i-llu erenret arvinelgen Paaskaam civuani, Jesus-aaq Bethany-mun tekituq, wani-wa Lazarus-aam imum, Jesus-aam tuqumalrianek makcetellran, nuniinun.

²Tua-i tuani atakutarkiuraat, Martha-llu neqkiurluni, tuani-llu Lazarus-aaq nerellgutkaat.

³Tuani Mary tegutuq usperem nalliinek mingugmek tepkegcautmek akitulriamek, Jesus-aam-llu it'gai mingugluki, nuyaminek-llu perrirluki, ena-llu tepengluni tepkegcautem tepiinek.

⁴Tau͡gaam Judas-aaq Iscariot-aaq, elitnaurain iliit tunestekaa, qanertuq,

⁵“Ciin minguk man'a tunumanrita akinun yuinarnun cetamanun, kusgurnarqelriit cikiutekaitnun?”

⁶Waten qanertuq, kusgurnarqelriit umyuaqevkenaki, tau͡gaam teglegyulriaruami, akiviutameggnek-llu avalingqerrami teguqaqulaamiu tuavet ekumalria.

⁷Taumek Jesus-aaq qanertuq, “Uitaciu, aturnauraa tungmagcimallerkamnun.

⁸Tua-i kusgurnarqelrianek ilangqerrlainartuci, tau͡gaam wii ilakerrlainarngaitarpecia.”

⁹Tua-i-llu yuut amlleret Jews-aat tuanlucia niicamegteggu, tekitut, Jesus-aaq kiingan pitkevkenaku, Lazarus-aaq-llu tuaten, tuqumalrianek makcetellra, tangerrnaluku.

¹⁰Tau͡gaam agayulirten͞gunret qaillukuartut Lazarus-aaq-llu tuqucugluku,

¹¹tua-i tauna pitekluku Jews-aat amlleret ayiita, Jesus-aaq-llu ukvervikluku.

¹²Unuaquan-llu yugugaat agayunerpaliyalriit Jerusalem-aamun, Jesus-aam tekitarkaucia niicamegteggu,

¹³napat palm-at avayaitnek tegulluteng pairrsaagaat, qayagaluteng-llu, “Hosanna! Atawaqerli Atanrem atrakun tekitellria, wani-wa Israel-aat Angayuqrat.”

¹⁴Jesus-aam-llu ciulviim piyagaa unakngamiu aqumvikaa, igausngaciatun waten:

¹⁵“Zion-aam pania, alingevkenak, tangerrluku, angayuqan taiguq ciulviim piyagaani aqumgaluni!”

¹⁶Tamatum nalliini elitnaurain tamana taringellrunritaat, tau͡gaam Jesus-aaq ucurnarian neq'angut, tuaten igausngiin pitekluku, tuaten-llu piatgu.

¹⁷Tua-i yugugaat elliini uitallret Lazarus-aaq qunguanek qayagaullrani, tuqumalrianek-llu maktellrani, nallunairutkaat.

¹⁸Tamana pitekluku cali yugugaat pairrsaagaat niicamegteggu tamatumek irr'inarqelrialillra.

¹⁹Taumek Pharisee-aat qanruyutut, “Qaillun pisciigatuci, tangerrluku, tamarmeng yuut maligeskiit.”

²⁰Taukut-llu agayunerpagmi piicagyartulriit Greek-aanek ilangqertut.

²¹Tamakut Philip-aaq ullagaat, tauna Bethsaida-mi Galilee-amelngurmi nunalek, kaigavikluku-llu waten, “Usuuq, Jesus-aaq tangerrsugyaaqerput.”

²²Tua-i Philip-aam Andrew qanrucarturaa, Andrew-m-llu Philip-aaq malikluku Jesus-aaq qanrucarturaak.

²³Jesus-aam kiugak, “Yuum Qetunraan ucurnarillerkaa tekituq.

²⁴Ilumun, ilumun, qanrutamci, naucetaarkaq mukaarkaq nunam iluanun tull'uni nalanrilkuni atauciurrlainarciquq, tau͡gaam nalakuni ur'arkaurciiquq.

²⁵Unguvaminek arcaqakilriim tamarciqaa, tau͡gaam maani nunam qaingani unguvaminek arcaqakinrilnguum piksaguciiqaa unguva nangyuilnguq.

²⁶Yuk wangnun pisten͞gukuni, maligglia, pisteka-llu nayuqemneciiquq. Yuk wangnun pisten͞gukan, Aatam qigcignarivkarciqaa.

²⁷“Watua tarneqa civuurauq, qaillun-llu waniwa qanerciqsia, ‘Aata, anirturnga sass'amek mat'umek.’ Tau͡gaam tamana pitekluku sass'aq man'a tekitaqa.

²⁸Aata, atren ucurnarivkarru.” Tua-i erina qilagmek niicetuq qanerluni, “Ucurnarivkaumariaqa, ucurnarivkanqigtarkauluku-llu.”

²⁹Tua-i yuut tuani nangengqalriit mat'umek niitellriit qanertut kallirniluku, allat-llu qanertut, “An'gilam qalarutaa.”

³⁰Jesus-aam kiugai, “Man'a erina wii piteklua pinrituq, tau͡gaam elpeci pitekluci piuq.

³¹Watua nunamiut qanercetaarumaqatartut, mat'um-llu nunam atanra ancimaarkauguq.

³²Wiinga-llu, nunamek agarcimarikuma, yuut tamalkuita cayugciqanka.”

³³Waten qanertuq nallunairnaluku qaillun ayuqelriakun tuquarkaucini.

³⁴Tua-i yugugaat kiugaat, “Alerquutni igausngalria niitellruarput Christ-am nangyuilngurmek piurrlainararkaucia, qaillun-mi qanercit Yuum Qetunraa agarcimaarkauniluku? Kituuga-mi tauna Yuum Qetunraa?”

³⁵Jesus-aam kiugai, “Tanqiim cali ellma nayurciqaaci. Piyuaci tanqigmetlerpecen̄i, tan'geritenritnauraaci, wani-wa tan'germi piyualriim ullagarkani nallua.

³⁶Tanqik elpecen̄etellrani, tanqik ukvervikiciu, tanqiim irniaqnauraaci.” Makunek Jesus-aaq qallacimariami, ayagtuq iirluki taukut.

³⁷Tau͡gaam takuatni tuaten amllertalrianek nallunailkucingraan, ukveqenritaat,

³⁸piciurrluku Prophet-aam Isaiah-m qaneryaraa, “Ataneq, kia ukveqau qalarutkellerput? Kitumun-llu Atanrem tallia alairumaa?”

³⁹Man'a pitekluku ukverciigatut. Isaiah cali qanellruan:

⁴⁰“Iingit takvialivkarai, ircaqruit-llu asvaitevkarai, iimegteggun tangrresqevkenaki, ircaqumegteggun-llu elpengesqevkenaki, causqevkenaki-llu wangnun anirtullerkameggnun.”

⁴¹Makunek Isaiah qanertuq ucurnarqucia tangrramiu qanrutekngamiu-llu ellii.

⁴²Amta-llu atanret amlleret ukverviksaaqaat, tau͡gaam Pharisee-aat pitekluki apertunritaat, agayuvigmek au͡g'arnayukluteng.

⁴³Tua-i yugnun nanrallerkarteng cucukenruamegteggu Agayutmun nanrallerkameggni.

⁴⁴Jesus-aaq qastuluni qanertuq, “Wangnun ukvelria, wangnun pivkenani tau͡gaam ayagcestemnun ukvertuq.

⁴⁵Wangnek-llu tangellriim ayagcesteka tangrraa.

⁴⁶Tanqiulua nunamun tekitua, wangnun ukvelria tan'germetesqevkenaku.

⁴⁷Qaneryaramnek-llu niitellria ukveqevkenaki-llu, tauna wiinga qanercetaarngaitaqa, tekitenrilama nunamiut qanercetaararkauluki, tau͡gaam anirturarkauluki.

⁴⁸Wangnek caunrilkilria, qaneryaranka-llu ciuniuryugpek'naki, tauna qanercetaarcetengqertuq, qaneryaram qaneryaraqellma qanercetaarciqaa ernermi nangneqlirmi.

⁴⁹Wani-wa wangnek qallatenrilama, tau͡gaam Aatam ayagcestem̄a alerquraanga qaillun qanrarkaucimnek, qaillun-llu qallatarkaucimnek.

⁵⁰Alerquutain-llu unguvamek nangyuilngurmek iqungqerruciat nallunritaqa, taumek qallataqama, tuaten qallatelartua Aatam qanresquciatun.”