Read Yupik John 16 Bible Online

John 16 - Yupik bible

John 16

¹“Makunek qanrutamci cangayuusqevkenaci.

²Agayuvignek au͡g'arciqaiceci, tua-i waniwa tuaten ellirciquq elpecen̄ek tuqucilriit umyuarteqciqut Agayun kevgiuryukluku.

³Tuaten-llu piciqaiceci nalluamegtekuk Ataka-llu.

⁴Tau͡gaam makunek qanrutellruamci, tuaten elliqan, neq'angesqelluci tuaten qanellruciqa elpecen̄un. Ayagmek-llu mat'umek qanrutellrunritamci, nayullruamci.

⁵Tau͡gaam watua ayakatartua ayagcestemnun, ilavci-llu aptenritaanga, ‘Natmun ayakatarcit?’

⁶Tau͡gaam makunek qanrucamci ilutequci.

⁷“Wani-wa piciulriamek qanrutamci, elpecen̄un atawauciqngan ayakuma, ayanrilkuma Ililirturtem ullagngaitaaci, tau͡gaam ayakuma, elpecen̄un ayagceciiqaqa.

⁸Tekiskuni-llu elliin ukvenrilnguut elpengevkarciqai assiilngurmek, elluamek-llu qanercetaarinermek-llu;

⁹assiilngurmek, wani-wa ukvervikenrilatnga;

¹⁰elluamek, wani-wa Aatamun ayagarkaungama, tangenrrirarkaungavcia-llu;

¹¹qanercetaarinermek, wani-wa ellam mat'um atanra qanercetaarumiin.

¹²“Amllernek cali qaneryararkangqerrsaaqua elpecen̄un, tau͡gaam elpeci watua arturaci.

¹³Tau͡gken imna Anerneq piciulria tekiskuni, elliin pekyuciiqaaci piciunermun tamiinun, ellminek qallasngailami, tau͡gaam niitellerminek qallaciiquq, piarkat-llu qanrutekciqai.

¹⁴Elliin ucurnarivkarciqaanga, wangnek piarkaungamiki elpecen̄un qanrutkarkani.

¹⁵Aatama pii tamalkuita pikanka, taumek qanertua pimnek piarkauniluku elpecen̄un qanrutkarkani.

¹⁶“Atataarqu, tangenrrirarkaugarpecia, atataarqu-llu, tangenqigciiqerpecia, Aatamun ayagarkaungama.”

¹⁷Tua-i elitnaurain ilait qanruyutut, “Cauga man'a wangkutnun qanellra, ‘Atataarqu, tangenrrirarkaugarpecia, atataarqu-llu tangenqigciiqerpecia’; cali-llu, ‘Aatamun ayagarkaungama’?”

¹⁸Taumek qanertut, “Cauga man'a qanellra, ‘Atataarqu?’ Cauciitarput qanellra.”

¹⁹Jesus-aam elpekngamiki kangiituuciat qanllerminek, qanrutai, “Kangiituutekarci-qaa qanelqa waten, ‘Atataarqu tangenrrirarkaugarpecia, atataarqu-llu, tangenqigciiqerpecia?’

²⁰Ilumun, ilumun, qanrutamci, elpeci qiaciquci yuuniarluci-llu, tau͡gaam ukvenrilnguut angnirciqut; elpeci angniiciiquci, tau͡gaam angniilucirci cimirarkauguq angnimek.

²¹Arnaq teggiurciaqami angniitelartuq, irnillerkani tekican, tau͡gaam irnimariaqami nangteqnarqelria neq'akenrilaraa, angnilaami yugtangucianek.

²²Elpeci-llu watua angniicaaquci, tau͡gaam tangenqigciiqamci, ircaquci-llu angnirciqut, angniucirci-llu au͡gaumangaituq elpecen̄ek.

²³Taumi ernermi camek apqaurngaitarpecia. Ilumun, ilumun, qanrutamci: camek Aata atemkun kaigavikekuvcen̄i, cikirciqaaci.

²⁴Man'a engelkarrluku atemkun kaigaksaituci; kaigaci, tua-i pingciquci, angnirci qaqicesqelluku.

²⁵“Makunek qallautamci ayuqestassiigutetgun; tau͡gaam erenret tekiciiqut, tuani qallauciiqamci ayuqestassiigutngunrilngurteggun ayuqucingnaqlua qallautarkaungamci Aatamek.

²⁶Taum nalliini atemkun kaigaciquci, wiinga-llu qanrutenritamci, kaigaciiqniluci;

²⁷tua-i Aatam tungaunani kenekngaci, kenekngavcia ukveqluku-llu Aatamek kingunengqerruciqa.

²⁸Aatamek kingunirlua tekitellruunga nunamun, ataam, nuna unilluku Aatamun ayagciqua.”

²⁹Elitnaurain-llu qanrutaat, “Wani-wa nutaan ayuqucingnaqluten qallatuten ayuqestassiigutngunrilngurteggun.

³⁰Watua nallunritukut canek tamalkuitnek nallunrilucirpenek apesviinak-llu kitumi imumi, taumek ukveqerput Agayutmek kingunengqerrucin.”

³¹Jesus-aam pii, “Nutaan-qaa ukvertuci?

³²Atam erenret tekiciiqut, maa-i-llu tekisngaluteng, tua-i sekavciiquci kina imna nakmiin piminun, wiinga-llu kiimellirlua, tau͡gaam kiimetenritua, Aatam nayuanga.

³³Makunek qanrutamci, wangkun uitanqegcingesqelluci. Ellarpagmi nangteq'lartuci, tau͡gaam caceturici, ellarpak cirlakngamku.”