Read Yupik John 17 Bible Online

John 17 - Yupik bible

John 17

¹Makunek qanrumariami Jesus-aaq, ciugtuq qanerluni, “Aata, watua pinariuq, Qetunraan ucurnarivkarru, Qetunram-llu ucurnarivkarnauraaten.

²Piyunarqutmek cikillruavgu yugnun tamaitnun, tuaten-llu elliin unguvamek nangyuilngurmek cikirnaurai ellminun cikiutekelten.

³Waniwauguq-llu unguva nangyuilnguq, elpet nallunrirluten kiivet ilumun Agayutngucirpenek, ayagcetellren-llu Jesus-aaq Christ-aq nallunrirluku.

⁴Nunami ucurnarivkallruamken, wangnun caliaqesqellren qaqicamku.

⁵Watua-llu, Aata, ucurnarivkarnga elpeni ucurnarqucimnek ellarpagtangvailgan elpeni piklemnek.

⁶“Aterpenek nallunrircetellruanka yuut wangnun cikiutekelten ellamiunek. Elpet pikellruyaaqaten wangnun-llu cikiutekluki. Ellaita-llu qaneryaran ciumuutaat.

⁷Watua nallunriraat ca tamalkuan wangnun cikiuteklerpet elpenek kingunengqerrucia,

⁸wani-wa qaneryarat wangnun cikiutekelten ellaitnun cikiutekanka, ellaita-llu piksagutait, ilumun-llu nalluvkenaku elpenek kingunengqerruciqa elpenun-llu ayagcessuciqa.

⁹Ellait piicautanka, ellamiut piicautenritanka, tau͡gaam taukut wangnun cikiutekelten piicautanka elpet pikngavki.

¹⁰Pinka tamalkuita pikaten, piten-llu wiinga pikanka, taukuni-llu ucurnariunga.

¹¹Wiinga-llu nunam qaingantenrirtua, ukut nunam qaingantut cali. Wiinga-llu ullagamken. Aata Tanqilria, aterpegun pektayiirceski, wangnun cikiutekelten wangkugcetun atauciunaurtut.

¹²Ellaitni uitallemni, aterpegun pektayiircetanka, wangnun cikiutekelten, tarikanka-llu, tamalriarunateng-llu, tauna tamanermek apqucilek kiimi tamartuq, kalikat piciurrluki.

¹³Tau͡gaam watua ullagamken, tuaten-llu qallatua cali nunam qainganllua, angniuteka ellaitni piciurtesqelluku.

¹⁴Qaneryararpenek cikillruanka; ellarpiim-llu yuin uumikait, ellarpiim yuinek pinrilata, wiinga tuaten ellarpiim yuinek pinrilucimtun.

¹⁵Piicautenritanka nunam qainganek au͡gaasqelluki, tau͡gaam assiilngurmun pisqevkenaki,

¹⁶ellarpiim yuinek pinrilata, wiinga tuaten ellarpiim yuinek pinrilucimtun.

¹⁷Piciulriakun kenciknarivkarki; elpet qaneryaran piciulriaruuq.

¹⁸Wangnek ayagcecillrucirpetun nunam qainganelngurnun, tuaten cali ukut nunam qainganelngurnun ayagcetanka.

¹⁹Ellait-llu pitekluki kenciknarivkartua, ellait-llu cali kenciknarisqelluki piciulriakun.

²⁰“Ukut-llu kiingita piicautenritanka, tau͡gaam qaneryaraitgun wangnun ukverarkat tapeqluki piicautanka.

²¹Tamalkuita atauciusqelluki, elpet Aata, wangnelucirpetun, wiinga-llu elpenlucimtun, ellait cali atauciusqelluki wangkugni, nunam qainganelngurnun ukveqesqelluku elpenun ayagtessuciqa.

²²Ucurnarqun-llu wangnun taitellren ellaitnun cikiutekellruaqa, atauciusqelluki wangkugcetun atauciucimegtun.

²³Wiinga ellaitnellua elpet-llu wangnelluten, ellait-llu ataucimun taqmigtesqelluki, nunam qainganelnguut nallunricesqelluki elpenun ayagtessucimnek, ellaitnek-llu kenkicirpenek wangnek kenkillrucirpetun.

²⁴Aata, wangnun cikiutekelten, wangnetesqanka uitallemni, ucurnarqun wangnun taitellren ellaitnun tangrresqelluku, kenkellruavnga ellarpak tusnganengvailgan.

²⁵Aataa Ellualria, ellam yuin nallullruatgen, tau͡gaam wiinga nallunritellruamken, ukut-llu elpenun ayagtessuciqa nallunritellruat.

²⁶Aterpenek nallunrircetanka, nallunrircetenqigtarkauluku-llu, wangnek kenkicin ellaitnetesqelluku, wiinga-llu ellaitnellua.”