Read Yupik John 18 Bible Online

John 18 - Yupik bible

John 18

¹Makunek Jesus-aaq qallacimariami, elitnaurani-llu ayagtut kuicuar Kidron qerarluku, tuani naucetaarvigtangqertuq, tuavet-llu itertut.

²Judas-aam-llu tunestekaan, tauna nallunritaa, Jesus-aaq elitnaurani-llu pulengtaq tuavet ayalaata.

³Judas-aaq agayulirten͞gunernek Pharisee-aanek-llu unangami, anguyagten̄ek atanerruanek-llu, ilakluki tuavet tekituq, ellassuutnek kenurqutanek-llu kenurralgirluteng saskulgirluteng-llu.

⁴Tau͡gaam Jesus-aam, ellminun tut'arkat tamalkuita nallunrilamiki, ullakanirai apluki-llu, “Kina yuarceciu?”

⁵Kiugaat, “Jesus-aaq Nazareth-aarmiu.” Jesus-aam kiugai, “Taunguunga.” Judas-aaq-llu, tunestii nangengqauq ellaitni.

⁶Tua-i qanrucateng, “Taunguunga,” kingupiarallagtut nunamun-llu qetkallagluteng.

⁷Tua-i aptenqigtai, “Kina yuarceciu?” Kiugaat, “Jesus-aaq Nazareth-aarmiu.”

⁸Jesus-aam kiugai, “Qanrutellruamci taungunilua; tua-i wiinga yuaquvcia, ukut ayagteskiciki.”

⁹Wani-wa qanrucillra piciurtarkaungan waten, “Wangnun cikiuteklerpet iliitnek tamarinritua.”

¹⁰Tua-i-llu Simon Peter-aam, nuussirpangqerrami, amuluku agayulirten͞gunrem pistii tallirpilirnerakun ciutairtaa. Pista tauna Malchus-aamek atengqertuq.

¹¹Jesus-aam-llu Peter qanrutaa, “Nuussirpiin caquanun qungasgu. Saskam, Atama wangnun cikiutiin, imaa merngaitaqa-qaa?”

¹²Tua-i-llu anguyagtet atanrita Jews-aat-llu atanrita Jesus-aaq teguluku qillerqaat.

¹³Ciumek Annas-aamun ayautaat, wani-wa Caiaphas-aam taumi allrakumi agayulirten͞gunrulriim cakianun.

¹⁴Caiaphas-aaq taunguuq Jews-aanek ayuqucirturilleq atawauniluku yuk atauciq tuqukuni yuut pitekluki.

¹⁵Simon-aam-llu Peter-aam Jesus-aaq maligtaa, allam-llu elitnauram. Elitnauraq-llu tauna agayulirten͞gunrem nallunrilani, itertuq Jesus-aaq maliggluku agayulirten͞gunrem 'laavkaaran elaqlianun.

¹⁶Tau͡gaam Peter ikirtuqam elatiini nangengqauq. Tua-i elitnauraq tauna, agayulirten͞gunrem nallunrilkii, an'uq, arnaq-llu ikirtuqam tarikestii apelcirluku, Peter itercetaa.

¹⁷Tua-i-llu arnam ikirtuqam tarikestiin Peter aptaa, “Elpet-llu-qaa uum elitnaurain ilakaatgen?” Kiuguq, “Qang'a.”

¹⁸Pistet-llu atanerruarit-llu nangengqaut tuani keneq kumarrluku matneqluteng-llu, nengllian, Peter-llu ilakluku.

¹⁹Agayulirten͞gunrem-llu Jesus-aaq apqauraa elitnaurainek ayuqucirtuutainek-llu.

²⁰Jesus-aam kiugaa, “Yuut takuatni qallatelallruunga, agayuvigni-llu, Agayuvigpagmi-llu Jews-aat tamarmeng quyurtaarviatni elicungcarilallruunga, nalluatni-llu camek qallatellrunritua.

²¹Ciin wiinga apqaurcecia? Apqaurki taukut niitellret, camek ellaitnun qallatellemnek. Atam taukut nallunritait qanellrenka.”

²²Waten-llu qanran atanerruat iliita tuani nangengqalriim Jesus-aaq qacartaa, qanerluni, “Waten-qaa agayulirten͞guneq kiugan?”

²³Jesus-aam kiugaa, “Qancurlallrukuma, picurlaucia nallunairru; tau͡gaam piciulriamek qanellrukuma, ciin qacarcia?”

²⁴Tua-i Annas-aam qillerqumatuumaan ayaucetaa Caiaphas-aamun agayulirten͞gunermun.

²⁵Simon Peter-llu nangengqauq matneqluni. Tuani-llu aptaat, “Elpet-llu-qaa elitnaurain ilakaatgen?” Meci'irtuq qanerluni, “Qang'a.”

²⁶Agayulirten͞gunrem-llu pistain iliita, Peter-aam ciutairtellran tungelqurran aptaa, “Tangellrunritamken-qaa naucetaarvigmi tauna ilakluku?”

²⁷Tua-i Peter meciranqigtuq, egmianun-llu yaqulgem angucalurtaa qalriaguq.

²⁸Tuaken-llu Caiaphas-aamek Jesus-aaq ayautaat nunam atanran eniinun, wani-wa unuayaarmi. Ellait-llu tungaunateng nunam atanran 'laavkaaranun itenritut, menulirnavkenateng, tau͡gaam Paaskaarcuutekaq nernaluku.

²⁹Tua-i Pilate-aam anvikai qanrulluki-llu, “Camek picetaaruceciu una yuk?”

³⁰Kiugaat, “Picurlanrilkan elpenun tunenricararput.”

³¹Pilate-aam tua-i kiugai, “Kitaki teguciu qanercetaarluku-llu alerquuteci maliggluki.” Jews-aat kiugaat, “Yugmek tuqucisqenritaitkut.”

³²Wani-wa Jesus-aam qanrucillra piciurtarkaungan nallunairluni qanellruami qaillun ayuqelriakun tuquarkauciminek.

³³Tua-i Pilate-aaq nunam atanran 'laavkaaranun itenqigtuq, Jesus-aaq-llu taisqaa apluku-llu, “Taunguuten-qaa Jews-aat Angayuqrat?”

³⁴Jesus-aam kiugaa, “Elpenek-qaa waten qanertuten, wall'u-qaa allat tuaten qanrutkaatnga elpenun?”

³⁵Pilate-aam kiugaa, “Jews-aaruunga-qaa? Elpet yuullgutvet agayulirten͞gunret-llu wangnun tunaatgen. Qaillun pillrusit?”

³⁶Jesus-aaq kiuguq, “Wiinga angayuqauvika maaken nunamek pinrituq, nunamek maaken pillrukan pistenka akiuryartut tunevkarpek'nii Jews-aanun, tau͡gaam maa-i angayuqauvika maaken pinrituq.”

³⁷Taumek Pilate-aam qanrutaa, “Tua-i-qaa angayuqruuten?” Jesus-aam kiugaa, “Qanrucirpetun angayuqruunga. Tamana-llu pitekluku yuurtellruunga, tamana-llu pitekluku nunamun tekitellruunga piciuneq nallunairutkarkauluku. Piciunermek nauvingqellriim erinaka niitelaraa.”

³⁸Pilate-aam qanrutaa, “Ca una piciuneq?” Waten-llu qanrraarluni, Jews-aanun anenqigtuq, qanrulluki-llu, “Wiinga picurlagmek nataqvikenritaqa.

³⁹Tau͡gaam piciryarangqertuci Paaskaami atauciq itengqalria wiinga elpecen̄un pegtarkauluku. Jews-aat-qaa Angayuqrat pegtesqumaarci?”

⁴⁰Ellait-llu qayaganqigtut, “Una pivkenaku, Barabbas-aaq tau͡gaam!” Tau͡gken tauna Barabbas-aaq tuqutarayuliullruuq.