Read Yupik John 2 Bible Online

John 2 - Yupik bible

John 2

¹Erenrek pellugtellukek kassuutellriartangqellruuq Cana-mi, Galilee-am iliini. Jesus-aam-llu aanii tuantellruuq.

²Jesus-aaq-llu kassuucaramun kelgumallruuq, elitnaurani-llu.

³Wine-amek-llu nuuriata, Jesus-aaq aaniin qanrutaa, “Wine-amek nuuriut.”

⁴Jesus-aam-llu kiugaa, “Arnaaq, casqessia watua? Pillerkaqa tekiteksaituq.”

⁵Tua-i aaniin pistet qanrutai, “Camek uum ellimeqaci, tuaten pikici.”

⁶Tuantellruut-llu mer'utet qikut arvinelgen, menuircautnguluteng Jews-aat piciryaraacetun.

⁷Jesus-aam-llu qanrutai, “Mer'utet mermek imirciki.” Imirait-llu essmiartelluki.

⁸Nutaan qanrutai, “Qalucici tuaken, nerevkaritem-llu aulukestiinun ayaulluku.” Ayautaat-llu.

⁹Tua-i-llu nerevkaritem aulukestiin meq tauna wine-aurtelleq uigamiu, naken-llu piciilamiu, (pistet tau͡gaam qalucillret nallunritaat) nerevkaritem aulukestiin uikaun taisqaa,

¹⁰qanrulluku-llu, “Yuut tamarmeng wine-aq assilria ciumek aruqutek'laraat, nutaan-llu camirrluteng mer'umariata, pikegtaunrillra aruqutek'laraat. Tau͡gken elpet wine-aq assilria kingumek pillinian.”

¹¹Wani-wa Jesus-aam nallunailkuciqerraalqaa, Cana-mi Galilee-am iliini, ucurnarqucini nasvagluku. Elitnaurain-llu ukvekaat.

¹²Taum kinguani ellii, aanani, anelgutni, elitnaurani-llu Capernaum-aamun atrartut tuanlluteng-llu ernerni amllenrilngurni.

¹³Tua-i-llu Jews-aat Paaskaarat ukaqsigian, Jesus-aaq Jerusalem-aamun mayurtuq.

¹⁴Agayuvigpagmi-llu kuluvagnek, qusnginek, yaquliyagarnek-llu, tun'ilriit, akinek-llu naverqucilriit nall'artai.

¹⁵Piqertuarutkamek-llu piirriuq, tamalkuita-llu agayuvigpagmek anevkarai qusngit kuluviit-llu tuaten, naverqucilriit-llu akiutaitnek kuvii, estuuluit-llu ayaluqevkarluki.

¹⁶Imkunun-llu yaquliyagarnek tun'ilrianun qanertuq, “Makut anuciki. Atama enii kipusviurtenriciu.”

¹⁷Elitnaurain neq'eraat waten igausngalria, “Ilungem enen pitekluku, nangtaanga.”

¹⁸Jews-aat-llu qanrutaat, “Camek nallunailkutkarpenek nasviciiqsikut tuaten piavet?”

¹⁹Jesus-aam kiugai, “Una Agayutem enii piunrirluku, ernerni-llu pingayuni piurtenqigtarkaugaqa.”

²⁰Tua-i-llu Jews-aat qanertut, “Una Agayutem enii caliaqumallruuq allrakuni yuinaagni malrugni arvinlegnek ciplukek, elpet-qaa tau͡gken ernerni pingayuni piurtenqigciiqan?”

²¹Tau͡gaam elliin temni Agayutem enii qanrutkaa.

²²Tua-i-llu maktellran kinguani elitnaurain makut qanellri neq'erait, kalikat-llu ukveqait, Jesus-aam-llu cali qanellri.

²³Jerusalem-aametellrani Paaskaam nalliini, agayullratni amllelriit atranun ukveryaaqut, tangelteng irr'inarqelrialiari pitekluki.

²⁴Tau͡gaam Jesus-aam catkenritai, tua-i yuut tamalkuita nallunrilamiki,

²⁵ayuqucirtuumanrilnger'mi-llu yuum ayuqucianek, elliin yuum ayuqucia nallunrilamiu.