Read Yupik John 3 Bible Online

John 3 - Yupik bible

John 3

¹Angucetangqellruuq Pharisee-aat iliitnek, Nicodemus-aamek at'legmek, Jews-aani atanrulriamek.

²Taum unugmi Jesus-aaq ullagaa qanrulluku, “Ayuqucirturtaa, nallunritukut elitnauristen͞gucirpenek Agayutmek kingunengqerrluten, elpetun nallunailkuciyugngalriartailan Agayutem nayunrilkani.”

³Jesus-aam kiugaa, “Ilumun, ilumun, qanrutamken, yuk nutaramek yuurtenrilkuni, Agayutem angayuqauvia tangerrngaitaa.”

⁴Nicodemus-aam qanrutaa, “Qaillun-mi yuk yuurtenqigciiqa ak'allaurrluni? Aipiriluni-qaa aanami eneliagkenun piyunarquq yuurrluni-llu?”

⁵Jesus-aam kiugaa, “Ilumun, ilumun, qanrutamken, yuk merkun Anernerkun-llu yuurtenrilkuni, Agayutem angayuqauvianun iterngaituq.

⁶Kemegkun yuurtellria kemguuq, Anernerkun-llu yuurtellria anerneruuq.

⁷Irr'ivkenak qanrucamken yuurtenqigtarkauniluci.

⁸Anuqa piyuucimitun taivkaralartuq, culu'ugtellra-llu niitelaryaaqan, tau͡gken naken kingunengqerrucia natmun-llu ayalaucia nalluan. Waten ayuqut tamarmeng Anernerkun yuurtellriit.”

⁹Nicodemus-aam kiugaa, “Qaillun piluteng tamakut piciqat?”

¹⁰Jesus-aam kiugaa, “Israel-aani-qaa elitnauristen͞guyaaquten, tamakut tau͡gken nalluluki?

¹¹Ilumun, ilumun, qanrutamken, elisngakemten̄ek qallatukut, tangllemten̄ek-llu nallunairiukut, tau͡gaam nallunairutvut ciuniunritarci.

¹²Nunamiutarnek qanrutellrukumci, ukverpek'naci-llu, qaillun-mi ukverciqseci qilagmiutarnek qanruskumci?

¹³Alla qilagmun mayuqsaituq, qilagmek tekitelleq kiimi, wani-wa Yuum Qetunraa qilagmetleq.

¹⁴Tuarpiaq Moses-aam yuilqumi ciissirpaguaq agartellrukii, tuaten-llu Yuum Qetunraa agarcimaarkauguq;

¹⁵kina imna elliinun ukvelria nangyuilngurmek unguvangqerresqelluku.”

¹⁶Tuaten Agayutem ellamiut kenkeqapigcamiki kiingan Qetunrani cikiutekaa, kina imna elliinun ukvelria tamaasqevkenaku tau͡gaam nangyuilngurmek unguvangqerresqelluku.

¹⁷Tua-i Agayutem Qetunraq qanercetaariyarturcetenritaa ellamiunek, tau͡gaam anirtuumasqelluki elliikun.

¹⁸Kina imna elliinun ukvequni qanercetaarumangaituq, kina-llu elliinun ukvenrilkuni qanercetaarumauq ak'a, tua-i Agayutem kiingan Qetunraanun ukvenrilan.

¹⁹Wani-wa-llu una qanercetaarun, tua-i tanqik nunamun tut'ellruuq, tau͡gaam yuut tan'geq kenkenruat tanqigmi, caliateng assiilata.

²⁰Tua-i assiilnguliulriim tamarmi tanqik uumik'laraa, ullagyugpek'naku-llu, caliani nasvagnayukluki.

²¹Tau͡gaam piciulriamek atulriim tanqik ullalaraa, caliani nasvagnaluki, tua-i Agayutem pisqutii atuamegteggu.

²²Makut-llu kinguatgun Jesus-aaq elitnaurani-llu Judea-mun tekitut, tuani-llu ilakluki uitaurallruuq angllurceciluni-llu.

²³John-aaq-llu angllurcecimiuq Aenon-aami, Salim yaaqsinrilkiini, mer'et amllerrata tuani; yuut-llu ullautut angllurcetevkarluteng.

²⁴Wani-wa John-aaq itercimaksaituq cali.

²⁵Tua-i-llu John-aam elitnaurai Jews-aat-llu ilait qanngartut menuircaryaraq pitekluku.

²⁶John-aamun-llu ullaulluteng qanertut, “Ayuqucirturtaa, tangerrluku tauna Jordan-aam akiani ilakellren nallunairutkellren-llu angllurceciuq, yuut-llu tamarmeng ellii ullagaat.”

²⁷John-aam kiugai, “Qilagmek cikiumanrilkuni yuk camek unangeksaitelartuq.

²⁸Elpeci-llu nallunairutkarci una qanelqa, Christ-aunritnilua, tau͡gaam ciungakun ayagcetaunilua.

²⁹Nulirkautmek tegumialria uikautnguuq, tau͡gaam uikautem yugnikekii caniani nangengqalria niitelartuq uikautem eriniinek niicamiu-llu angnirtuq. Tamaa-i wii angniuteka qaqicimauq.

³⁰Ellii ul'arkauguq, wii tau͡gken entarkaulua.”

³¹Pakmaken kingunelek quyinruuq; nunamek kingunelek nunamiunguuq, nunamiutarnek-llu qallatelartuq; qilagmek-llu kingunelek quyinruluni.

³²Tangllerminek niitellerminek-llu nallunairilartuq, nallunairillra-llu yuut ciuniuryunritaat.

³³Nallunairillranek-llu ciuniurilria nallunairilartuq Agayutem piciucianek.

³⁴Tua-i Agayutem ayagcetellra Agayutem qaneryaraanek qallatelartuq, Agayutem-llu cikilaraa Anernermek Tanqilriamek qunukutevkenaku.

³⁵Aatam Qetunraq kenkaa, canek-llu tamalkuitnek unatainun elliillruluni.

³⁶Kina imna Qetunramun ukvequni unguvamek nangyuilngurmek pinguq, Qetunram-llu niisnganritestii unguvamek tangerrngaituq, tau͡gaam Agayutem eq'uqertii elliini uitaarkauguq.